Mbaroma 16:1-27
16 M ngu pasen ne kwagh u anmgbian wase u kwase Fibi; wasen tiônnongo* u ken Senkeria la tom.
2 Nahan, ngohol nen un ken Ter, er i doo u a ngohol uicighanmbaiorov la,* shi na un nen iwasen i a soo cii, gadia a wase ior kpishi, kua mo kpaa.
3 Sugh nen Prisika man Akwila sha ci wam, ka mba eren tom a mo imôngo ken Kristu Yesu;
4 ve wa uma ve ikyo ga sha ci wam. Man ka mo tseegh ga, atôônanongo a ken akuraior cii kpaa nga sughun ve.
5 Sugh nen tiônnongo u a lu hen ya ve la kpaa. Sugh nen Epinetu, orwam u doon mo ishima; un ka iyiagh ki i hii sundan ken Ashia sha ci u Kristu yô.
6 Sugh nen Maria, u a eren tom kpoghuloo sha ci wen la.
7 Sugh nen Anderoniku man Yunia, anmgbianev av mba sha tsombor mba yange i wuhem ken purusu a ve imôngo la. Mbaapostoli fa ve tsembelee, shi ve vande hiin u dondon Kristu a mo.
8 Sugh nen Ampiliatu sha ci wam, ka orwam u doon mo ishima ken Ter.
9 Sugh nen Ubanu, or u eren tom a vese imôngo ken Kristu, kua Setaku, orwam u doon mo ishima.
10 Sugh nen Apele, un u Kristu a lumun un la. Sugh nen mba hen ya u Aristobulu.
11 Sugh nen Herodion, anmgbian wam u sha tsombor. Sugh nen mba hen ya u Nakisu, mba ve lu ken Ter la.
12 Sugh nen Terafina man Terafosa, kasev mba ve lu eren tom u Ter kpoghuloo la. Sugh nen Pese, anmgbian u kwase u doon se ishima, gadia ngu eren tom u Ter kpoghuloo.
13 Sugh nen Rufu, un u Ter a tsough un la, kua ngô na, u mo kpa a lu ngôm la.
14 Sugh nen Asinkritu man Felegon kua Hemi; Pateroba man Hema, kua anmgbianev mba ve lu a ve la.
15 Sugh nen Filologu man Yulia kua Neriu man anmgbian na u kwase, man Olimpa, kua uicighanmbaiorov mba ve lu a ve la cii.
16 Sugh nen hanma wen, kuve nen ayol.* Atôônanongo a Kristu cii nga sughun ne.
17 Anmgbianev, m ngu kaan a ven mer, ver nen ishima sha kwagh u mba ve eren akaa a van a mpav man akaa a nan gbeev mbu nôngon, mba ve lu tesen akaa agen kposo a ityesen i ne hen la, nahan nyagh nen ve.
18 Gadia ambaaior la nga ikpan i Ter wase Kristu ga, kpa mba eren tom ka sha ci u iyav vev. Ka ve mee asema a mba ve kav kwagh ga la sha iliam i fan man sha zwa nyohon, ve tsume a ve.
19 Ior cii nenge er ne lu mbaungwan kwagh yô, nahan m ngu ember sha kwagh wen. Kpa sarem pe ma ne lu tsev tsev sha kwagh u dedoo, ma ne gem ma ne lu paleghaa a iferkwagh.
20 Ica a gba ga tsô, Aôndo u ka a na bem la una cagh Satan shin angahar a en. Ter wase Yesu a̱ tese ne erdoo na u sha mhôôn la.
21 Timoteu, u se eren tom imôngo ne, ngu sughun ne, shi anmgbianev av mba sha tsombor, Lushôôsu man Yason kua Sosipata kpaa, mba sughun ne.
22 Mo, Tertiu, u Paulu a lu ôron akaa* ne m lu ngeren ne, m ngu sughun ne ken Ter.
23 Gayu, u m tsan hen ya na u tiônnongo cii a kumban her la, ngu sughun ne. Erasetu, u a lu torikpa u gar* la, kua anmgbian na Kwatu, mba sughun ne.
24 *——
25 Aôndo una wase ne sha loho u dedoo u m pasen sha kwagh u Yesu Kristu ne, nahan ne tenger ga. Ka loho u dedoo u icighan kwaghmyer u Aôndo a pase la. Kwagh ne yange lu myer ica gba,
26 kpa hegen i pase ken igbar, nahan ior mba ken akuraior cii hingir u fan icighan kwaghmyer shon ken Uruamabera mba uprofeti, sha iniezwa i Aôndo u tsôron, u a soo ér akuraior cii a na un jighjigh shi a ungwan imo na la.
27 Aôndo, u i lu un tswen a lu a kwaghfan la, icivir i̱ lu i̱ na gbem sha won, ken Yesu Kristu. Amen.
Ngeren mba shin kpe
^ Nenge Ngeren u Pasen Asember.
^ Shin “er i doo u uicighanmbaiorov vea ngohol mbagenev la.”
^ Zwa Grika, “suse nen zwa sha gbenda u wang.”
^ Shin “washika.”
^ Shin “or u nengen sha gar.”
^ Ivur ne ngi ken uruamabera mba tsuaa mbagenev mba yange i hii ngeren sha ave la ga, nahan kwagh ne tese ér ka mkaanem ma ken Ruamabera u Aôndo yange na i nger la ga.
