Yakobu 3:1-18
3 I de lu ne cica cii hingir nen mbatesen ga, anmgbianev av, gadia ne fa er se mba se tesen la Aôndo una hemba ôron se ijir* vighe vighe yô.
2 Gadia se cii ka se nôngo gbeev acin imôngo. Or u nan nôngon gbeev sha kwaghôron ga yô, nan ngu or u vough, shi nana fatyô u kôron iyol i nan cii tsaha.*
3 Ka sea wa anyinya ulijam sha zwa sha u a̱ er kwagh u se soo la yô, iyol i a jimin cii kpa se kôôm.
4 Nenge ase kwagh u utso kpaa: Shin er ve kehe kpishi shi ahumbe a taver ka a mgbeghan ve a yemen a mi nahan kpa, ka i kôôm ve sha an-naha u cuku, ve yem ape or u nahan la nan soo u zan cii.
5 Kape nombor wase kpa u lu ilyeegh ki iyolough ki cuku, kpa ka u ôron uzegembaakaav je la. Nenge er sha an-usu u cuku tseegh kpa ka i nande zegeikyô yô!
6 Nombor kpa ngu er ka usu nahan. Nombor ka ilyeegh ki iyol yase, ki ki iv a hanma kwagh u ifer cii yô, gadia ka u hôngor iyol jimin cii, shi ka u nande uma jimin cii* sha usu, man usu u nombor la due ka shin Gehena* je.
7 Gadia uumace vea fatyô u kôôm hanma inja inyamtoho man inyon man kwaghuma u a kpelan a kpela inya kua kwaghuma u shin zegemnger cii, una hingir u ungwan ve, shi ka ve er nahan.
8 Kpa orumace môm nana fatyô u kôôm nombor ga. Ngu ongo kwagh ga, ka bokwagh, u iv a megh ku wuan or.
9 Ka sha u ka se wuese Ter Yehova* ye, shi ka sha u môm môm ka se wa uumace mba i gbe “sha ibeen i Aôndo” la ifyan ye.
10 Shi ka sha zwa shon môm ka se na or iveren shi se wa or ifyan ye.
Anmgbianev av, doo u kwagh a lu nahan ga.
11 Hwembe ngu duen mngerem ma dedoo man ma nyohon* hen zwa mômôô?
12 Anmgbianev av, kon u tur ua fatyô u umen atam a olev shin atam a wain kpa? Kape mngerem ma nyohon bar ma a fatyô u duen hingir mngerem ma dedoo ga je la.
13 Ka an ken a ven nan lu orfankwagh man orkavenkwagha? Nana̱ tese sha ieren i nan i dedoo ér nan eren kwagh sha ishima i legh legh, i̱ kwaghfan ka a na or nan lu a mi la.
14 Kpa aluer ne iv a iyuhwe ken asema a en, shi ne mba a ieren i gban ayôôso la ken a ven* yô, de te nen ihyagh a kwaghfan wen la ga, ne er nahan yô, ne lu eren aie.
15 Kwaghfan la ka u a dugh sha la ga; ka u taregh, u sha inja i iyolough, ka u azôv.
16 Gadia ape iyuhwe man ayôôso a lu yô,* anzughul kpa aa lu her, kua hanma kwagh u bo cii.
17 Kpa kwaghfan u a dugh sha la, ka a hii lun wang, maa a lu a bemshima, a eren kwagh sha mkav, a kegh iyol u ungwan kwagh, a iv a mhôônom ma zungwen man atam* a dedoo, sangen a sange ga, shi eren atseregh ga.
18 Bee kera yô, ka i lôô ityamegh ki perapera ken bem sha ci u mba ve lu keren bem la.*
Ngeren mba shin kpe
^ Shin “una hemba tôvon se sha ijir.”
^ Shin “wan iyol i nan cii lijam.”
^ Zwa Grika, “akaver a mhii u uma.”
^ Nenge Ngeren u Pasen Asember.
^ Nenge Ngeren u Pasen Asember.
^ Shin “ma nyohon bar.”
^ Shin a fatyô u kaan ér, “ne mba henen sha mtsera wen tseegh.”
^ Shin a fatyô u kaan ér, “ape ieren i or henen sha mtsera u nan tseegh la i̱ lu yô.”
^ Shin “aeren.”
^ Shin a fatyô u kaan ér, “ka mba ve keren bem la ka ve lôô ityamegh ki perapera ken bem ye.”
