Yakobu 5:1-20
5 Kegh nen ato, ne mbanyarev, vaa nen, gber nen kwelegh sha ci u ican i i lu van sha a ven la.
2 Inyaregh yenegh hôô, akondo a en kpa ivina ya a kera.
3 Zanaria man azurfa wen ta nduran, shi nduran ku ve te la kua lu shiada u tesen er ne lu a ibo yô, shi kua ya ne. Kwagh u ne koso la una lu er ka usu nahan, ken ayange a masejime.
4 Nenge! Injar i ne vende u kimbin mbatomov enev mba ve sunda ne iyiav ken atev la ngi vaan genger genger, mliam ma mbasundav ve vaan ér i̱ wase ve la gba Yehova* u akum a sha ken ato.
5 Ne mba yôughyôugh sha ci u ishima yen cii ngi sha asaren a iyolough a en ken tar ne. Ne ya akaa, asema a en hingir dindim dindim er ka uzendenya mba i koso ve ve kehe ambusu sha iyange i sôngon ve nahan.
6 Ne ôr ijir ne na ibo; ne wua un u a lu orperapera la. Ngu hendan a ven gaa?
7 Nahan yô, anmgbianev, wa nen ishima zan zan shighe u Ter una kar lun vea vese imôngo la. Nenge! Orsule ka nan kegh ityamegh ki dedoo ki kwagh u nan lee shin inya la, nan wa ishima zan zan ura u hiihii u nôô, shi ura u masetyô u va nôô.
8 Ne kpa wa nen ishima; taver nen ishima, sha ci u shighe u Ter una lu vea vese imôngo la zurum.
9 De gbe nen ahon* sha kwagh u mô wen ga, anmgbianev, sha er a ôr ne ijir ga yô. Nenge! Orjir ngu* sha ihinda.
10 Anmgbianev, dondo nen ikyav i uprofeti mba yange ve ôron kwagh ken iti i Yehova* la, sha u yan ican a mbamtaver shi wan ishima.
11 Nenge! Se nenge ser saan mba ve taver ishima la iyol.* Ne ungwa kwagh u ishimataver i Yobu, shi ne nenge er Yehova* yange va ver un ken masejime doo doo yô; ne nenge er Yehova* a eren a vese kundu kundu* shi a zungwen se mhôônom yô.
12 Kwagh u hemban cii yô, anmgbianev av, de nen u bumun, a̱ lu sha, shin a̱ lu tar, shin nyityô kwagh igen cii kpa, de bumun nen ga. Kpa zum u ne kaa ner ‘Een’ yô, i̱ lu een heregh, shi ‘Ei’ wen kpa a̱ lu ei heregh, sha er ne hingir mba a ôr ne ijir ga yô.
13 Ma or ngu ken a ven u nan lu yan ican yôô? Yô nana̱ eren msen. Ma or ngu u i saan nan iyol yôô? Yô nana̱ wa upasalami.
14 Ma or ngu ken a ven u nan lu uange yôô? Yô nana̱ yila mbatamen mba tiônnongo ve̱ va hen a nan, ve̱ er nan msen, ve̱ shighe nan mkurem ken iti i Yehova.*
15 Nahan msen u i er sha jighjigh u nan la una bee oruange la angev, shi Yehova* una mough a nan sha. Shi aluer nan er asorabo kpa, a de nan a.
16 Sha nahan yô, pasen nen hanmô wen asorabo a en gbar gbar, shi eren nen msen sha ci u hanmô wen, sha er a bee ne angev yô. Msen u orperapera ngu a tahav tsung.*
17 Eliya lu orumace er se nahan, kpa zum u a er msen sha gbashima ér ura u̱ de nôôn ga la, ura kera nôô ken tar la ga anyom atar man iwer ataratar.
18 Tsô shi a hide a er msen, maa abeen haa ura, nahan iyiav ume ken tar la.
19 Anmgbianev av, aluer or na ma or ken a ven undu mimi, man anmgbian ugen hide a nan yô,
20 fa nen ner, or u nan wase orsholibo la u undun gbenda u nan u bo la cii, nana yima or* shon ken ku, shi nana cir asorabo kpishi.
Ngeren mba shin kpe
^ Nenge Ngeren u Pasen Asember.
^ Shin “toghor nen iyol; gbe nen ijir,” Zwa Grika, “shirin nen asema.”
^ Zwa Grika, “tile.”
^ Nenge Ngeren u Pasen Asember.
^ Shin “mba ve taver ishima la mba a iveren.”
^ Nenge Ngeren u Pasen Asember.
^ Nenge Ngeren u Pasen Asember.
^ Shin “mhôônom ma kôron Yehova a vese tsung.”
^ Nenge Ngeren u Pasen Asember.
^ Nenge Ngeren u Pasen Asember.
^ Zwa Grika, “ka a lu a tahav tsung zum u a lu eren tom yô.”
^ Shin “uma u or.”
