Yohane 15:1-27
15 “Mo m ngu kon u wain u mimi, Terem ka orkahan.
2 Hanma gbaa wam u a umen atam ga cii, ka a gber un kera. Ngu a sôr hanma gbaa u a umen atam cii, sha er una hemba umen atam yô.
3 Hegen je kpa ne mba wang sha ci u mkaanem ma m vande ôron ne la.
4 Lu nen ken mzough vea mo her, nahan me lu ken mzough vea ven her. Er gbaa tseegh a fetyô u umen atam ga, saa ka a lu sha kon u wain nahan, kape ne kpa ne fatyô u umen atam ga, saa ne lu ken mzough vea mo je la.
5 Mo m ngu kon u wain; ne mba agbaa. Hanma or u nan ze hemen u lun ken mzough vea mo shi m lu ken mzough vea nan cii yô, nana ume atam kpishi. Gadia a mo shio yô, mayange ne fatyô u eren ma kwagh ga.
6 Kpa hanma or u nan ze hemen u lun ken mzough vea mo ga cii yô, ka i gbihi nan kera er gbaakon nahan, nan uma. Shi ior ka ve kura agbaa a ikyon la ve haa ken usu, a hia kera.
7 Aluer ne za hemen u lun ken mzough vea mo, shi akaaôron a am za hemen u lun ken aven yô, sôn nen hanma kwagh u ne soo cii, a na ne un.
8 Terem ngu zuan a icivir, er ne ze hemen u umen atam kpishi shi tesen ner ne mba mbahenen av yô.
9 Er m doo Ter ishima nahan, kape ne kpa ne doom ishima vough je la; yô, eren nen akaa a ne za hemen u doon mo ishima yô.
10 Aluer ne mba kuran atindi a am yô, ne za hemen u doon mo ishima, vough er mo kpa m kuran atindi a Ter ve m ze hemen u doon un ishima nahan.
11 “M ôr ne akaa ne, sha er ne lu a msaanyol u mo kpa m lu a mi la, man msaanyol wen la una iv kpaa yô.
12 Ka tindi u m lu wan ne je ne, mer doo nen ayol a en, vough er ne doom ishima nahan.
13 Or môm ngu a dooshima u a hembe u or nan uma u nan sha ci u azende a nan la ga.
14 Aluer ne mba eren kwagh u m lu wan ne tindi sha mi ne yô, ne lu azende a am.
15 M kera yila ne mer ikpan ga, sha ci u kpan fe kwagh u orvesen na a eren ga. Kpa m yila ne mer azende, sha ci u m ôr ne akaa a m ongo hen Terem la cii.
16 Ka ne ne tsoughom ga, kpa ka mo m tsough ne ye; man m ver ne mer za nen hemen u umen atam, shi atam a en la a lu her, sha er hanma kwagh u ne sôn Ter ken iti yam cii, una na ne yô.
17 “M wa ne tindi sha akaa ne, mer doo nen ayol a en.
18 Aluer tar ne kôr ne ihyom yô, fa nen ner, u vande kôron mo ihyom cii ve u ker ne ihyom ye.
19 Nea lu ior i tar ne yô, ma ne doo tar ishima sha ci u ne mba kwagh u u. Kpa er ne lu ior i tar ne ga, mo m gem m tsough ne shin tar kera yô, tar kôr ne ihyom sha ityôkyaa la.
20 Umbur nen kwagh u m ôr ne la: Kpan hembe orvesen na ga. Aluer ve tôvom a ican yô, ne kpa vea tôv ne a ican; aluer ve wa kwaghôron wam ikyo yô, u wen kpa vea wa un ikyo.
21 Kpa akaa ne cii vea er ne sha ci u iti yam, sha ci u ve fa Un u a tindim la ga.
22 Mea ve, mea va lam a ve ga yô, ma ve lu a isholibo ga. Kpa hegen mba a ishô sha isholibo ve la ga.
23 Or u nan kerem ihyom yô, Terem kpa nan kôr un ihyom.
24 Mea er ityom i or môm nan vande eren ga la hen ve ga yô, ma ve lu a isholibo ga; kpa hegen ve nenge a mo shi ve kôrom ihyom kua Terem kpaa.
25 Kpa kwagh ne er sha u kuren kwagh u i nger ken Atindi* a ve la, ér: ‘Ve kôrom ihyom a ityôkyaa shio.’
26 Kpa orwasen u me yem hen Ter me za tindi la, ka jijingi u mimi u a dugh hen Ter je la, zum u una va yô, una er shiada sha kwagh wam;
27 man ne kpaa, a gba u ne er shiada, sha ci u ne mba vea mo sha mhii je.
Ngeren mba shin kpe
^ Ikyav tese ér ka Ruamabera u ken Zwa Heberu la jimin cii.
