Yohane 9:1-41
9 Ngur karen yô, a nenge a orgen u i mar un a ashe a pirin yô.
2 Nahan mbahenen nav pine un ér: “Rabi, ka an nan er isholibo? Ka or ne iyol na a er isholibo shin ka mbamaren nav ne ve er ve, i mar un a ashe a pirin yee?”
3 Yesu kaa ér: “Or ne er ma isholibo ga, mbamaren nav kpaa ga, kpa kwagh ne er nahan ka sha u i pase ityom i Aôndo sha kwagh na.
4 Gba u se er ityom i Un u a tindim la keng, er iyange i lu her ne; gadia tugh mbu van mbu ma or a kera fatyô u eren tom ga yô.
5 Er m lu shin tar yô, m ngu iwanger i tar.”
6 Er akaa ne yô, a ta ijer hen inya, a hôr inya sha azer la, a shighe or shon sha ashe,
7 a kaa a na ér: “Yem za ôô shin ityungu i Shiloam.” (Inja i Shiloam ér: “I Tindi”). Nahan a yem a za ôô, maa a cin a hide, a hingir u nengen kera.
8 Mba wan ndor a or shon, mba yange ve nenge a sônon ior kwagh yô, gba kaan ér: “Ka or u yange a tema a sônon kwagh ne gaa?”
9 Mbagenev lu kaan ér: “Ka un.” Mbagen di lu kaan ér: “Ei, a bee un a bee.” Kpa or la iyol na lu kaan ér: “Ka mo un shon je ne.”
10 Nahan ve pine un ér: “Man er nan u lu nengen hegene?”
11 A kaa a ve ér: “Or u i yer ér Yesu la hôr inya shighem sha ashe, maa kaa a mo ér: ‘Yem shin Shiloam za ôô.’ Nahan m za ôôn yô, m hingir u nengen.”
12 Tsô ve pine un ér: “Or shon ngu hana?” A kaa a ve ér: “M fa ga.”
13 Tsô ve za a or u yange pir ashe ne hen Mbafarishi.
14 Kwagh ka a er yô, iyange i Yesu bugh or ne ashe la gema lu Iyange i Memen.
15 Nahan Mbafarishi kpa gba pinen or shon er i hii ve a hingir u nengen yô. A kaa a ve ér: “A hôr inya a shighem sha ashe, m za ôô, maa m hingir u nengen ye.”
16 Mbafarishi mbagenev gba kaan ér: “Or ne due ka hen Aôndo ga, sha ci u kor Iyange i Memen ga.” Mbagenev kaa ér: “A er nan man orisholibo nana fatyô u eren uivande mbara nahana?” Nahan ve lu a mbamnenge kposo kposo sha kwagh na.
17 Shi ve pine or u yange pir ashe ne ér: “Er a bugh u ashe yô, u hen wer ngu nyi oro?” Or la kaa ér: “Ngu profeti.”
18 Nahan kpa, Mbayuda na jighjigh ér or ne vande lun orapirashe cii va hingir u nengen ga, zan zan ve va yila mbamaren mba or shon u gema nengen ne.
19 Ve pine ve ér: “Ka wan wen u ne kaan ner yange i mar un a ashe a pirin nee? Nahan er nan a lu nengen hegene?”
20 Mbamaren nav kaa ér: “Se fa ka wan wase je ne, shi yange i mar un a ashe a pirin.
21 Kpa er i hii ve a va hingir u nengen hegen yô, se fa ga; shi se fa or u nan bugh un ashe ga. Pine un nen. Ngu wanye ga. A̱ ôr iyol na.”
22 Mbamaren nav ôr kwagh ne nahan sha ci u ve lu cian Mbayuda, gadia Mbayuda vande zuan zwa ér aluer or kaa ér ngu Kristu yô, i̱ dugh or la ken shinagoge kera.
23 Ka nahan ve mbamaren nav kaa ér: “Ngu wanye ga. Pine un nen” ye.
24 Tsô shi ve yila or shon u yange pir ashe ne, sha kwa har, ve kaa a na ér: “Wuese Aôndo; or la yô, se fa ka orsholibo.”
25 A kaa ér: “Una lu orisholibo kpa m fa ga. Kwagh u m fe yô, yange m pir ashe, kpa hegen m ngu nengen.”
26 Maa ve pine un ér: “A er a we nena? A bugh u ashe nena?”
27 A kaa a ve ér: “M vande ôron ne, kpa ne ver ato ga. Er nan ve shi ne soo u ungwana? Ne kpa ne soo u hingir mbahenen navaa?”
28 Tsô ve naha un tar, ve kaa ér: “Ka we u lu orhenen u or la ye, se yô, se mba mbahenen mba Mose.
29 Se fa Aôndo yange lamen a Mose, kpa or ne yô, se fa ape a dugh ga.”
30 Or la kaa a ve ér: “Kpiligh mo iyol er ne fe ape a dugh ga, kpa a gem a bughum ashe yô.
31 Se fa, Aôndo keghen ato a mbaasorabo ga, kpa hanma or u nan cie Aôndo shi nan eren ishima na yô, keghen ato a nan.
32 I gbe je kpa mba a ungwa ér i mar or a ashe a pirin, kpa i va bugh nan ashe ga.
33 Luun er or ne due ka hen Aôndo ga yô, ma a fetyô u eren ma kwagh môm ga.”
34 Ve gema ve kaa a na ér: “I mar u u iv a asorabo iyol, man u ngu tesen see?” Maa ve zenda un!
35 Yesu ungwa er ve zenda un yô, nahan va zough a na yô, a pine un ér: “U na Wan u or jighjigh kpa?”
36 Or la kaa a na ér: “Orvesen, un shon la ka ana? Ôrom sha er me na un jighjigh yô.”
37 Yesu kaa a na ér: “U nenge a na, man ka un je a lu lamen a we ne.”
38 A kaa ér: “Tere, m na un jighjigh.” Tsô a gure inya a na un icivir.
39 Yesu maa kaa ér: “M va shin tar sha u i ôr tar ne ijir, nahan mba ve nengen ga la ve̱ nenge, mba ve nengen la di ve̱ pir ashe.”
40 Mbafarishi mbagenev mba ve lu vea na la, mba ongo akaa ne yô, ve pine un ér: “Nahan se kpa se pir ashe zee?”
41 Yesu gema kaa a ve ér: “Luun er ne pir ashe yô, ma ne lu a isholibo iyol ga. Kpa hegen ne mba kaan ner, ‘Se mba nengen.’ Nahan isholibo yen ngi ne her.”
