Yohane 14:1-31
14 “Ishima i de nyian ne ga. Na nen Aôndo jighjigh; mo kpa nam nen jighjigh.
2 Ayou nga ken ya u Terem kpishi. A lu nahan ga yô, ma m ôr ne, gadia m ngu yemen me za sôr ne ijiir.
3 Shi aluer m yem m za sôr ne ijiir yô, me hide me va yem a ven hen ape m lu la, sha er ape m lu la ne kpa ne lu her yô.
4 Man ape m lu yemen la kpa ne fa gbenda.”
5 Toma gema kaa a na ér: “Tere, se fa ape u lu yemen ga. Nahan a er nan ve se fa gbenda?”
6 Yesu gema kaa a na ér: “Mo m ngu gbenda man mimi man uma. Or môm nana gba van hen Ter ga, saa nana kar her a mo.
7 Aluer ne fam yô, Terem kpa ne fa un; hii hegen je, ne fa un, man jim je yô, ne nenge a na kera kpaa.”
8 Filibu kaa a na ér: “Tere, tese se Teru, tsô a kuma se.”
9 Yesu kaa a na ér: “Er m lu vea ven imôngo shighe gôgônan nahan kpa, Filibu, u fam gaa? Or u nan nenge a mo yô, nan nenge a Ter kpaa. Man er nan u kaa wer, ‘Tese se Tere’?
10 U na jighjigh wer m ngu ken mzough vea Ter, shi Ter kpa ngu ken mzough vea mo gaa? Akaa a m ôron ne ne, m gbe ôron sha mnenge wam ga, kpa Ter u a lu ken mzough vea mo la ngu eren ityom na.
11 Nam nen jighjigh ner m ngu ken mzough vea Ter, shi Ter kpa ngu ken mzough vea mo; gayô, na nen jighjigh sha ci u ityom la.
12 Mimi mimi je* me kaa ne, hanma or u nan nem jighjigh yô, nan kpa nana er ityom i m eren ne; shi nana er ityom i hemban ingin, sha ci u m ngu yemen hen Ter.
13 Shi nyityôkwagh i ne sen ken iti yam cii, me er, sha er Ter una zua a icivir sha Wan yô.
14 Aluer ne sôn ma kwagh ken iti yam yô, me er un.
15 “Aluer m doo ne ishima yô, ne kuran atindi a am.
16 Shi me sôn Ter, nahan una na ne orwasen* ugen, u una lu vea ven gbem sha won yô,
17 ka jijingi u mimi, u tar ua fatyô u ngohol ga yô, sha ci u ngu nengen a na ga, shi u fa un ga. Ne yô ne fa un, sha ci u ngu vea ven her, shi ngu ken a ven kpaa.
18 Me undu ne côghol ga.* M ngu hiden hen a ven.
19 Ica a gba ga tsô tar ua kera nenge a mo ga, kpa ne yô ne nenge a mo, sha ci u m ngu uma, nahan ne kpa ne lu uma.
20 Sha iyange la ne fa er m lu ken mzough vea Terem, man er ne lu ken mzough vea mo shi mo kpa m lu ken mzough vea ven yô.
21 Hanma or u nana ngohol atindi a am shi nana kuran a yô, ka nan je m doo nan ishima ye. Man hanma or u m doo nan ishima yô, Terem kpaa nana doo un ishima, shi mo kpa nana doom ishima, shi me pase iyol yam hen a nan wang.”
22 Tsô Yuda (kpa ka u Isekarioti la ga) pine un ér: “Tere, er nan ve u soo u pasen iyol you wang hen a vese, i lu tar ga?”
23 Yesu gema kaa a na ér: “Aluer m doo or ishima yô, nana wa kwaghôron wam ikyo, shi nana doo Terem ishima, nahan se va hen a nan se va tema ya* vea nan.
24 Kpa or u m doo nan ishima ga yô, nan we kwaghôron wam ikyo ga. Kwaghôron u ne lu ungwan ne ka u wam ga, kpa ka u Ter u a tindim la.
25 “M ôr ne akaa ne, er m lu vea ven her ne.
26 Kpa orwasen u Ter una tindi ken iti yam la, ka icighan jijingi je la, una tese ne akaa cii, shi una umbur ne akaa a m ôr ne cii.
27 M ngu undun ne a bem; m ngu nan ne bem wam. Kpa m ngu nan ne un er tar u ne un la ga. Ishima i de ze ne iyol ga, shi de cian hiden nen ijime ga.
28 Ne ungwa er m kaa a ven mer, ‘M ngu yemen kpa me hide hen a ven’ yô. Aluer m doo ne ishima yô, ne ember er m lu yemen hen Ter yô, gadia Ter hembam.
29 Nahan m ngu ôron ne hegen er kwagh ne a lu a er ga ne, sha er ne na jighjigh zum u una er yô.
30 Me kera ôr ne akaa kpishi ga, gadia tor u tar ne ngu van, man ngu a kwagh u eren mo ga.*
31 Kpa m ngu eren kwagh u Ter a kaam la vough, sha u tar u fa er Ter a doom ishima yô. Mough nen se yem nen heen kera.
Ngeren mba shin kpe
^ Zwa Grika, “Amen, Amen.” Nenge Ngeren u Pasen Asember.
^ Shin “orsurunshima.”
^ Shin “me kende ne ga.”
^ Shin “se va lu.”
^ Shin “ngu a tahav sha a mo ga.”
