Mpase 19:1-21
19 Kwagh ne eren kera yô, m ungwa i genger amo, er ka a zegeikpelaior i sha nahan. Ve kaa ér: “Wuese nen Yehova!* Myom man icivir kua tahav cii ka akaa a Aôndo wase,
2 sha ci u ôron ajir sha mimi man sha perapera. Gadia a tsaha zege-gbagakwase u a vihi tar sha idya na la, shi a or iyev i awambe a ikpan na, a a lu sha ave a* kwase shon la.”
3 Her je shi ve ôr sha kwa har ér: “Wuese nen Yehova!* Tsô mnyim nam ma̱ lu hian ma lu duen la gba kôndon sha zan zan gbem sha won.”
4 Tsô mbatamen mba 24 mbara kua akaauma a anyiin la gba inya civir Aôndo, un u a tem sha ikyônough ki torough la, ve kaa ér: “Amen! Wuese nen Yehova!”*
5 Shi imo due hen ikyônough ki torough kira kaa ér: “Wuese nen Aôndo wase, ne ikpan na cii, ne mba ne cie un la, mbakiriki man mbavesen.”
6 Shi m ungwa ihyuran er zegeikpelaior ka ia lamen nahan, man er ka ihyuran i ukungwambamngerev yô, man shi er ka idyuran i taver nahan. I lu kaan ér: “Wuese nen Yehova,* sha ci u Yehova* Aôndo wase, U Hemban Agee Cii, tema tor!
7 Se ember nen shi i̱ saan se iyol tsung shi se na un nen icivir, sha ci u ivese i Waniyôngo kuma, kwase na kpa wa iyol bee.
8 I na kwase la ian a hua ikyondo i̱ taver ishe; i̱ engem shi ngi wang—gadia ikyondo i̱ taver ishe la tile sha ityough ki aeren a perapera a uicighanmbaiorov.”
9 Tsô a kaa a mo ér, “Nger wer: Saan mba i lehe ve iniongo i aikighe i ivese i Waniyôngo la iyol.” Shi a kaa a mo ér: “Akaa ne ka akaaôron a mimi a Aôndo.”
10 Ôron nahan yô, m gba inya hen angahar a na mer me civir un. Kpa a kaa a mo ér: “Wa ikyo! De eren kwagh la ga! Mo kpa m ngu kpan er we nahan, man er anmgbianev ou mba ve lu a tom u eren shiada sha kwagh u Yesu la nahan. Civir Aôndo! Gadia awashima u kwaghôron u profeti yô, ka u eren shiada sha kwagh u Yesu.”
11 Tsô m nenge i bugh sha, yô nenge! nyinya u pupuu lu. Man un u tema sha mi la iti na ér Jighjigh man Mimi, ôron ijir shi nôngon ityav sha perapera.
12 Ashe a na nga er nomborusu nahan, shi ngu a ader a tor sha ityou kpishi. I nger iti na, i orgen môm nan fe i ga, i lu un tseegh a fe yô,
13 shi a haa ikyondo iyol, ngi a* awambe sha mi, shi ka i yila iti na ér Imo i Aôndo.
14 Shi akumautya a sha lu dondon un ijime sha anyinya a pupuu, hanmô ve haa ikyondo i taver ishe iyol, i̱ pupuu i̱ lun wang.
15 Shi gôgô sanker u esen tsor tsor lu ken zwa na, lihe due ken won, ka u una gber akuraior a mi, shi una hemen ve sha gbough ku iyôôgh. Heela tseegh ga, una shoghor wain shin ihyungwa i shoghor wain, ka iyugh i cieryol i Aôndo U Hemban Agee Cii la je la.
16 I nger iti sha ikyondo na i a haa iyol la, sha namegh nagh, ér: Tor u utor man Ter u uter.
17 Shi m nenge ortyom tile sha iyange, lu yilan inyon i purugh sha aôndo* genger genger, kaan ér: “Va nen heen, kohol nen imôngo hen zege iniongo i aikighe i Aôndo,
18 sha er ne ya inyam* i̱ utor man inyam i̱ ukurmbautyaav man inyam i̱ mba taver iyol yô, kua inyam i̱ anyinya man mba ve tem sha a la, man inyam i̱ hanma or, i̱ mba ve lu ikpan ga man i̱ ikpan, man i̱ mbakiriki kua mbavesen cii.”
19 Tsô m nenge a inyamkyume la kua utor mba sha tar kua ushoja vev, ve kohol imôngo sha u vea nôngo ityav a un u a tem sha nyinya la man a ikyumutya na.
20 Tsô i kôr inyamkyume la man profeti u aiegh u yange eren uivande sha ishigh ki i̱ sha u tsughun mba ve lu a ikyav i inyamkyume shon kua mba ve civir eev mbu i̱ la. Er ve lu uma her la je, i ker ve ve za gba ken ber u usu, u sulfur a lu yeghen usu shimi la.
21 Kpa i wua mbagenev cii sha gôgô sanker u due ken zwa u un u a tema sha nyinya la. Nahan inyon cii ide sha inyam ve.
Ngeren mba shin kpe
^ Zwa Grika, “Ve kaa ér: ‘Haleluya!’” Ishember ne ngi a iti i Yehova ker tiônôô.
^ Zwa Grika, “a a hee inya sha uwegh ku.”
^ Zwa Grika, “ve ôr sha kwa har ér: ‘Haleluya!’” Ishember ne ngi a iti i Yehova ker tiônôô.
^ Zwa Grika, “Amen! Haleluya!” Ishember ne ngi a iti i Yehova ker tiônôô.
^ Zwa Grika, “I lu kaan ér: ‘Haleluya!’” Ishember ne ngi a iti i Yehova ker tiônôô.
^ Nenge Ngeren u Pasen Asember.
^ Shin a fatyô u kaan ér, “i mishi.”
^ Shin “sha ahumbe.”
^ Shin “ikyom.”
