Yohane 4:1-54
4 Tsô Mbafarishi ungwa ér Yesu ngu geman ior hingir mbahenen shi eren ior batisema hemban Yohane. Yesu* va fa kwagh ne—
2 kpa Yesu iyol na lu eren ior batisema ga, lu mbahenen nav—
3 tsô a mough ken Yudia, a hide shi a yem ken Galilia.
4 Kpa gba keng u una kar gbenda ken Samaria.
5 Tsô a va ar hen gar ugen ken Samaria, i yilan ér Shikar, ikyua a ijiir i Yakob yange na wan na Yosev yô.
6 Ijôr i Yakob gema lu her. Hen shighe ne Yesu zende vôr, nahan a tema hen ijôr shon. Lu er ahwa 12* atetan nahan.
7 Kwase ugen ken Samaria za va u va kesen mngerem. Yesu maa kaa a na ér: “Nam mngerem m ma.”
8 (Sha ci u mbahenen nav yem ken gar u za yamen kwaghyan.)
9 Nahan Kwasesamaria la pine un ér: “Er nan we Oryuda u lu sônon mo u m lu Kwasesamaria ne mngereme?” (Gadia Mbayuda mba zough kwagh vea Mbasamaria ga.)
10 Yesu gema kaa a na ér: “Wea fe iyua i Aôndo man or u a kaa a we ér, ‘Nam mngerem m ma’ ne yô, ma u sôn un, nahan ma a ne u mngerem ma uma.”
11 Kwase la kaa ér: “Orvesen, bokoti u tsuen mngerem kpa u ngu a mi ga, man ijôr ne za. Nahan ka han u fatyô u zuan a mngerem ma uma mara nan mo?
12 U hemba ter wase u tamen Yakob u yange na se ijôr, i un vea ônov nav kua ilev nav maan ne ga, shin u hemba unu?”
13 Yesu gema kaa a na ér: “Hanma or u nan me mngerem man cii imura ia hide a kôr nan.
14 Or u nana ma mngerem ma me na nan mara yô, imura ia kôr nan mayange ga, kpa mngerem ma me na nan mara ma a hingir ken a nan er hwembe nahan, ma a lu sagher ken a nan sha u nan uma u tsôron.”
15 Kwase la maa kaa a na ér: “Orvesen, nam mngerem mara, sha er imura ia kera kôrom ga, shi me zer van heen va kesen mngerem ga yô.”
16 A kaa a na ér: “Za yila nomou, va nen heen.”
17 Kwase la gema kaa ér: “M ngu a nom ga.” Yesu kaa a na ér: “Ka mimi u ôr ye, er u kaa wer, ‘M ngu a nom ga’ yô.
18 Gadia u vande eren noov utaan kera, shi or u u lu vea na hegen ne kpa ka nomou ga. Nahan ka mimi je u ôr ye.”
19 Kwase la kaa a na ér: “Orvesen, a̱ shi nan kpa u ngu profeti.
20 Uter asev mba tsev yange ve civir Aôndo sha uwo ne, kpa ne yô ka ne kaa ner ijiir i i gbe u ior vea civir Aôndo her la ka ken Yerusalem i lu ye.”
21 Yesu kaa a na ér: “Kwase, me ôr u sha mimi, shighe ngu van u ne civir Ter sha uwo ne ga, shin ken Yerusalem kpaa ga yô.
22 Ne mba civir kwagh u ne fe un ga yô; kpa se yô, se mba civir kwagh u se fe un yô, sha ci u Mbayuda vea hii zuan a myom.
23 Nahan kpa, shighe ngu van, man ka shighe shon je ne, u mba ve civir Aôndo sha mimi la vea civir Ter ken jijingi kua ken mimi yô, sha ci u, jighilii yô, Ter ngu keren ambaaior la ér a civir un.
24 Aôndo ka jijingi, nahan mba ve civir un cii gba keng u vea civir un ken jijingi* man sha mimi kpaa.”
25 Kwase la kaa a na ér: “M fa, Mesiya ngu van, un u i yer ér Kristu la. Zum u una va yô, una pase se hanma kwagh ken igbar.”
26 Yesu maa kaa a na ér: “Ka mo un shon je m lu lamen a we ne.”
27 Lu hen shighe ne je mbahenen nav za hide ye, nahan kpiligh ve iyol er a lu lamen a kwase yô. Kpa ma or pine un ér, “Ka nyi u kerene?” shin “Er nan u lamen a kwase laa?” ga.
28 Tsô kwase la undu ityegh ki mngerev nagh her, yem ken gar za kaa a ior ér:
29 “Va nenge nen or u a ôrom akaa a m er ken uma wam cii ne. Alaghga tsô ka Kristu shon ne ga zee?”
30 Tsô ve due ken gar, ve gba van hen a na.
31 Mbahenen di lu ôron a na ér: “Rabi, ya kwagh.”
32 Kpa a kaa a ve ér: “M ngu a kwaghyan u ne fe kwagh sha mi ga yô.”
33 Mbahenen gema pine ayol a ve ér: “Ka an nan va ne un kwagh a ye di-o?”
34 Yesu kaa a ve ér: “Kwaghyan wam ka u eren ishima i un u a tindim la, shi eren tom na kuren.
35 Ne mba kaan ner, shi iwer i nyiin tsô sunda ua kuma gaa? Nenge! Me kaa ne: Kende nen ashe sha nenge nen ishule, i via kuma u sundan. Hegen je
36 orsundan ngu ngohol injar shi kohol atam sha ci u uma u tsôron, sha er ortanivor man orsundan cii vea ember imôngo yô.
37 Sha nahan yô, kwaghôron ne ka u mimi, ér: Or u môm ka ortanivor, ugen di ka orsundan.
38 M tindi ne mer za sunda nen kwagh u ne er tom sha mi ga yô. Mbagenev er tom, nahan ne kpa ne zua a mtsera u tom ve la.”
39 Tsô Mbasamaria kpishi ken gar la na un jighjigh sha ci u mkaanem ma kwase u er shiada kaa ér: “A ôrom akaa a m er ken uma wam cii” la.
40 Zum u Mbasamaria mbara va hen a na yô, ve kaa a na ér a lu vea ve, nahan a tsa her ayange ahar.
41 Kwagh ne na yô, mbagenev kpishi kpa na jighjigh sha ci u kwagh u ôr la.
42 Nahan ve kaa a kwase la ér: “Kera ka sha ci u kwagh u u ôr se la tseegh se ne jighjigh ga; gadia se ungwa sha ato ase, nahan se fa er or ne a lu oryiman u tar mimi yô.”
43 Ayange a ahar la nga karen yô, a mough her a yem ken Galilia.
44 Kpa Yesu iyol na er shiada ér profeti lu a icivir hen tar na ga.
45 Nahan za nyer ken Galilia yô, ior mba ker ngohol un sha ci u ve nenge akaa a a er ken Yerusalem hen shighe u iniongo la, sha ci u ve kpa ve za iniongo shon.
46 Tsô shi a va ken Kana u Galilia, ape yange gema mngerem hingir wain la. Nahan orgen lu ken Kapenaum, u eren tom hen ya u tor yô; wan na gba angev.
47 Zum u or ne ungwa ér Yesu mough ken Yudia va ken Galilia yô, a za hen a na, a za kaa a na ér a va hen ya na, a va bee wan na angev, sha ci u wan shon lu nôngon ku.
48 Kpa Yesu kaa a na ér: “Ka nea nenge uivande man akaa a kpilighyol ga yô, mayange ne mba ne jighjigh ga.”
49 Or u eren tom hen ya u tor la kaa a na ér: “Tere, ma u ve hen ya wam, er wan wam a lu a kpe ga ne.”
50 Yesu kaa a na ér: “Gba yemen tsô, wan wou ngu uma.” Or la na kwagh u Yesu ôr a na ne jighjigh, maa a yem.
51 Kpa er lu yemen sha gbenda la je, ikpan na igen va zua a na, kaa a na ér wan na la ngu uma.*
52 Tsô a pine ve shighe u a zough a guda yô. Ve kaa a na ér: “Nyen fiva na la bee er ihwa i môm atetan* nahan.”
53 Ter na la maa fa er lu shighe shon u Yesu kaa a na ér: “Wan wou ngu uma” la yô. Nahan un vea mba hen ya na cii ve na jighjigh.
54 Lu ivande i sha uhar i Yesu er shighe u mough ken Yudia va ken Galilia je ne.
Ngeren mba shin kpe
^ Zwa Grika, “Ter.”
^ Zwa Grika, “er ihwa i sha ataratar nahan.” Yange i hii u ôron ahwa ne pepe shighe u iyange ka i hii u duen la.
^ Shin “er jijingi a tese la.”
^ Shin “wan na la zua a guda.”
^ Zwa Grika, “er ihwa i sha utaankaruhar nahan.”
