Mpase 11:1-19
11 Tsô i nam iyiagh ki lun er gbough nahan. Maa a kaa a mo ér: “Mough sha za kar icighanjiir u ken tempel u Aôndo la kua atse a nan nagh, shi ôr ingyegh ki ior mba ve civir Aôndo ker la.
2 Kpa tembe u u lu ken won u icighanjiir u ken tempel la yô, de u, de karen u ga, sha ci u i na akuraior u, nahan aa ndyar icighangar la angahar iwer 42.
3 Me na mbashiada av uhar vea ôr kwaghôron u profeti ayange 1,260, a ikyondo i huan zungwen iyol.”
4 I tese ikyav ve sha ikyon i tur ihiar, kua udaarmbaamenger uhar, ve tile sha ishigh ki Ter u tar u lu u na la.
5 Aluer or soo u bulan ve yô, usu ua due ken zwa ve ua hia mbaihyomov vev. Or u nan soo u eren ve kwagh u vihin cii yô, kape a wua nan je la.
6 Mba a tahav mbu cirin kwavaôndo* sha er ma ura ua nôô sha ayange a ve lu ôron kwaghôron u profeti la ga yô, shi mba a tahav sha mnger, tahav mbu geman hanma mngerem hingir awambe, shi van a hanma inja ican cii sha tar hanma shighe u ve soo cii.
7 Nahan vea eren shiada a been yô, inyamkyume i̱ i̱ lu duen shin ihyungwa i i ze kweng la i̱a nôngo ityav a ve, i̱a hemba ve, i̱a wua ve.
8 Ikyom ve ia lu sha ugodobi mba vesen mba* ken zegegar u i yila sha injakwagh ér, Sodom man Igipiti, ape Ter ve kpa yange i mande un sha kon la.
9 Nahan ior mba ve dugh sha ajiir kposo kposo kua ken uipyaven man ijô man akuraior agen yô, vea kenger akom a ve, a kuma ayange atar man tiôn, shi vea de ér i ii ikyom ve shin uwar ga.
10 Nahan a saan mba ve tem sha tar la iyol shi vea ember sha kwagh ve, shi vea tindi a uiyua hen ayol a ve, sha ci u uprofeti mba uhar mban yange ve er mba ve tem sha tar la ican.
11 Ayange atar man tiôn la nga karen yô, jijingi u uma u due hen Aôndo yô, nyôr ken a ve, maa ve mough ve tile sha angahar a ve, tsô zegemcie gba mba ve nenge a ve la cii iyol.
12 Tsô ve ungwa imo due sha aôndo genger genger, kaa a ve ér: “Va nen sha heen.” Nahan ve kôndo ken abeen, ve yem sha, mbahyomov vev nenge a* ve.
13 Hen ihwa la je, tar tenger sha utaha tsung, nahan gar la yôhôr kuma vegher môm ken avegher pue a gar shon cii; shi tartenger la wua iorov 7,000, tsô mciem gba mbagen mbara cii iyol, ve gba wuese Aôndo u sha.
14 Kwaghtseren u sha uhar la bee. Nenge! Kwaghtseren u sha utar ngu van fefa.
15 Ortyom u sha utaankaruhar tôngo busa na. Tsô amo due sha aôndo genger genger, gba kaan ér: “Tartor u uumace hingir Tartor u Ter wase man u Kristu na ve, una lu tor, una hemen zan zan gbem sha won.”
16 Tsô mbatamen mba 24 mba ve tem sha mkônom vem ma torom sha ishigh ki Aôndo la, gure sua ityough inya, ve lu civir Aôndo
17 kaan ér: “Se sugh u Yehova* Aôndo U Hemban Agee Cii, we u u lu, u ngise kpa u lu la, sha ci u u kôr tahav ou mbu hemban ken uwe, u tema tor.
18 Kpa ishima hingir u vihin akuraior, nahan iyugh you va, shi shighe u i ver u ôron mbakpenev ijir shi nan ikpan you injar la kuma, ka uprofeti man uicighanmbaiorov kua mba ve cie iti you la je la, mbakiriki man mbavesen cii, kua shighe u timin mba ve lu vihin tar la.”
19 Tsô i bugh icighanjiir u ken tempel u Aôndo, tempel na u sha la, nahan i nenge a areki u ikyuryan na la ken icighanjiir u ken tempel na la. Maa inyiar swamen kua amo man idyuran, shi tar tenger, shi awombo a vesen haa.
Ngeren mba shin kpe
^ Shin “cirin sha.”
^ Shin “igbenda i vesen i.”
^ Shin “lu kenger.”
^ Nenge Ngeren u Pasen Asember.
