Yohane 3:1-36
3 Orfarishi ugen lu, i yilan un ér Nikodemu. Lu môm ken mbahemenev mba Mbayuda.
2 Or ne za va hen a na tugh, va kaa a na ér: “Rabi, se fa, u ngu ortesen u Aôndo a tindi yô, sha ci u or môm nana gba eren uivande mban ga, saa Aôndo una lu a nan.”
3 Yesu gema kaa a na ér: “Mimi mimi je* me kaa u, or môm nana fatyô u nengen a Tartor u Aôndo ga, saa a hide a mar nan.”*
4 Nahan Nikodemu pine un ér: “Organden nahan, a er nan ve shi a hide a mar nana? Nana fatyô u nyôron ngô u nan ken uya̱ ér i hide i mar nanaa?”
5 Yesu gema kaa ér: “Mimi mimi je me kaa u, saa a mar or sha mnger man sha jijingi, gayô nana nyôr ken Tartor u Aôndo ga.
6 Kwagh u i lu iyol i inyam man awambe i mar yô, ka iyol je a lu ye, shi kwagh u i mar un sha jijingi yô, ka jijingi je a lu ye.
7 Kwagh u m kaa a we mer, gba keng u a hide a mar ne la, a de kpiligh we iyol ga.
8 Ahumbe ka aa karen yô, a yemen ape a soo la. Ka u ungwa ihyuran i a, kpa u fa ape a mough, man ape a lu yemen ga. Kape kwagh u or u i mar nan sha jijingi kpa a lu je la.”
9 Nikodemu gema kaa a na ér: “A er nan man akaa ne aa ere?”
10 Yesu gema kaa ér: “U ngu ortesen ken Iserael, man u fa akaa ne gaa?
11 Mimi mimi je me kaa u, ka kwagh u se fe la se lu ôron ye, shi ka kwagh u se nenge la se lu eren shiada sha mi ye, kpa ne mba lumun a shiada wase la ga.
12 Aluer m ôr ne akaa a shin tar ne je kpa ne na jighjigh ga yô, a er nan me ôr ne akaa a sha la ve ne na jighjigh?
13 Bee kera yô, i lu je or môm nan ngu a kôndo nan yem sha ga, saa un u a sen sha la, ka Wan u or je la.
14 Shi er Mose yange kende a iyô sha ken taaikyôngo nahan, kape Wan u or kpa i gbe u a kende a na sha je la;
15 sha er hanma or u nan ne un jighjigh yô, nana zua a uma u tsôron yô.
16 “Gadia tar ne doo Aôndo ishima kpishi je yô, a na Wan na u môm môm la, sha u hanma or u nan ne un jighjigh cii nana̱ de timin ga, kpa nana̱ zua a uma u tsôron.
17 Gadia Aôndo tindi wan na shin tar ka sha u a̱ va ôr tar ijir ga, kpa ka sha u a̱ va yima tar.
18 Or u nan ne un jighjigh cii yô, ka u a ôr nan ijir ga. Kpa or u nan ne jighjigh ga cii yô, i ôr nan ijir kera je ve, sha ci u nan na iti i Wan u Aôndo u môm môm la jighjigh ga.
19 Man ka kwagh u i lu ôron ior ijir sha mi je ne, ér: iwanger va shin tar, kpa ior hemba soon ime a iwanger, sha ci u aeren a ve ka a ifer.
20 Gadia or u nan eren aferakaa yô, nan kôr iwanger ihyom, nahan nan ve ken iwanger ga, sha er aeren a nan aa due ken igbar* ga yô.
21 Kpa or u nan eren kwagh u mimi yô, nan ve ken iwanger, sha er aeren a nan aa due ken igbar, er nan lu eren a sha ishima i Aôndo yô.”
22 Tsô Yesu mough vea mbahenen nav ve yem ken agar a kiriki a ken Yudia, za lu ker vea ve shighe wa karen, lu eren ior batisema.
23 Yohane kpa lu eren ior batisema hen Inon, ikyua a Salim, sha ci u zege ityungumnger lu her, nahan ior lu van her i lu va eren ve batisema;
24 shighe ne i lu a wuhe Yohane ken purusu ga.
25 Tsô ayôôso gba her atô u mbahenen mba Yohane man Oryuda ugen sha kwagh u or a er ve nana lu wang la.
26 Shighe kar yô, ve va ôr a Yohane ér: “Rabi, or u yange lu vea we yande Yordan la, u ú er shiada sha kwagh na la, ngu eren ior batisema, nahan ior cii mba zan hen a na.”
27 Yohane gema kaa ér: “Or a fatyô u zuan a ma kwagh ga, saa Aôndo una na nan.
28 Ne ayol a en ne mba eren mo shiada ner, yange m kaa mer, ‘Ka mo m lu Kristu ga, kpa i tindim m ngu zan un sha hemen.’
29 Or u nan lu a kwasehe la, ka nan je nan lu orkwasehe ye. Kpa or u nan lu ijende i orkwasehe la ka nana tile nana ungwan iliam na yô, i saan nan iyol tsung sha ci u nan ungwa ikyenge i orkwasehe. Nahan m iv a msaanyol.
30 Un ka u una seer a seer, kpa mo yô, ka u me panden a pande.”
31 U a dugh sha la hemba mbagenev cii. U a dugh shin tar la ka or u shin tar ne, shi ôron akaa a shin tar. U a dugh sha la hemba mbagenev cii.
32 Ngu eren shiada sha akaa a a nenge shi a ongo yô, kpa or môm ngu lumun a shiada na la ga.
33 Or u nan lumun a shiada na cii yô, nan fa dedoo ér Aôndo ka u mimi.
34 Gadia un u Aôndo a tindi la ngu ôron akaaôron a Aôndo, sha ci u Aôndo ne jijingi na a iyoltangen shio.*
35 Wan doo Ter ishima, nahan a gema akaa cii a wa un sha ikyev.
36 Or u nan ne Wan jighjigh yô, nana zua a uma u tsôron; or u nan lu hemban Wan ato yô, nana nenge a uma ashe ga, kpa iyugh i Aôndo ngi sha a nan.
Ngeren mba shin kpe
^ Zwa Grika, “Amen, Amen.” Nenge Ngeren u Pasen Asember.
^ Shin a fatyô u kaan ér, “a mar nan sha.”
^ Shin “sha er a pon aeren a nan.”
^ Shin “ne jijingi na akor akor ga.”
