Yakobu 4:1-17
4 Ka nyi i ve a inium i nôngon man ayôôso hen atô wene? Ka asaren a en a iyolough a a lu nôngon ityav ken a ven la gaa?
2 Kwagh saren ne, kpa ne mba zough a mi ga. Ne zer wuan ior shi tômon kwagh, kpa ne mba fan ityô u zuan a kwagh ga. Ka ne zer eren ayôôso shi nôngon inium. Ne mba zuan a kwagh ga sha ci u ne mba sônon ga.
3 Ka nea sôn kwagh kpa ne zua a mi ga sha ci u ka ne sôn a awashima u vough ga, ka i lu sha u kuren asaren a en a iyolough a mi di tsô.
4 Ne ior mba civir Aôndo sha mimi ga mban,* ne fa er u yan ijende a tar ne la una na ne hingir mbahyomov mba Aôndo gaa? Sha nahan yô, hanma or u nan soo u yan ijende a tar ne cii yô, nan soo u hingir orhyom u Aôndo.
5 Shin ne hen ner ka gbilin tsô ruamabera a kaa ér: “Akaa cii ka a zer saren jijingi u iyuhwegh u a tem ken a vese la tsung” yee?
6 Nahan kpa, erdoo u sha mhôôn u Aôndo a tesen la hemba ngeen. Nahan ruamabera kaa ér: “Aôndo hendan kwagh a mbakenden a iyol sha, kpa mbahiden a iyol ijime yô, tesen ve erdoo u sha mhôôn.”
7 Sha nahan yô, wa nen ayol a en sha ikyev i Aôndo; kpa gema hendan nen a Diabolo, nahan una yevese ne.
8 Kporom nen hen Aôndo, nahan un kpa una kporom hen a ven. Kire nen ave a en, ne mbaasorabo, shi wanger nen asema a en, ne mba lun ta ta ta.
9 Ure nen, zungwe nen, shi vaa nen. Ahan a en a̱ hingir ijungwen, iember yen i̱ hingir ishimavihin.
10 Hide nen a ayol a en ijime sha ishigh ki Yehova,* nahan una kende a ven sha.
11 De nen u lamen sha mbagenev, anmgbianev. Or u nan lamen sha anmgbian shin nan ôron anmgbian ijir yô, nan ngu ôron kwagh u hendan a tindi, shi nan ngu puun tindi. Man aluer u ngu puun tindi yô, u ngu or u dondon tindi ga, kpa u ngu or u ôron ijir.
12 Man Orwanatindi kua Orjir ngu môm tseegh, ka un u a lu a tahav mbu yiman man mbu timin la. Kpa we yô, u ngu di nyi ve ka u ôron or u wan ndor a we ijiri?
13 Kegh nen ato, ne mba ka ne kaa ner: “Nyian shin kper se za hen gar ngun, se za tsa her inyom i môm, se er kpenga se zua a liba,”
14 kpa ne gema ne fa er kper uma wen una lu ga la. Gadia ne mba er ka iikpii i ka i gba sha anshighe kpuaa, maa i sambe kera la nahan.
15 Kpa doo u ma ne kaan ner: “Yehova a̱ lumun yô, se lu uma se er i ngin shin i ngila.”
16 Kpa ka i doo ne u kaan ihyagh sha igbongor. Ihyagh i kaan ngila nahan cii ka ifer.
17 Sha nahan yô, aluer or fa u eren kwagh u vough kpa nan er un ga yô, hingir isholibo je nan er ye.
