Mbaroma 2:1-29
2 Nahan yô, wea lu nyi or je kpa, aluer u ngu ôron mbagenev ijir yô, u ngu a ishô ga, anngôm; gadia zum u u ôr orgen ijir yô, u ôr ka ijir you, sha ci u u ngu eren akaa shon a u lu ôron ijir sha mi la.
2 Se fa, Aôndo ka a ôr mba ve eren ambaakaa la ijir ér ve kuma mtsaha, man ijirôron i Aôndo ka i mimi.
3 Kpa, anngôm, aluer u ngu ôron mba ve eren ambaakaa la ijir man we kpa u ngu eren a nahan, u hen wer u war ijirôron i Aôndo?
4 Shin, er Aôndo a lu a erdoo kpishi, shi a gbe ishima ikyôr shi a lu wan ishima nahan cii kpa, kwagh la gba u kwagh ga? U kera fa er i lu sha erdoo u Aôndo la a lu nôngon ér u̱ gema ishima gaa?
5 Kpa er u taver ityough shi u soo u geman ishima ga yô, u ngu van a iyugh i Aôndo sha iyol you. Una pase i sha iyange i una ôr uumace ijir la, man una ôr i sha perapera je.
6 Una na hanma or injar sha aeren a nan:
7 mba ve lu keren iengem man icivir man mtsôr shi ve lu wan ishima eren kwagh u dedoo la cii, una na ve uma u tsôron;
8 kpa mba ve eren ayôôso man mba ve vende mimi, ve gem ve lumun iferkwagh la yô, vea tagher a iyugh kua ishimavihin.
9 Hanma or u nan eren kwaghbo cii, nana tagher a ican man mbamzeyol, Oryuda hiihii, maa Orgrika kpaa;
10 kpa hanma or u nan eren kwagh u dedoo yô, nana zua a iengem man icivir man bem, Oryuda hiihii, maa Orgrika kpaa.
11 Gadia Aôndo sangen a sange ga.
12 Mbafan atindi ga mba ve er isholibo cii, vea kpe, aluer mba a atindi ga je kpaa; kpa mba ve fe atindi shi ve er isholibo cii, a ôr ve ijir sha atindi.
13 Gadia ka mba ve ungwan a ungwa atindi la ve lu mbaperapera sha ishigh ki Aôndo ga, kpa ka mba ve eren kwagh u atindi a tese la a yila ve ér mbaperapera ye.
14 Gadia ior mba ken akuraior agen mba ve fe atindi ga la, mba eren kwagh sha tindi sha gbaaôndo ve je. Shin er ve fe atindi ga nahan kpa, mba tesen ér mba a atindi ken a ve.
15 Ve ayol a ve ka ve tese ér i nger atindi ken asema a ve, shighe u imoshima ve ka i ôron ve, shi asema a ve a naan ve ibo, shin a naan ve ishô la.
16 Kwagh ne una er sha iyange i Aôndo una ôr uumace ijir sha akaamyer a ve eren la, sha ikyev i Kristu Yesu, er m pasen ken loho u dedoo nahan.
17 Nahan aluer u ngu Oryuda ken iti, man u ngu suur sha atindi shi kaan ihyagh sha mlu wou vea Aôndo,
18 shi u fa awashima na shi u lumun a akaa a a lu a vough sha ci u i tese u Atindi,*
19 shi u na jighjigh wer u ngu or u hemen mbaapirashe, shi u ngu iwanger i mba ve lu ken ime,
20 u ngu or u kôôm mba kaven kwagh ga, man or u tesen mbayev mba kiriki, shi u kav akaa a hange hange man a mimi a ken Atindi la yô—
21 ka u tese orgen, man er nan u gem u tesen iyol you ga? We u u pasen kwagh u kaan wer, “De iin ga” la, u gema u iinii?
22 We u u kaan wer, “De eren idya ga” la, ka u gema u er idyaa? We u u ker ieev ihyom tsung la, ka u gema u iin ken utempel mba akombovoo?
23 We u u te ihyagh a atindi la, ka u gema u laha Aôndo sha u peren Atindii?
24 Gadia ka vough er i nger nahan, ér: “Ne na ior mba ken akuraior mba lahan iti i Aôndo.”
25 Jighilii yô, saa u kuran atindi ve icôngo you ia lu a inja ye, kpa aluer u ngu peren atindi yô, icôngo you la hingir ipyusu.
26 Nahan yô, aluer or-ipyusu nan ngu eren kwagh u Atindi a tese ér ka u perapera la yô, a nenge nan ér nan ngu or-icôngo, shin ka nahan ga?
27 Nahan or shon u i tsôngo nan ga la, er nan lu eren kwagh u Atindi a tese yô, nana ôr u ijir, we u i tsôngo u shi u lu a atindi kpa u gem u peren a la.
28 Gadia ka sha mluashe u nan a kaa ér nan ngu Oryuda ga, shi icôngo i nan kpaa ka kwagh u sha iyol ga.
29 Kpa nan ngu Oryuda u kimi, shi i tsôngo nan ka ken ishima sha jijingi, ka sha atindi ga. Nana zua a iwuese hen Aôndo, a lu hen ior ga.
Ngeren mba shin kpe
^ Shin “i ôr u Atindi u ungwa.”
