Mpase 22:1-21
22 Shi a tesem ifi u mngerem ma nan uma, engem er ka krista yô, lu duen ken ikyônough ki torough ki Aôndo man ki Waniyôngo, kuan
2 senen hen atô atô u godobi* u vesen u gar la. Ikyon i nan uma lu sha akpe a ifi la keen man keen, lu umen atam kwa 12, i lu umen hanma uwer. Man ikya i ikyon shon lu sha ci u been akuraior angev.
3 Shi mayange ifyan ia kera lu ga. Kpa ikyônough ki torough ki Aôndo man ki Waniyôngo kia lu ken gar la, shi ikpan na ia lu eren un icighantom;
4 nahan vea nenge a ishigh nagh, shi a nger iti na sha atsul a ve.
5 Shi tugh mbua kera lu ga, nahan kwagh a kera gba ve a iwanger i imenger shin iwanger i iyange ga, gadia Yehova* Aôndo una ta iwanger sha a ve, vea tema tor zan zan gbem sha won.
6 A kaa a mo ér: “Mkaanem man kuma u nan ma jighjigh, shi ka ma mimi; Yehova* Aôndo u ka a mgbegha uprofeti nav ve ôr kwagh la, tindi ortyom na ér a tese ikpan na akaa a a sôôn eren keng la.
7 Nenge! M ngu van fefa. Saan or u nan lu dondon akaaôron a profeti a ken ihyurenruamabera ne la iyol.”
8 Ka mo Yohane yange m lu ungwan shi nengen akaa ne ye. Er m ungwa shi m nenge a akaa ne yô, m gba inya shin angahar a ortyom u lu tesen mo a la, mer me civir un.
9 Kpa a kaa a mo ér: “Wa ikyo! De eren kwagh la ga! Mo kpa m ngu kpan er we nahan, man er anmgbianev ou mba ve lu uprofeti la nahan, man shi er mba ve lu dondon mkaanem ma ken ihyurenruamabera ne la nahan. Civir Aôndo!”
10 Shi a kaa a mo ér: “De yeren mkaanem ma profeti ma ihyurenruamabera ne ga, gadia shighe u i ver la zurum.
11 Or u eren akaabo nana̱ za hemen u eren akaabo, shi or u eren akaa a ndôhôrshima nana̱ za hemen u eren akaa a ndôhôrshima; kpa orperapera yô, nana̱ za hemen u eren perapera, shi icighanor nana̱ za hemen u lun icighanor.
12 “‘Nenge! M ngu van fefa, shi injar i ka m na la ngi a mo, sha u me kimbi hanma or er tom u nan u lu la.
13 M ngu Alefa man Omega,* u hiihii man u masetyô, mhii man mkur.
14 Saan mba ve kire akondo a ve a elemeen la iyol, vea zua a ian i zan hen ikyon i nan uma la, shi vea zua a ian i nyôron ken gar la sha ihindagar na.
15 Ken won yô, ka aniwaav* man mbasôron akombo man mbadyarev* man mbawuanior, man mbacivir eev man hanma or u aie a doo nan ishima shi nan tsughun ior cii.’
16 “‘Mo Yesu, m tindi ortyom wam mer a er shiada hen a ven sha akaa ne sha ci u atôônanongo. M ngu mise u Davidi, shi m ngu wan na, shi m ngu ishan i mondon pepe.’”
17 Nahan jijingi man kwasehe mba kaan her zan zan ér, “Va!” or u nan lu ungwan cii nana̱ kaa ér, “Va!” shi or u imura i ker nan cii nana̱ va; or u nan soo cii nana̱ ma mngerem ma uma gbilin.
18 “M ngu eren shiada hen hanma or u nana ungwa akaaôron a profeti a ihyurenruamabera ne cii mer: A lu or a seer kwagh sha akaa ne yô, Aôndo una seer nan atsan a i nger ken ihyurenruamabera ne la;
19 shi aluer or pande ma kwagh ken akaaôron a ihyurenruamabera u kwaghôron u profeti ne yô, Aôndo una kar a kwar u nan u ikyon i nan uma la kera, kua u ken icighangar la kpaa, akaa a i nger kwagh u a ken ihyurenruamabera ne la.
20 “Un u a lu eren shiada u akaa ne la, ngu kaan ér: ‘M ngu van fefa.’”
“Amen! Va, Ter Yesu.”
21 Ter Yesu a̱ za hemen u tesen uicighanmbaiorov erdoo u sha mhôôn.
Ngeren mba shin kpe
^ Shin “gbenda.”
^ Nenge Ngeren u Pasen Asember.
^ Nenge Ngeren u Pasen Asember.
^ Shin “m ngu A man Z.” Alefa ka ishangebaacaa i hiihii ken zwa Grika, Omega di gema ka i masetyô.
^ Ka, “mba aeren a ve a ndôhôr Aôndo ishima” je la.
^ Nenge Ngeren u Pasen Asember, “Idya.”
