Vegher u sha 8

Awashima u Aôndo Ngu Zan u Za Ivin

1, 2. Ka nena Aôndo á lú wan ago iyol sha u been a ican i yana?

HEMEN u ior mba hembanato man azôv ne zer kpelan tsombor u uumace yemen a ve shin ijem uderimbaanyomov imôngo hegen. Nahan kpa, Aôndo hungur a atsan a yan ase ga. Kpa, ken uderimbaanyomov mba ve kar ne cii, ngu kongoso iyol i va saghen uumace kera ken ikyangenev mbi aferakaa man ican i yan.

² Sha shighe u ihyembeato i ken Eden la, Aôndo hii u pasen awashima na u van a gomoti u una gema tar ne ua hingir paradiso sha ci u ior yô. (Genese 3:15) Ken hemen yô, Yesu u lu̱ orshua u vesen u Aôndo la, tôô gomoti u Aôndo u una va la hingir itine i kwaghpasen na. Yange kaa er á lu cii ishimaverenkeghen i uumace je la.—Daniel 2:44; Mateu 6:9, 10; 12:21.

3. Yesu yange yila gomoti u a lu van sha ci u tar la er nyi, man ka sha ci u nyi?

³ Yesu yange yila gomoti u Aôndo u una va la er “tartor u sha,” sha ci u ua hemen shaala. (Mateu 4:17) Shi a yila ú er “tartor u Aôndo,” gadia ka Aôndo una lu Ityough sha ú ye. (Luka 17:20) Ken uderimbaanyomov mba ve kar la Aôndo na mbangeren sha u ve̱ nger akaaôron a profeti sha kwagh u mba vea va lu ken gomoti la man kwagh u ua va er kpaa.

Tor u He u Tar

4, 5. Ka nena Aôndo yange tese er Yesu ka Tor u un lumun a mi je laa?

⁴ Ken anyom a karen er dubu uhar la, lu Yesu, va iv akaaôron a profeti kpishi sha kwagh u or u nana va lu Tor u Tartor u Aôndo la ye. Lu un Aôndo tsua er a̱ lu Orhemen u gomoti shaala sha uumace ye. Yange kpen kera yô, Aôndo nder Yesu shin ku ver un hingir or utaha, u ken jijingi u tsôron. Mbashiada kpishi yange ve nenge mnder u i nder un shin ku la.—Aerenakaa 4:10; 9:1-9; Mbaromanu 1:1-4; 1 Mbakorinte 15:3-8.

⁵ Tsô maa Yesu “tema sha uwegh ku yanegh ku Aôndo.” (Mbaheberu 10:12) Shaala la a kegh shighe u Aôndo una na un tahav mbu yaren tom u Tor u Tartor u sha ú Aôndo yô. Kwagh ne iv kwaghôron u profeti u ken Pasalmi 110:1, hen ape Aôndo kaa nahan la er: “Temam ken uwegh ku yanegh, zan zan Me gema mbaihomov Ou vea hingir We kwagh u pendan angahar sha mi.”

6. Ka nena Yesu yange tese er un kuma u lun Tor u Tartor u Aôndo?

⁶ Shighe u lu shin tar la, Yesu tese er un kuma u lun sha imba ian la. Er i tôv un a ican nahan kpaa, a za hemen u kôron mtile u sha mimi na la hen Aôndo. Sha u eren nahan yô, a tese er Satan yange er aie zum u a senge er or môm nana tile sha mimi hen Aôndo sha shighe u ameen ga la. Yesu, or u vough, ‘Adam u sha uhar’ la, tese er Aôndo yange nzughul ma kwagh sha mgbe u a gba uumace mba vough la ga.—1 Mbakorinte 15:22, 45; Mateu 4:1-11.

7, 8. Ka akaa a dedoo a nyi Yesu yange er shighe u̱ lu shin tar laa, man yange tese er nyi?

⁷ Ka hanma tor je nan vande eren akaa a doon er Yesu yange er ken anyom kpeghee a a er tom shin tar laa? Er icighan jijingi u Aôndo na un tahav yô, Yesu bee mbauangev iangev, mbakpenalegh, mbaapirashe, mbakondonato, kua mbakondonikyer. Yange nder mbakpenev je kpaa! Yange tese ikyav kpeghee i kwagh u una er ken hemen zum u una ngohol tahav mbu Tartor yô.—Mateu 15:30, 31; Luka 7:11-16.

 ⁸ Yesu yange er akaa a doon ngee zum u a lu shin tar la je yô orhenen na Yohane kaa er: “Shi akaa agen nga kpishi a Yesu er yô; aluer a nger a cii ser ser yô, beem er ityakerada i ma i nger yô, ma i nenger tar ne je.”—Yohane 21:25. *

9. Ka sha ci u nyi mba soon mimi ken asema yange ve zaan hen Yesu iuulu?

⁹ Yesu yange lu a erdoo man mhôônom ma zungwen, lu a dooshima kpishi hen ior. Wasen mbaatsanev kua mba shawon hemba ve la, kpa shi nyaghen mbainyarev kua mba lun tagher tagher ga. Mba soon mimi ken asema yange ve lumun myer u Yesu zum u a yila ve la er: “Va nen her a Mo, ne mba i ver ne iyol cii, ikav mbi yoho ne kpaa, Mo Me na ne mmem. Tôô nen igbur Yam sha ayol a en, va hen nen kwagh sha ikev Yam, gadia M ngu ishima legh legh, man M kehen ityough kpaa ga, tsô né zua a mmem ken asema a en; gadia igbur Yam leghem man ikav Yav kpaa peese.” (Mateu 11:28-30) Yange ior mba cian Aôndo tim nongo za her a na shi ve lu veren ashe keghen mtemtor na kpaa.—Yohane 12:19.

Atiator

10, 11. Ka unô vea lu kwar vea Yesu imôngo sha u lun tor sha tara?

¹⁰ Di vough er ugomoti mbaiorov ve lu a atiator a sôron tar nahan, kape Tartor u Aôndo u sha kpaa u lu je la. Dugh Yesu kera yô mbagenev kpaa vea lu aa kwar sha mtemtor sha tar, sha ci u Yesu yange tôndozwa a mba ve lu a na ikooso kooso la er vea hemen vea lu utor a na imôngo sha uumace.—Yohane 14:2, 3; Mpase 5:10; 20:6.

¹¹ Sha kwagh ne yô, a nder asande a ior kpeghee sha u za lun uma shaala a Yesu imôngo. Ka ve ve lu Tartor u Aôndo u ua va uumace a averen a been mayange ga la ye. (2 Mbakorinte 4:14; Mpase 14:1-3) Nahan ken ikov i i kar ne cii, Yehova lu wan imaagh ki mtemtor u una va a averen a been mayange ga hen tsombor u uumace la.

Hemen u Sha Tseeneke Ua Bee

12, 13. Kanyi Tartor u Aôndo ú kegh iyol u eren hegene?

¹² Ken derianyom ne Aôndo wa uwegh jighilii sha mbamzehemen mba tar ne. Er Vegher u sha 9 u antakerada ne una lu pasen nahan, akaaôron a profeti a Bibilo tese ér Tartor u Aôndo sha ikyev i Kristu la ú hii ken 1914 man hegen ú kegh iyol u hemben tar u Satan ne kera cii. Tartor la kegh iyol u ua “tema tor hen atô u mbaihomov [mba Kristu].”—Pasalmi 110:2.

¹³ Sha kwagh ne yô kwaghôron u profeti ken Daniel 2:44 kaa er: “Sha ayange a utor  mbara [mba ve lu hegen ne] Aôndo u sha una ver tartor ugen [sha] u ua gba mayange ga yô, man shi tahav mbu ú kpaa mbua hingir sha ikev i ma ikur igen ga [a kera na mtemtor u uumace ian mayange ga]. Ú [Tartor u Aôndo] ua hembe ityartor igen ne cii avur avur ua tim í, man ú yô ua tile gbem sha won.”—Revised Standard Version.

14. Ka mbamtsera mba nyi vea va shighe u mbee u hemen u uumace laa?

¹⁴ A karen a hanma mtemtor u a til sha tseeneke a Aôndo cii kera yô, mtemtor u Tartor u Aôndo sha tar la man una iv. Man er mtemtor u Tartor la á lu sha yô, mayange uumace vea fatyô u vihin ú ga. Tahav mbu hemen mbu á lu hen ape yange mbu vande lun sha hiihii la, shaala, vea Aôndo. Man er hemen ú Aôndo ua tser tar cii yô, ukwaghaôndo mbaaiev vea kera lu mba tsumen a ior ga shin mbamhen mbaiorov mba ve kom ga la kpaa shin akaaôron a pati a nyohon zwa kpaa ga cii. Á kera de er mô ken ambaakaa la a̱ lu ga.—Mateu 7:15-23; Mpase, ityouv 17 zan zan 19.

[Ngeren u shin kpe]

[Mbampin Mba Ngeren u Henen]

[Foto u sha peeji 18 la]

Shighe u Yesu lu shin tar la á bee ior angev shi á nder mbakpenev u tesen kwagh u una va er ken tar u he yô

[Foto u sha peeji 19 la]

Tartor u Aôndo u sha la ua va hembe hanma inja hemen u ú til sha tseeneke a na cii