Mpase 21:1-27
21 Tsô m nenge a sha u he man tar u he; gadia sha u tse man tar u tse la kar kera, shi zegemnger kera lu ga.
2 Shi m nenge a icighangar, ka Yerusalem u He je la, due sha, hen Aôndo, lu senen, i wuha un iyol er ka kwasehe u i wuhu nan iyol sha ci u nom u nan nahan.
3 Tsô m ungwa imo due hen ikyônough ki torough kira genger genger, kaa ér: “Nenge! Tenti u Aôndo ngu hen atô u uumace, una tema a ve imôngo, shi vea lu ior nav. Aôndo iyol na una lu vea ve.
4 Una ese ve mliam cii sha ashe kera, ku ua kera lu ga, ijungwen kpa ia kera lu ga, mliam kpa ma a kera lu ga, shi mnyoon kpa una kera lu ga. Akaa a tse la kar kera.”
5 Un u a tem sha ikyônough ki torough la kaa ér: “Nenge! M ngu eren akaa cii a he.” Shi a kaa ér: “Nger kwagh ne, gadia mkaanem man ma kuma u nan ma jighjigh, shi ka ma mimi.”
6 Shi a kaa a mo ér: “Akaa ne hingir mimi ve! Mo m ngu Alefa man Omega,* mhii man mkur. Or u imura i ker nan cii, me na nan mngerem ma shin hwembe u* mngerem ma uma la gbilin.*
7 Man or u nan hembe yô, me na nan dyako sha akaa ne, shi me lu Aôndo u nan, nan di nana lu wan wam.
8 Kpa mbaciankwagh man mba ve ban a jighjigh u nan, man mba ve ndôhôrshima sha hôngor ve, man mbawuanior man mbadyarev* man mbasôron akombo man mbacivir eev man mbaerenaie cii, ka ber u a lu yeghen usu man sulfur la a lu keghen ve ye; a tile sha ityough ki ku u sha uhar la.”
9 Môm ken mbatyomov mba utaankaruhar mba ve lu a agbande a atsan a ataankarahar a masetyô iv shimi poo poo la, va kaa a mo ér: “Va, m tese u kwasehe, kwase u Waniyôngo.”
10 Tsô a tôôm sha tahav mbu jijingi, a yem a mo sha uwo u taven tsung, a za tesem icighangar, ka Yerusalem je la, due sha, hen Aôndo, lu senen
11 a iengem i Aôndo. A engem er ka iwen i injaa i hemban cii nahan, lu er ka iwen i yasepa nahan; engem shi nenge tsura er ka krista yô.
12 Girgar na lu civirii shi tav sha geng, shi lu a ihindagar 12, mbatyomov 12 lu sha ihindagar la,* shi i nger ati a uipyaven mba 12 mba ônov mba Iserael la sha ihindagar la.
13 Vegher u sha ityoughkitaregh la, ihindagar lu itiar, vegher u ken imbusutarimese la kpa ihindagar lu itiar, shi vegher u ken imbusutariyan la, ihindagar lu itiar, vegher u shin ityôtar la kpa ihindagar lu itiar.
14 I wa girgar la ityô tav sha, lu awen 12, i nger ati a 12 a mbaapostoli mba 12 mba Waniyôngo mbara sha mi.
15 Nahan un u lu ôron kwagh a mo la kôr aga u karen kwagh a mi sha uwe, u i er sha zanaria yô, sha u una kar gar la, kua ihindagar na man girgar na.
16 Gar la lu azongo anyiin, kehe kpishi, iniembe na man igbanger na lu kwaghmôm. Tsô a kar gar la sha aga la, lu er ukilomita 2,220* nahan; iniembe na man igbanger na kua ityaven na cii lu kwaghmôm.
17 Shi a kar gir* u gar la, lu er angahar 210* nahan, sha ikyaren i orumace, kua sha ikyaren i ortyom kpaa.
18 I maa girgar la sha awen a yasepa, gar la lu u sha zanaria u wang, er ka gelase u engem* nahan.
19 I wa girgar la ityô sha hwe, sha hanma inja iwen i injaa cii, hii shin inya kôndo sha: iwen i hiihii lu yasepa, i sha uhar lu safir, i sha utar lu chasedoni, i sha unyiin lu emeradi,
20 i sha utaan lu sadoni, i sha ataratar lu sadiu, i sha utaankaruhar lu krisolati, i sha anigheni lu beri, i sha utaankarunyiin lu topasi, i sha pue lu krisoperase, i sha puekarmôm lu haisenti, i sha puekaruhar lu ametese.
21 Shi ihindagar i 12 la lu utagbede 12; hanma hundagar yô, i er u sha tagbede môm. Shi godobi* u vesen ken gar la lu zanaria u wang, lu er ka gelase u a nenge tsura nahan.
22 M nenge a tempel ker ga, sha ci u ka Yehova* Aôndo, U Hemban Agee Cii a lu tempel na ye, shi Waniyôngo kpa ka tempel na.
23 Shi ityôkyaa lu i iyange shin uwer vea ta iwanger ken gar la ga, sha ci u iengem i Aôndo mondo iwanger ker, shi imenger i gar shon lu Waniyôngo.
24 Shi akuraior aa zenden sha iwanger i gar shon, shi utor mba sha tar vea nyôr a iengem ve ker.
25 Mayange a wuhe ihindagar na atetan ga, sha ci u tugh mbua lu ker ga.
26 Shi a va nyôr a iengem man icivir i akuraior ker.
27 Kpa ma kwagh môm u hôngorough una nyôr ker mayange ga, kua or u nan eren kwagh u ndôhôrshima man u aiegh cii; ka mba i nger ati a ve ken ihyurenruamabera u uma u Waniyôngo la tseegh vea nyôr ker ye.
Ngeren mba shin kpe
^ Shin “m ngu A man Z.” Alefa ka ishangebaacaa i hiihii ken zwa Grika, Omega di gema ka i masetyô.
^ Shin “ijôr i.”
^ Shin “nana kimbin kwagh ga.”
^ Nenge Ngeren u Pasen Asember, “Idya.”
^ Hanma hunda ortyom lu sha mi môm.
^ Shin “lu er umai 1,379.” Zwa Grika, “usitediom 12,000.” Sitediom môm yange a lihe i kuma umita 185 (shin angahar 606.95).
^ Shin “kpekpe.”
^ Shin “lu er umita 64.” Zwa Grika, “aseva 144.” Nenge Ngeren u Pasen Asember.
^ Shin “u nengen tsura.”
^ Shin “gbenda.”
^ Nenge Ngeren u Pasen Asember.
