Mpase 18:1-24
18 Kwagh ne eren kera yô, shi m nenge a ortyom ugen due sha lu senen, lu a tahav kpishi, shi tar wanger sha iengem na.
2 Lu ôron genger genger ér: “A gba ve! Zegebabilon gba, a hingir ijiir i azôv tsan her, man ijiir i yeren i hanma jijingi u hôngorough man hanma inyon i̱ wang ga man i̱ ndôhôrshima!
3 Gadia akuraior cii gba sha ci u wain na, ka isharen i idya* na i ka i kende ken or taveraa la je la, shi utor mba tar ne er idya a na, shi mbakasuav* mba sha tar hingir mbanyarev sha ci u tahav mbu akaa a taver ishe a a ombo kpishi, a kunya iyol shio la.”
4 Shi m ungwa imo igen due sha aôndo kaa ér: “Due nen ken a na kera, ior av, aluer ne soo u nyôron iyol ken asorabo a na la a na imôngo ga, shi ne soo u yan ma mtsaha na ga yô.
5 Gadia asorabo a na ta tihi je tav ar sha aôndo, shi Aôndo umbur aeren a na a ifer la.
6 Kimbi un nen injar sha gbenda u a eren kwagh a ior la; kimbi un nen injar i̱ kuma kwa har je, sha akaa a a er la; nungwa un nen zar shin kôôpu u a nungwa zar shimi la, i̱ kuma kwa har.
7 Er a kende a iyol na sha, shi a ombo uyôughyôughmbaakaav kpishi a kunya iyol shio yô, ne kpa er un nen a ya ican shi a zungwe kpishi. Gadia ka a shi kaan ken ishima na ér: ‘M ngu torkwase, m ngu kwasecôghol ga, shi mayange me nenge a ijungwen ga.’
8 Ka nahan ve atsan a na aa va sha a na ken iyange i môm ye, ka ku man ijungwen man ijen je la, shi a nande un sha usu, una hia vindi vindi, sha ci u Yehova* Aôndo u a ôr un ijir la ngu a agee.
9 “Man utor mba tar ne mba ve er idya* a na shi ve nyôr iyol ken ieren na i ombon uyôughyôughmbaakaav a kunya iyol shio la cii, vea vaa, vea zungwe un zum u vea nenge una lu hian duen mnyim la.
10 Ican i a lu eren un la ia cier ve iyol, nahan vea tile ken ica vea kaa ér: ‘Vihi tsôô, vihi tsôô, we zegegar ne, we Babilon gar u taver iyol, ijirôron va sha a we ken ihwa i môm tseegh!’
11 “Shi mbakasuav mba sha tar vea vaa shi vea zungwe un, sha ci u ikyav vev mbi kasuav cii vea kera zua a or u yamen mbi ga,
12 ka ikyav mbi kasuav cii, er zanaria man azurfa man awen a injaa nahan, kua utagbede man ikyondo i taver ishe man ikyondo i nyian dimiin man ikyondo i lun verver* man ikyondo i nyian dindee; kua hanma kwagh u i er sha ikyon i human doon; man hanma kwagh u i er sha anyi a nor man u i er sha ikyon i injaa, kua u i er sha togula man sha iyôgh ki il man sha iwen i mabel cii;
13 man sinamon kua ilyôghonough ki ken India man insensi man mkurem ma human doon man ferankinsensi man wain kua mkurem ma olev man mwem ma kengese, man alakema man ibua kua iyôngo man anyinya man akeke a kpelan a kpela man ikpan man uuma mba iorov.
14 Ityamegh ki kon ki dedoo ki yange ki doo u* yum la undu u, shi hanma kwaghyan u injaa man akaa a doon tsung la bee hen a we, u kera zua a mi mayange ga.
15 “Mbakasuav mba yange ve teen akaa ne, mba a ne ve hingir mbanyarev la, vea tile ken ica, sha ci u ican na la ia cier ve iyol, vea vaa shi vea zungwe,
16 vea kaa ér: ‘Vihi tsôô, vihi tsôô, nenge zegegar u yange wuha iyol sha ikyondo i taver ishe man ikyondo i nyian dimiin kua i nyian dindee, shi er hwe iyol sha akaa kpishi a sha zanaria man awen a injaa kua utagbede ne nahan,
17 ken ihwa i môm tseegh i ngohol akaa a a lu a mi kpishi la cica cii!’
“Shi hanma orvesen u mbanahantso man hanma or u zenden sha ajiir kposo kposo shin tso man mbanahantso kua mba eren kpenga shin tso cii, tile ken ica,
18 ve lu vaan kenger er lu hian yô, kaan ér: ‘Ka hanma gar a lu er zegegar ne sha wono?’
19 Ve lu haan inya sha ityou ngoron, vaan shi zungwen, kaan ér: ‘Vihi tsôô, vihi tsôô, nenge zegegar u lun yôughyôugh u a ne ior mba ve lu a utso shin zegemnger ve hingir mbanyarev ne nahan, ken ihwa i môm tseegh i ngohol un akaa cica cii!’
20 “Ember nen sha kwagh na, ne mba ne lu sha, man ne uicighanmbaiorov kpaa, kua ne mbaapostoli man uprofeti, gadia Aôndo ôr un ijir* sha ikyaa yen!”
21 Tsô ortyom u taver iyol shir yua* iwen i lun er zegenase nahan, ker za gba shin zegemnger, lu kaan ér: “Kape a ker Babilon, zegegar la sha utaha una za gba je la, shi a kera nenge a na mayange ga.
22 A kera ungwa imo i mbawanatsam kuhwan mbaadigyuve ken a we mayange ga, kua imo i mbakuhwankwagh man mbatôngon imar man mbatôngon busa kpaa ga. Shi ma orvareniwa u nan eren ma kpenga kpaa a kera zua a nan ken a we mayange ga, shi a kera ungwa ayôôso a nase u wuan kwagh ken a we mayange ga.
23 Shi imenger ia kera ta iwanger ken a we mayange ga, shi a kera ungwa ikyenge i orkwasehe man i kwasehe ken a we mayange ga; gadia mbakasuav ou lu ior mba tagher tagher sha tar, shi i tsugh akuraior cii sha akombo ou a sôron.
24 Sha kpôô yô, i zua a awambe a uprofeti man a uicighanmbaiorov ken a na, kua a ior mba i wua ve sha tar cii.”
Ngeren mba shin kpe
^ Zwa Grika, porneia (ponia). Nenge Ngeren u Pasen Asember.
^ Shin “mbazenden kasua.”
^ Nenge Ngeren u Pasen Asember.
^ Zwa Grika, porneia (ponia). Nenge Ngeren u Pasen Asember.
^ Shin “shiliti.”
^ Shin “doo uma wou.”
^ Shin “Aôndo tsaha un.”
^ Shin “tôô.”
