Yohane 7:1-52
7 Ken masejime yô, Yesu hide lu zenden ken Galilia her, kera soo u zenden ken Yudia ga sha ci u Mbayuda lu keren u wuan un.
2 Hen shighe ne, Iniongo i Utabernakel* i Mbayuda lu zurum.
3 Nahan anmgbianev nav kaa a na ér: “Mough yem ken Yudia, sha er mbahenen ou kpa vea nenge ityom i u lu eren la yô.
4 Gadia or ka nana keren ér ior ve fa nan yô, nan eren ma kwagh ken myer ga. Aluer u ngu eren akaa ne yô, tese iyol you tar u nenge.”
5 Jighilii yô, anmgbianev nav kpa na un jighjigh ga.
6 Nahan Yesu kaa a ve ér: “Shighe wam ngu a kuma ga, kpa ne yô, ne fatyô u eren nahan hanma shighe cii.
7 Tar ngu a ityôkyaa i kôron ne ihyom ga, kpa mo yô, u kôrom ihyom, sha ci u m ngu eren shiada sha kwagh u ú mer ngu eren aferakaa.
8 Gba zan nen iniongo la tsô; mo m ngu zan iniongo ne hegen ga, sha ci u shighe wam ngu a kuma vough ga.”
9 A ôr ve akaa ne cii a bee, kpa a hide a lu ken Galilia her.
10 Kpa anmgbianev nav mba yemen iniongo la kera cii yô, un kpa mough za, kpa lu ken igbar ga, lu myer.
11 Tsô Mbayuda gba za keren un hen iniongo shon, pinen ér: “Ka han or la a lu?”
12 Ior kpishi lu ôron kwagh na ivarvase. Mbagenev lu kaan ér: “Ka or u dedoo.” Mbagen di lu kaan ér: “Ka or u dedoo ga, ngu tsumen a tsume a ikpelaior.”
13 Nahan kpa, or môm ôr kwagh na ken igbar ga, sha ci u ve lu cian Mbayuda.
14 Ayange a iniongo la nga gbe ken atô yô, Yesu nyôr ken tempel gba tesen ior.
15 Nahan kpiligh Mbayuda iyol, ve gba kaan ér: “Or ne zua a mfe u Ruamabera* ne hana? Man yô makeranta* kpa a za ga.
16 Yesu gema kaa a ve ér: “Ityesen i m tesen la ka i yam ga, kpa ka i un u a tindim la.
17 Aluer sar ma or u eren ishima Na yô, naná fa aluer ityesen ne due ka hen Aôndo, shin m ngu ôron akaa ne ka sha mnenge wam yô.
18 Or u nan ôron kwagh sha mnenge u nan yô, nan ngu keren ka icivir i nan; kpa or u nan keren ér icivir i lu i un u a tindi nan la yô, nan ngu or u mimi, iferkwagh ngi ken a nan ga.
19 Mose yange na ne Atindi, shin ka nahan ga? Kpa or wen môm nan kor Atindi la ga. Er nan ne lu keren u wuan mo?”
20 Ikpelaior la gema kaa ér: “U ngu a jijingi u bo. Ka an nan lu keren u wuan we?”
21 Yesu gema kaa a ve ér: “Yange m er ivande i môm tseegh, kpa ne cii ka kpiligh ne iyol.
22 Lu sha ityôkyaa ne Mose na ne tindi ér ne tsôngon ye—kpa u ngu wer tindi ne due hen Mose ga, kpa ka hen uter enev mba tsev—man ka ne tsôngo or sha Iyange i Memen je kpaa.
23 Nahan aluer sha Iyange i Memen kpa ka ne tsôngo or sha er ne per Atindi a Mose la ga yô, ne mba vihin ishima a mo kpishi ner m bee or angev sha Iyange i Memenee?
24 De nen u ôron ijir sha kwagh u ne nenge sha ashe la, kpa ôron nen ijir sha perapera.”
25 Tsô ior mba ken Yerusalem mbagenev gba kaan ér: “Ka or u i lu keren ér a wua ne gaa?
26 Man nenge! ngu lamen ken igbar, kpa or ngu bughun zwa a na ga. Mbahemenev va mase kaven ér mimi je ka Kristu je ne shinii?
27 Nahan kpa, se fa ape or ne a dugh yô; kpa Kristu yô, zum u una va la, or môm nana fa ape a dugh ga.”
28 Tsô er Yesu lu tesen ken tempel la, a ôr genger genger ér: “Ne fam shi ne fa ape m dugh yô. Man m gba karen a ishima yam van ga; Un u a tindim la ngu kpôô kpôô, kpa ne fa un ga.
29 Mo m fa un, sha ci u ka hen a na m dugh ye, shi ka Un a tindim kpaa ye.”
30 Tsô ve gba nôngon ér vea kôr un, kpa or môm bende un uwegh iyol ga, sha ci u shighe* na lu a kuma ga.
31 Nahan cii kpa, ior kpishi ken ikpelaior la na un jighjigh, ve lu kaan ér: “Zum u Kristu una va yô, una er uivande a hemba mba or ne a lu eren ne ga, shin una ere?”
32 Mbafarishi ungwa er ikpelaior lu hunan un sha akaa ne yô, nahan upristi mba tamen man Mbafarishi tindi mbakuran ér ve za kôr un.
33 Yesu maa kaa ér: “Me lu a ven anshighe kpuaa, maa me hide me yem hen Un u a tindim la.
34 Ne kerem kpa ne zua a mo ga, man ape m lu la ne fatyô u van her ga.”
35 Nahan Mbayuda gba kaan ker ayol a ve ér: “Ka han or ne a we ishima u zan ve a kaa ér se nenge a na ga? A wa ishima u zan hen Mbayuda mba i sambe ve ken Mbagrika la, sha u za tesen Mbagrika shinii?
36 Kwagh u a kaa ér, ‘Ne kerem kpa ne zua a mo ga, man ape m lu la ne fatyô u van her ga’ la, inja na ér nyi?”
37 Sha iyange i masetyô, i i lu iyange i vesen i iniongo shon la, Yesu mough tile sha, ôr genger genger ér: “Aluer imura ia kôr or yô, nana va hen a mo, nana va ma mngerem.
38 Or u nan nem jighjigh yô, ka vough er Ruamabera a kaa nahan: ‘Uifi mba mngerem ma nan or uma vea lu duen ken atô u nan kuan.’”
39 Nahan kpa, lu ôron kwagh u jijingi, u lu u ica a gba ga tsô mba ve ne un jighjigh la vea ngohol yô; gadia shighe ne i lu a na ve jijingi shon ga, sha ci u i lu a ver Yesu sha ian na i icivirigh la ga.
40 Mbagenev ken ikpelaior la mba ongo mkaanem man yô, ve gba kaan ér: “Mimi je or ne ka Profeti shon.”
41 Mbagenev lu kaan ér: “Ka Kristu je ne.” Kpa mbagen di lu kaan ér: “Kristu una due ken Galilia je he?
42 Ka ken tsombor u Davidi, shi ka ken Betelehem, angar u Davidi due her la, Ruamabera a kaa ér Kristu una due gaa?”
43 Nahan ikpelaior hingir u lun a mbamnenge kposo kposo sha kwagh na.
44 Er mbagenev ken a ve soo u kôron un nahan kpa, mô ve bende un uwegh iyol ga.
45 Mbakuran mbara mba za hidi yô, upristi mba tamen man Mbafarishi pine ve ér: “Er nan ne ve a na ga?”
46 Mbakuran mbara gema kaa ér: “I gbe je or ngu a ôr kwagh er or ne nahan ga.”
47 Mbafarishi mbara gema kaa ér: “Ne kpa i za tsume a venee?
48 Or môm ken mbahemenev asev shin ken Mbafarishi nan na un jighjigh ga, shin nan na?
49 Kpa ikpelaior i i fe Atindi ga ne ngi a ifyan iyol.”
50 Tsô Nikodemu, or ve ugen u yange vande van hen a na la, kaa a ve ér:
51 “Atindi a ase tese ér i de gbe nan or ibo ga, saa a vande ungwan kwaghôron u nan, sha er a fa kwagh u nan lu eren la yô, shin ka nahan ga?”
52 Ve gema ve kaa a na ér: “We kpa u due ken Galilia, shin ka nahan ga? Tôv nenge er i lu u profeti môm nana due ken Galilia ga yô.”*
Ngeren mba shin kpe
^ Shin “Iniongo i Atumbe.”
^ Shin “zua a mfetakeda.”
^ Ka, “imakeranta i mba tesen kwaghaôndo u Mbayuda” je la.
^ Zwa Grika, “ihwa.”
^ Mkaanem ma i nger, hii ivur 53 zan zan pelegh ityough 8 za kighir ivur i sha 11 la cii, ma ken uruamabera mbagenev mba yange i hii ngeren la ga.
