Er I Hii Ve Aôndo Á Ne Ican I Yan Ian La
Vegher u sha 6
Er I Hii Ve Aôndo Á Ne Ican I Yan Ian La
1, 2. Ka nena mbamaren asev mbahiihii mbara yange ve vihi mhii u dedoo u Aôndo na ve laa?
KANYI yange i nzughulu? Kanyi yange i er je ve i vihi mhii u dedoo u Aôndo na mbamaren asev mba hiihii ken Paradiso u Eden laa? Er nan ve, u ma i lu bem man mlu u vough u ken Paradiso yô, ifer man ican i yan ve kar ve mgbough ken anyom a karen udubu udubu nee?
Genese, ityough 3.
2 Ityôkyaa yô Adam man Ifa yange ve yar tom a ian ve i eren kwagh u ve soo la sha inja ga. Yange ve kera umbur ér i gba ve er ve zua a mkpeyol a Aôndo man atindi a na shio ga. Yange ve tsuwa u tilen sha tseeneke ve undun Aôndo, ve hen er á hemba kpen uuma vev iyol. Nahan ve per ihwa i Aôndo ver akighir a ian ve i eren kwagh u ve soo la.—Kwagh u Hementor u Tar Cii La
3-5. Er nan Aôndo yange gba timin Adam man Ifa kera tsô shi hiden gban ityôhe ga?
3 Er nan ve Aôndo yange gba timin Adam man Ifa kera tsô sha u una hii tsombor ugenegh u uumace ga? Sha ci u mkom u hementor na sha tar cii la, inja na yô, i laha ian na i hemen la.
4 Yange i pine mpin er: Ka an nan kom u hemene, man ka hemen u ana ú lu voughlo? Er a lu uhembancii shi á lu Orgbanakaa yô Aôndo ngu a tahav u hemen ior. Er á fe akaa cii yô, hemen na hemba ngun a inja sha akaa a a gbe la. Kpa hegen i laha Aôndo. Kwagh ugen yô, yange ma kwagh nzughul lu ken or—kwagh u á gba la shinii? Ken hemen se va time se fa er mpin sha kwagh u mimi u or-umace la a nyer shami yô.
5 U or undun Aôndo tilen sha tseeneke u nan yô, mpin ugenegh shi ta tombo er: Á hemba kpen uumace iyol aluer Aôndo kera hemen ve ga yôô? Orgbanakaa yange vande fan ikyar i nan sha kwagh ne, kpa gbenda ú uumace kpaa vea kav yô lu u nan ve ian vindi vindi í eren kwagh u ve soo la. Yange ve tsuwa gbenda la a ishima ve, nahan Aôndo kpa na ve ian.
6, 7. Hii nan Aôndo á ne uumace ian i lun sha tseeneke ve vindi vindi la gbem yum nahana?
6 Sha u nan uumace zege ian u karen kwagh u ve soo la a myange shio yô, Aôndo una tese sha gbenda u tseer tseer aluer á hemba kpen uumace iyol ken hemen u Aôndo shin á hemba kpen ve iyol sha u ve ayol a ve kpaa. Man shighe u á na ve la kpaa a gba u una lihe a kuma u nan uumace ian i aren sha iaven i ve hen er ka i hemban cii ken mzehemen ve sha aeren a pati, iwavaren, ieev mbi sangen yeke, man twersôron kpaa yô.
7 Nahan, Aôndo na or ian i eren sha ishima na va ar sha ayange a ase ne sha u tesen a akperan shio aluer hemen u or-umace a na shio la ua wase yô. Sha nahan yô or uma fatyô u tsuwan hen atô u erdoo man ifer, hen atô u dooshima man ihom i kôron, hen atô u perapera man m-ban u perapera. Kpa shi a tagher ishigh a kwagh u a dugh ken kwagh u a tsough la yô: mlu u dedoo man bem shin ifer man ican i yan.
Ihyembeato i Mba ken Jijingi
8, 9. (a) Ka nena yange ihyembeato hii ken tar u ujijingi la? (b) Dugh Adam man Ifa kera yô ka unô kpaa Satan yange shi mgbegha ve sha u ve hembaato?
8 Kwagh ugenegh kpa ngu u a hen shami yô. Ka mbamaren asev mba hiihii mbara tseegh yange ve hendan a hemen u Aôndo ga. Ka an ugenegh kpaa yange nan lu hen shighe la? Ka ior mba ken jijingi. Cii man Aôndo mase gban uumace yô, a vande gban mbaumav mba hemban uumace, mbatyomov iyenge kpishi, er ve lú shaala. Ve kpaa yange i gba ve á ian i eren kwagh u ve soo la shi gba u ve kpaa vea na ayol a ave sha ikyev i hemen u Aôndo.—Yobu 38:7; Pasalmi 104:4; Mpase 5:11.
Mateu 4:8, 9) Jijingi u hembanato shon ne yange mgbegha Adam man Ifa u hembanato, senge sha aie er Aôndo lu̱ nyumen ve kwagh u dedoo. (Genese 3:1-5) Nahan mba yer un er Diabolo (Ormsende) man Satan (Orhendankwagh). Ken hemen yô, shi a mee ujijingi mbagenev kpaa ve hembaato. I va hingir u yilan ve er azôv.—Duteronomi 32:17; Mpase 12:9; 16:14.
9 Bibilo tese er ihyembeato yange i vande hiin ken tar u jijingi. Or u ken jijingi ugenegh yange soo u zuan a ian i eren hanma kwagh cii. Yange soo er uumace ma ve civir un je kpaa. (10. Kanyi yange i va sha ihyembeato i uumace man ujijingi laa?
10 Uumace, er ve hemba Aôndo ato yô, ve na ayol a ve sha ikyev i Satan kua azôv a na la. Ka nahan ve Bibilo i yer Satan er “aôndo u tar u ainge,” u a “pir ve ashe a asema” la ye. Sha kwagh ne yô, Mkaanem ma Aôndo kaa er “tar cii ngu sha ikyev i orbo.” Yesu iyolna yange yila Satan er “tor u tar ne.”—2 Mbakorinte 4:4; 1 Yohane 5:19; Yohane 12:31.
Akaa Ahar
11. Kanyi kwagh igenegh kpaa Satan yange naha Aôndo tar shamini?
11 Satan yange va a kwagh ugen u nahan Aôndo tar. Sha ieren na la yô, yange va a akperan er Aôndo nzughul kwagh sha gbenda u Á gba uumace la man aluer í va a mkighir yô ma or môm tsô kpaa nana soo u eren kwagh u a lu u shami la ga. Jim yô, yange senge er zum u ameen a ve yô ior vea tuhwa Aôndo jim. (Yobu 2:1-5) Sha gbenda ne yô Satan huna mtile u sha mimi u uumace mba i gba la.
12-14. Ka inja nena mkar u shighe una pase mimi sha atôakaa a ahar a Satan yange va a mi laa?
12 Sha nahan yô, Aôndo na ian lihe kuma sha u mba kaven kwagh cii ve nenge er á sôr kwagh ne kua kwagh u tarhemen u Aôndo la kpaa yô. (Kar Ekesodu 9:16.) Kwagh u uumace vea zua a min ken masetyô la una pase mimi sha kwagh u atôakaa a ahar ne.
13 Hiihii yô, kanyi mkar u shighe una pase sha kwagh u tarhemen u Aôndo, mkom u Aôndo á kom u hemen tar laa? Uumace vea hemba hemen ayol a ve doon a Aôndo shinii? Ma hemen u sha ikyev i uumace sha tseeneke ve a Aôndo una va aa tar u msaanyol ú lun a ityav shio, ifer, man m-ban u mimi kpa? Ma imba hemen la ua bee a ibanave shi ua va a mtem u dedoo kpa? Ma imba hemen la ua hemba angev, iyolbeen, man ku kpa? Yange lu u hemen u Aôndo ua er akaa la cii.—Genese 1:26-31.
14 Sha ityôkyaa i sha uhar la yô, shighe una tese nyi sha mkom u uumace? Yange lu sha aburabur Aôndo gba uumace sha gbenda u á gba ve la shinii? Mô ve môm nana er kwagh u shami zum u nan lu ken imeen kpa? Ior vea lu mba tesen er yange ve soo hemen u Aôndo hemba hemen u uumace sha tseeneke ve la kpa?
[Mbampin Mba Ngeren u Henen]
[Foto u sha peeji 13 la]
Aôndo na uumace shighe sha u ve ar sha iaven i mzehemen ve u hemban cii la
Kwaghhendan u sha ahumbe: Har sha NASA photo