Mpase 12:1-17
12 Tsô m nenge a ikyav i vesen sha: Kwase cir iyange iyol, uwer gema lu un shin angahar. A cir idyer i tor sha ityou, i i er sha asan 12 yô.
2 Kwase ne lu iyav, man lu toghor mar sha ican, ngoron sha ci u mnyoon u lu ker la.
3 Shi m nenge ikyav igen due sha. Nenge! Zegederakon u nyian, lu a ityouv itiankarihiar man akor pue, ader a tor ataankarahar lu sha ityouv nav mbira,
4 tsa na kombor asan a sha haa shin tar, asan la ngee kuma vegher môm ken avegher a atar a asan a sha cii. Tsô derakon la tile sha ishigh ki kwase u lu nôngon u maren la lu keghen, sha u una maren yô, una ya wan na shon.
5 Tsô a mar wan, lu wan u nomso, u una hemen akuraior cii sha gbough ku iyôôgh yô. Maa i tsue wan la i yem a na hen Aôndo, hen ikyônough nagh ki torough.
6 Kwase la maa yevese yem ken taaikyôngo, hen ijiir i Aôndo ver sha ci na yô, lu u a koso un her sha kwaghyan ayange 1,260.
7 Tsô ityav pev sha: Mikael* vea mbatyomov nav lu nôngon ityav a derakon, nahan derakon vea mbatyomov nav nôngo ityav mbira
8 kpa ve hemba ga,* shi ma ijiir i môm kera lu sha ci ve sha ga.
9 Tsô i kôr zegederakon la i ker un va gba shin tar, tse-iyô u i yilan ér Diabolo man Satan, u a lu tsughun tar jimin cii la, shi i ker mbatyomov nav va gba shin tar a na imôngo.
10 Tsô m ungwa imo lu ôron sha aôndo genger genger ér:
“Hegen myom man agee man Tartor u Aôndo wase kua tahav mbu Kristu na la hingir kwagh u mimi, sha ci u i ker un u a lu senden anmgbianev asev ityough la a za gba shin tar, un u a senden ve ityough sha ishigh ki Aôndo wase atetan man tugh la!
11 Ve hemba un ityav sha ci u awambe a Waniyôngo, kua sha ci u loho u ve lu eren shiada sha kwagh u u la, shi zum u ve tagher ishigh a ku je kpa, uuma vev kôr ve iyol ga.
12 Nahan yô, ember nen, ne usha kua ne mba ne tem ken a ve la! Kpa kwagh a tser ne, we tar man zegemnger, gadia Diabolo sen shin a ven a ishimavihin tsung, sha ci u a fa er shighe na a kera vese ga yô.”
13 Tsô derakon la nengen er i kôr un i ker, un va gbe shin tar nahan yô, a gba tôvon kwase u mar wan u nomso la a ican.
14 Kpa i na kwase la akper ahar, a zege igyuve, sha u a̱ purugh a̱ yem ken taaikyôngo, hen ijiir na, ape i gbe u a koso un sha kwaghyan a kuma shighe man ashighe man vegher shighe la,* sha er iyô la ia kera nenge a na ga yô.
15 Tsô iyô la sua mngerem ken zwa u i̱, er ka ifi nahan, ken ijime i kwase la, sha u ma̱ kua a na.
16 Kpa tar wase kwase la, tar bugh zwa u u mena ifi u derakon sua ken zwa na la.
17 Tsô ishima vihi derakon a kwase la, nahan a kar a yem u za nôngon ityav a ônov mba* kwase shon mba ve mase shin la, ka ve mba ve lu kuran atindi a Aôndo, mba i ne ve tom u eren shiada sha kwagh u Yesu la.
Ngeren mba shin kpe
^ Inja na yô ér, “Ka An Nan Lu Er Aôndo?”
^ Shin a fatyô u kaan ér, “kpa i hemba un [ka derakon je la].”
^ Ka, “ashighe atar man tiôn” je la.
^ Zwa Grika, “vor u.”
