Yohane 21:1-25
21 Ken masejime yô, Yesu shi va ande hen mbahenen hen Zegemnger u Tiberia. Ka gbenda u yange ande hen a ve je ne.
2 Shimon Peteru man Toma (u i yilan ér Ahina* la), man Nataniel u due ken Kana u Galilia la, kua ônov mba Sebedeu, man mbahenen nav mbagenev uhar cii ve lu imôngo.
3 Tsô Shimon Peteru kaa a ve ér: “Me za kôr ishu.” Ve kaa a na ér: “Se za vea we imôngo.” Tsô ve due ve za nyôr tso. Kpa hen tugh mbula cii ve kôr ma kwagh ga.
4 Nahan kpa, sev mbu ngur aven yô, Yesu va tile hen kpemnger, kpa mbahenen nav kav er lu Yesu ga.
5 Tsô Yesu pine ve ér: “Mbayev, ne mba a kwagh u ne ya* je kpa?” Ve kaa ér: “Ei!”
6 A kaa a ve ér: “Haa nen kper vegher u tsoo u ken yan la, tsô ne zua a kwagh.” Maa ve haa, kpa ve fatyô u urugh duen a mi ga, sha ci u ishu iv ker kpishi.
7 Tsô orhenen u yange doo Yesu ishima la kaa a Peteru ér: “Ka Ter!” Shimon Peteru ongo ér ka Ter yô, a haa ikyondo na iyol,* gadia lu a ikyondo iyol ga,* maa a guusu shin zegemnger.
8 Kpa mbahenen mbagenev mbara va shin antso u cuku, ve gba kpelan kper u iv a ishu la duen a mi, gadia ve lu ikyua a kpetar, er angahar 300* nahan tseegh.
9 Mba dugh sha tar yô, ve nenge a aka a usu a yeghen her, ishu lu sha mi, shi ve nenge a beredi.
10 Yesu kaa a ve ér: “Pande nen ishu i ne ker hegen la, va nen a mi.”
11 Tsô Shimon Peteru za hungwa shin tso la kpela kper la due a mi sha tar, a ishu i vesen ker poo, i kuma 153. Shin er i ngee kpishi nahan kpa, kper la ande ga.
12 Yesu kaa a ve ér: “Va ya nen kwaghyan u pepe.” Kpa ma orhenen môm cihi pine un ér: “Ka we ana?” ga, sha ci u ve fa er lu Ter yô.
13 Tsô Yesu va tôô beredi la na ve, shi ishu la kpa a er nahan.
14 Ka kwa u sha utar u Yesu ande hen mbahenen nav shighe u i nder un shin ku je ne.
15 Mba ye kwaghyan u pepe la kera yô, Yesu pine Shimon Peteru ér: “Shimon wan u Yohane, m hemba doon we ishima a akaa nee?” A kaa a na ér: “Een, Tere, u fa er u doom ishima yô.” A kaa a na ér: “Koson iyôngo yam.”
16 Shi a pine un sha kwa har ér: “Shimon wan u Yohane, m doo u ishimaa?” A kaa ér: “Een, Tere, u fa er u doom ishima yô.” A kaa a na ér: “Kuran mo anyôngov.”
17 Shi a pine un sha kwa tar ér: “Shimon wan u Yohane, m doo u ishimaa?” Tsô ishima vihi Peteru er shi a pine un sha kwa tar ér: “M doo u ishimaa?” yô. Nahan a kaa a na ér: “Tere, u fa akaa cii; u fa er u doom ishima yô.” Yesu kaa a na ér: “Koson mo anyôngov.
18 Mimi mimi je* me kaa u, shighe u u lu iyev la, u huan ikyondo iyol you shi u zenden u zaan ape u soo cii. Kpa u va bee iyol yô, u kende ave ou sha, orgen nana hua u ikyondo shi nana tôô u nana za a we ape u soo ga yô.”
19 A ôr kwagh ne sha u tesen inja ku i Peteru una va kpe ve Aôndo una zua a icivir la. Er kwagh ne yô, a kaa a na ér: “Za hemen u dondon mo.”
20 Peteru gem yô, a nenge orhenen u doo Yesu ishima la dondo ve ijime, ka u yange lu hen kwaghyan u aikighe, shi yier un sha vanger, pine un ér: “Tere, ka an nan lu teen we?” la.
21 Nahan Peteru nengen a na yô, a pine Yesu ér: “Tere, or ne di ye?”
22 Yesu kaa a na ér: “Aluer ka ishima yam u a lu uma zan zan me kar van yô, ka nyi you sha kwagh la? We za hemen u dondon mo tsô.”
23 Nahan anmgbianev gba ôron ker ayol a ve ér orhenen ne una kpe ga. Nahan kpa, Yesu lu kaan a na ér ka u ngula una kpe ga ze, kpa kaa di tsô ér: “Aluer ka ishima yam u a lu uma her zan zan me kar van yô, ka nyi you sha kwagh la?”
24 Ka orhenen shon ne je a lu eren shiada sha akaa ne ye. Shi ka un kpa a nger akaa ne ye, man se fa shiada na ka u mimi.
25 Jighilii yô, akaa agen kpa nga kpishi a Yesu yange er yô. Luun er i nger a cica cii vighe vighe yô, beem er uihyurenruamabera mbara ma ve nger je ma ve nenger* tar yô.
Ngeren mba shin kpe
^ Zwa Grika, “Didimu.”
^ Shin “ishu i ne ya.”
^ Shin “a fiir ikyondo.”
^ Shin “lu vanger gbilin.”
^ Er umita 90 nahan. Zwa Grika, “er aseva 200 nahan.”
^ Zwa Grika, “Amen, Amen.” Nenge Ngeren u Pasen Asember.
^ Shin “gande.”
