Mpase 9:1-21
9 Ortyom u sha utaan la tôngo busa na. Tsô m nenge a ishan i yange i osough sha i va gba shin tar yô, i na un* akii a sha ian i nyôron shin ihyungwa i i ze kweng la.
2 A bugh ian i nyôron shin ihyungwa i i ze kweng la, maa mnyim gba duen hen ian shon kôndon sha, er ka mnyim ma ken atse a usu a vesen nahan, maa iyange hingir dimii, kua ahumbe kpaa, sha mnyim ma hen ian shon mara.
3 Shi ikyomon* due ken mnyim mara samber sha tar; i na i tahav, ka imba utaha i ayese a sha tar a lu a mi la vough.
4 I kaa a i ér i̱ de eren ma imendenev ki sha tar shin ma toho shin ma kon kwagh ga, saa ior mba ve lu a ikyav i Aôndo sha atsul a ve ga la tseegh.
5 I na ikyomon la tahav, lu sha u i wua ve ga, kpa i er ve ican iwer itian, man ican ve la lu er ican i iyese ka ia ta or ve nan ya la nahan.
6 Sha ayange la, ior vea tôm ku, kpa mayange vea zua a mi ga, a sar ve tsung u kpen, kpa ku ua yevese ve.
7 Mluashe u ikyomon la lu er ka anyinya a i we a iyol u zan ityav nahan; i lu a kwagh sha ityouv mbi i er ka ader a tor a sha zanaria nahan, i lu ishiv er ka ishiv mbi uumace nahan,
8 kpa i lu a ice sha ityouv mbi i er ka ice i ukase nahan. Anyi a i lu er ka anyi a ubegha yô,
9 shi i lu a urigambautyaav iyol er ka urigambautyaav mba iyôôgh nahan. Akper a i lu huran er ka ihyuran i akekeautya a anyinya a lu kpelan a sha ayem yemen ken utya nahan.
10 Shi hanmô ve lu a tsa, soho lu sha mi er ka u yese nahan, shi i lu a tahav mbu tan ior sha ica i i la, zan zan iwer itian.
11 I lu a tor u hemen i, ka ortyom u ihyungwa i i ze kweng la. Iti na ken zwa Heberu ér, Abadon,* kpa iti na ken zwa Grika ér Apolion.*
12 Kwaghtseren u môm la kar kera ve. Nenge! Akaa ne aa eren kera yô, akaatseren ahar aa mase van.
13 Ortyom u sha ataratar la tôngo busa na. Tsô m ungwa imo ken akor a atse a nan nagh a sha zanaria, a a lu sha ishigh ki Aôndo la,
14 i kaa a ortyom u sha ataratar, u lu a busa la ér: “Sagh mbatyomov mba unyiin mba ve lu uikyangen hen zegeifi u Yuferati la.”
15 Tsô i sagh mbatyomov mba unyiin mba ve wa iyol sha ci u ihwa la man iyange la man uwer la kua inyom shon la, sha u ve̱ wua ior sha tar i̱ ngee i̱ kuma vegher môm ken avegher a u a atar la cii.
16 Ingyegh ki ushoja mba nôngon ityav sha anyinya lu dubu ikyundu kwa dubu pue;* i yila ingyegh ve m ungwa.
17 Man kape anyinya a m nenge a mi ken mpase man ior mba ve tema sha a la lu je ne: Ve lu a urigambautyaav iyol, mba lun kala nyian er ka usu nahan, man mba lun kwer kwer,* man mba lun a kala u ayarkyure, er sulfur nahan. Mtom ma anyinya la lu er ka mtom ma ubegha nahan, usu man mnyim kua sulfur due ken ijô i a.
18 Atsan a atar ne wua ior sha tar ngee kuma vegher môm ken avegher a u a atar cii, sha usu man mnyim kua sulfur u due ken ijô i a la.
19 Gadia tahav mbu anyinya la mbu ken ijô i a man ken ica i a, gadia ica i a ngi er ica i iyô nahan, shi ngi a ityouv sha mi, shi ka sha akaa ne ka a er ior ican ye.
20 Kpa ior mbagenev mba atsan ne wua ve ga la cii, gema ishima sha ityom i ave a ve ga; ve de u civir azôv man ieev mbi sha zanaria man mbi sha azurfa man mbi sha togula man mbi sha awen man mbi i gbe sha ikyon la ga, akaa a a nengen ga, shi a ungwan ga, shi a zenden kpaa ga ne.
21 Ve gema ishima ve de u wuan ior ga, akombo a sôron kpa ve de ga, shi ve de idya* ga, iv kpa ve de ga.
Ngeren mba shin kpe
^ Ka, “ishan la” je la.
^ Shin “mbaahungwa.”
^ Inja na yô ér, “Mtim.”
^ Inja na yô ér, “Or u Timin Ior.”
^ Ka, “200,000,000” je la.
^ Shin “buluu buluu.”
^ Zwa Grika, porneia (ponia). Nenge Ngeren u Pasen Asember.
