Mpase 14:1-20
14 M kenger yô, nenge! Waniyôngo tile sha Uwo u Shion, iorov 144,000 lu vea na, i nger iti na man iti i Ter na sha atsul a ve.
2 Tsô m ungwa ayôôso lu duen sha aôndo er ka ihyuran i ukungwambamngerev nahan, man er imo i idyuran i taver nahan; man ayôôso a m ungwa la lu er ka a ior mba ve lu wan atsam kuhwan mbaadigyuve vev nahan.
3 Man icam i ve lu wan la lu er ka icam i he nahan, ve lu wan i sha ishigh ki ikyônough ki torough kira kua sha ishigh ki akaauma a anyiin la man mbatamen mbara, orgen môm fatyô u fan icam la ga, saa mba 144,000, mba i yam ve shin tar la tseegh.
4 Mban ka mba ve hôngor ayol a ve sha ukase ga yô; jighilii yô, mba er anuunaukase nahan.* Ka ve ve lu dondon Waniyôngo hanma ijiir i a lu zan cii ye. I yam ve ken uumace, mba iyiav mbi i hii sundan yô,* sha ci u Aôndo man sha ci u Waniyôngo,
5 shi i zua a aie môm ken zwa ve ga; mba a acôghor iyol ga.
6 Tsô m nenge ortyom ugen lu purugh sha aôndo,* lu a loho u dedoo u tsôron, u una yôô hen mba ve tem sha tar yô, hen hanma ikyurior man hanma ipyaven man hanma zwa man hanma nongoior.
7 Lu ôron genger genger ér: “Cia nen Aôndo, na un nen icivir, gadia shighe na u ôron ijir kuma, nahan civir nen Un u a er usha man tar man zegemnger kua ihwembe i* mnger la.”
8 Ortyom ugen, u sha uhar, dondo lu kaan ér: “A gba ve! Zegebabilon gba, kwase u a ne akuraior cii a me wain na la, ka isharen i idya* na i ka i kende ken or taveraa la je la!”
9 Ortyom ugen, u sha utar, dondo sha a ve, lu ôron genger genger ér: “Aluer ma or civir inyamkyume la man eev mbu i̱, shi i ver nan ikyav sha icul shin sha uwe yô,
10 shi nana ma wain u Aôndo kpaa, ka iyugh na je la; wain u i nungwa kwagh môm sha mi ga, u Aôndo una haa shin kôôpu u iyugh Na la, a er nan ican sha usu man sulfur, sha ishigh ki uicighan mbatyomov man sha ishigh ki Waniyôngo.
11 Shi mnyim ma usu u ua lu eren ve ican la ma a za hemen u kôndon sha zan zan gbem sha won, atetan man tugh cii vea zua a mmem ga, ve mba vea civir inyamkyume la kua eev mbu i̱ la cii, kua hanma or u a ver nan ikyav sha iti i i̱ la cii.
12 Ka ityôkyaa i i gbe u uicighanmbaiorov vea taver ishima je ne, ka mba ve lu kuran atindi a Aôndo shi ve kôr ave sha jighjigh u ve ne Yesu la gbang je la.”
13 Tsô m ungwa imo due sha aôndo kaa ér, “Nger wer: Hii hegen je, saan mba ve kpe ken mzough vea Ter la iyol. Jighilii yô, jijingi ngu kaan ér, ve̱ mem ityom ve, gadia a hungur a akaa a yange ve er la ga.”*
14 Tsô m kenger yô, nenge! ibyeenegh ki pupuu lu, un u tema sha ibyeenegh ki shon la lu er ka wan u or nahan, cir idyer i tor i sha zanaria sha ityou, shi lu a loji ken uwe.
15 Ortyom ugen due ken icighanjiir u ken tempel la, yila un u tema sha ibyeenegh la genger genger, kaa ér: “Za loji wou sunda, sha ci u shighe u* sunda kuma, gadia iyiav mbi sha tar via tsembelee.”
16 Tsô un u tema sha ibyeenegh la za loji shin tar, maa i sunda tar.
17 Shi ortyom ugen due ken icighanjiir u ken tempel u sha la, un kpa lu a loji u esen tsor tsor.
18 Shi ortyom ugen kpa shi due hen atse a nan nagh, lu a tahav sha usu. Tsô a yila un u lu a loji u esen tsor tsor la genger genger, a kaa ér: “Za loji wou u esen tsor tsor la, sunda asume a wain u tar, gadia atam a wain u ú la via.”
19 Ortyom la maa za loji na shin tar, sunda wain u tar, a gema a haa shin ihyungwa i shoghor wain u Aôndo, ka iyugh na je la.
20 Tsô i shoghor wain shon shin ihyungwa i shoghor wain la, ken won u gar, nahan awambe due shin ihyungwa i shoghor wain la ngee je gba anyinya shin gbem, shi kua inya yem zan zan kuma er ukilomita 296 nahan.*
Ngeren mba shin kpe
^ Shin “mba wang.”
^ Shin “iyiav mbi tsutswav.”
^ Shin “lu purugh sha ahumbe.”
^ Shin “azôr a.”
^ Zwa Grika, porneia (ponia). Nenge Ngeren u Pasen Asember.
^ Zwa Grika, “akaa a ve er la aa za a ve ityô.”
^ Zwa Grika, “ihwa i.”
^ Shin “umai 184.” Zwa Grika, “usitediom 1,600.” Sitediom môm yange a lihe i kuma umita 185 (shin angahar 606.95).
