Aôndo We Ikyo sha Kwagh Wase Mimi Kpa?
Vegher u sha 1
Aôndo We Ikyo sha Kwagh Wase Mimi Kpa?
1, 2. Kanyi mpin ior ve pin sha kwagh u Aôndo, man ka sha ci u nyi?
SHIGHE ugenegh ken uma wou, alaghga ú vande pinen wer: ‘Aluer Aôndo ngu u a we ikyo sha kwagh wase mimi yô, hii nan a ne atsan a yan ian kpishi yumu?’ Se cii se vande yan ican shin se fa ma orgenegh u nan vande yan i̱ yô.
2 Mimi je, hii sha igbetar je ior vande yan ican i mnyoon man ishimanyian sha kwagh u uitya, ieren i bo, ifer, m-ban u mimi, ibanave, angev, man ku u mbadoon se ishima kpaa. Ken derianyom u sha 20 ne tseegh, ityav wua ior hemba miliôn 100. Mbagenev umiliôn uderi imôngo vihi ayol shin uya vev kua akaa a ve cii tim. Akaa kpishi a tan hindi iyol er sha shighe wase ne, a nan zege mzungu, mliam ma vaan kpishi, man m-ban u ishimaverenkeghen hen ior kpishi je gande ôron.
3, 4. Ior kpishi hen nena sha mne u Aôndo a ne ican i yan ian laa?
3 Asema vihi mbagenev kpishi nahan ve hen er aluer Aôndo ngu je kpaa, a wa ikyo sha kwagh wase yum ga. Shin alaghga ve hen er Aôndo ngu ga jim. Ikyav i tesen yô, orgen u ngise zua a tôvaican sha ikyev i ikurior igen kua ku u ahuraior man tsombor na ken Ityav mbi Tar cii Mbi sha I la pine wen-er: “Aôndo yange lu hana zum u kwagh gba se a na yum laa?” Orgenegh, u yange war mtim u ior umiliôn imôngo sha ikyev i Nazi ken Ityav mbi Tar cii Mbi sha II la, shír ishima kpishi sha ican i yan i yange nenge a mi sha ashe na yô nahan a kaa wen-er: “Aluer ú fatyô u ndiar ishima yam yô, ia haa ú megh.”
4 Sha ci ne yô, ior kpishi fatyô u kaven er i hii ve Aôndo u dedoo una na ian er ubombaakaav ve̱ er la ga. Ka ve huna shin mimi je una waan ikyo sha kwagh wase shin una lu je kpaa yô. Shi mbagenev kpishi hen er ican i yan ka kwagh u gbekeke hen or-umace.
[Mbampin Mba Ngeren u Henen]
[Foto u sha peeji 2, 3 la]
Tar u he u lun a ican i yan shio la mgbôghomô?
