Er Se Fe Ser Se Mba Ken “Ayange A Masejime” La
Vegher u sha 9
Er Se Fe Ser Se Mba Ken “Ayange A Masejime” La
1, 2. Ka nena se fa ser se mba ken ayange a masejime?
KA NENA se fa ser se mba ken shighe u Tartor u Aôndo ua ta num sha mtemtor u uumace ne? Ka nena se fa ser se zulum ikua ikua a shighe u Aôndo una bee a aferakaa man ican i yan vindi vindi laa?
2 Mbahenen mba Yesu Kristu yange ve soo u fan akaa la. Yange ve pine un “ikav” i ia lu i mtemtor na ken tahav mbu Tartor man “i mkurtar” yô. (Mateu 24:3) Yesu yange na ve ikyar sha u ôron vie vie akaa man mbamlu mba vea za hemen kwa môm sha shighe la u tesen er uumace nyôr ken “shighe u mkur,” “ayange a masejime” a tar ungun yô. (Daniel 11:40; 2 Timoteu 3:1) Se mba ken derianyom ne se nenge a jimin ikyav la kpa? Een, se nenge a i̱, wuee je!
Ityav mbi Tar Cii
3, 4. Ka nena ityav mbi i nenge ken derianyom ne mbi zough sha kwaghôron u profeti u Yesu la?
3 Yesu yange tsengaôron er ‘ikurior igen ia mough ityav a ikurior igen, shi tartor ugen kpaa ua mough ityav a tartor ugen.’ (Mateu 24:7) Ken inyom i 1914 la tar cii nyôr iyol ken uitya a akuraior man ityartor sha gbenda u lun kposo a nyityô ityav mbigenev ken jime cii. U tesen mimi u kwagh la yô, mba ngeren akaa a mbayiase sha shighe la yila mbi er Ityav mbi Tamen. Hii sha igbetar je lu hiin je i nôngo imba uitya la, lu ityav mbi tar cii mbi sha môm. Mbautyaav kua mba ve lu kimi ga kpaa tim kuma iyenge ior 20,000,000, hemba ngeen a ma ityav mbigenev mbi í vande nôngon ken jime cii ca je.
4 Ityav mbi Tar cii mbi sha I la mbi lu mhii u ayange a masejime. Yesu yange kaa er angan kua akaa agenegh aa lu “mhii u ican tsô.” (Mateu 24:8) Kwagh la due mimi, Ityav mbi Tar cii mbi sha II mbila hemba vihin cii, mbautyaav man mba ve za ga kpaa tim kuma iyenge 50,000,000. Ken derianyom u sha 20 ne, i wua ior ken uitya hemba iyenge 100,000,000, iyenge ne hemba iyenge i mba i woo ken anyom 400 a karen la jimin cii kwa nyiin! Nenge imba mpuu u mtemtor u or-uma sha wono!
Akav Agenegh
5-7. Ka akav agenegh a nyi a lu a tesen er se mba ken ayange a masejime?
5 Yesu yange seer akaa agenegh kpaa a aa va sha ayange a masejime yô: “Ityartenger i vesen ia lu sha ajiir kposo kposo, kua ijen man ubombauangev [iangev mbi samber wuee] kpaa.” (Luka 21:11) Kwagh la zua sha akaa a yange hii u eren ken inyom i 1914 la vough, sha ci u atsan nga seer a seer sha ci u ambaakaa a bo la.
6 Ityartenger ka kwagh u a ze hemen hanma shighe, a yemen a uuma kpishi yô. Er Ityav mbi Tar cii mbi sha I mbila kar kera yô angev mbu haan ahenga mbu mbu hii ken tar u Spain la tseegh mbu wua ior kuma 20,000,000—mbagenev hen er kuma 30,000,000 shin hemba nahan. Angev mbu i yer er AIDS la mbu wua ior udubu uderi imôngo shi mbua fatyô u wuan umiliôn seer ken hemen. Hanma inyom yô ior umiliôn imôngo ka ve kpe sha ci u iangev mbi shimav, angev mbu kyansa, kua iangev mbigenev. Shi ior umiliôn kpishi mba kpen ku u ijen kule kule. Akperan nga ga ‘mbaanyinyav mba ken Mpase’ mbara a ityav vev, ijen, man iangev mbi samber wuee la mba panden iyenge kpishi ken icombor i uumace hii ken 1914 je.—Mpase 6:3-8.
7 Shi Yesu yange tsengaôron mseer u ifer i a nenge a mi sha ityar cii yô. A kaa er: “Sha ci u mvende u vendan atindi una seer a seer nahan dooshima u mbagenev kpishi una ndôhôr.”—Mateu 24:12.
8. Ka nena kwaghôron u profeti u ken 2 Timoteu ityough 3 la á zough sha shighe wase nee?
8 Shi u seer yô, kwaghôron u Bibilo tsengaôron mvihi u aeren u a hingir tseer tseer sha tar cii nyian ne: “Ken ayange a masejime yô, ashighe a ican aa va. Gadia ior vea hingir mbawan ayol a ve iko tseegh man mba inyaregh ki doo ve ishima man mbahagher sha akaa man mbagengese iyol man mbaôron kwagh dang dang, man mbahemban mbamaren ve ato man mbalun a ishughun ga man mba lun wang ga, man mba lun a dooshima ga man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga man mbapasen ior aker man mbawan uma ve iko ga man mbamoron ayol a ve man mba iember i iyolough i hembe doon ve a Aôndo la. Sha ashe yô mba a mlu u civir Aôndo la kpa mba geman mba nyiman agee la . . . Udangmbaiorov man mbatsughunior vea yem hemen hemen vea hemba vihin a vihi kwagh.” (2 Timoteu 3:1-13) Akaa ne cii kule mimi nahan vough sha ashe ase.
Ikyav i Genegh
9. Kanyi yange i er shaala i̱ i zough sha mhii u ayange a masejime sha tara?
9 Kwagh ugenegh kpa ngu u a seer nan atsan a yan ken derianyom ne yô. U zuan sha mhii u ayange a masejime ken 1914 yô, kwagh ugen er u una seer veren uumace ken mcie cii yô. Sha shighe la, er kwaghôron u profeti ken takerada u Bibilo u masetyô u pase nahan: “Ityav gba sha, Mikael [Kristu ken tahav nav mbu shaav] kua mbatyomov nav ve lu nôngon a darakon [Satan]. Darakon a mbatyomov nav [azôv] kpaa lu nôngon, kpa a hemba ga, ian kera lu sha ci ve sha kpaa ga. I gbihi zegedarakon la shin inya, ka tseyô je la, u i yer un er Diabolo man shi Satan la, u a lu tsughun tar cii la, i gbihi un shin tar shi i gbihi mbatyomov nav a na imôngo kpaa.”—Mpase 12:7-9.
10, 11. Ka inja nena mzende u i zenda Satan man azôv na sha i gbihi shin tar la yange bende a uumace?
10 Kanyi yange i tser tsombor u uumace? Kwaghôron u profeti la za hemen er: “Kpa kwagh á gema á tser tar man zegemnger gadia diabolo sen shin ven, ishima vihi un tsung gadia a fa er shighe na a kera vese ga yô.” Een, Satan fa er mkur u tar na ne mgbôghom, nahan ngu eren hanmakwagh sha afatyô na cii sha u goom a ior hen Aôndo kera cii man á mase karen a na kua tar na ne kera ye. (Mpase 12:12; 20:1-3) Hôngor ujijingi mbara tsô sha ci u ve kera yar tom a ian i eren kwagh u ve soo la sha inja ga! Mbamlu mba shin tar ne vihi nengen kpishi sha ameen a ve, hemban je yô hii ken 1914!
11 Ka kwagh u cieryol ga er Yesu yange tsengakaan kwagh u sha shighe wase la: “Akaa a cieryol man uivande mba vesen kpaa vea due sha aôndo.”—Luka 21:11.
Mkur u Hemen u Or man Azôv Zulum
12. Ka môm ken akaaôron a profeti a nyi a shi heregh u ivin cii man mkur u tar ne una kumaa?
12 Ka akaaôron a Bibilo a profeti á me a shi u ivin cii man Aôndo una tim tar nee? Ka kpeghee tsô! U môm ken akaa a masejime la ngu ken 1 Mbatesalonika 5:3, i kaa er: “Zum u vea lu ôron kwagh u bem man mkpeyol la yô, hen zum la je man mtim una lu sha a ve.” (The New English Bible) Kwagh ne tese er mkur u tar ne una hii “hen zum u vea lu ôron” la je. Er tar ua lu nengen ga la je, mtim una va sha a ve sha shighe u ve pende ishima shami ga jimin cii yô, zum u asema a ior a har sha bem man mkpeyol u ve lu keghen la yô.
13, 14. Ka shighe u ican u nyi Yesu yange tsengaôronô, man una kule nena?
13 Shighe u tar u Satan a lu hemen ú ne zulum been. Shi ca ga tsô ua ar ken mkur u ú ken shighe u ican u yange Yesu ôr la: “Zum la zegecan una er, imbacan i hii er i gba tar la je zan zan ainge ne i lu a er mayange ga yô, man mayange kpaa ia kera shi er nahan kpaa ga.”—Mateu 24:21.
14 Mkur u “zegecan” la a lu ityav mbi Aôndo mbi Armagedon la. Ka shighe u profeti Daniel yange tsengaôron er Aôndo una “hembe ityartor igen ne cii avur avur” je la. Kwagh ne inja na yô a lu mkur u mtemtor mba uumace mba hegen ve til paleghaa a Aôndo la cii. Mtemtor u Tartor na shaala man ua hoghom sha akaa a uumace sha won cii. Daniel yange tsengaôron er, mayange je, a kera undu tahav mbu kurantar “sha ikev i ma ikur igen ga.”—Daniel 2:44; Mpase 16:14-16.
15. Kanyi ia er tahav mbu Satan man azôv a na?
15 Hen shighe la hanma tom u Satan man azôv a na cii ua tôndo. Á yange ujijingi mba hembanato mbara cii sha er vea kera kôr cio u “tsughun akuraior ga” yô. (Mpase 12:9; 20:1-3) Í vande ôron ve ijir i kuugh i kure kera mba masen keghen mtim. A va lu iaven i mmem kpishi sha ci u uumace zum u vea due kera sha tahav nav mbu hôngorough la tsô!
Ka An Nana Wara? Ka An Nana War Ga?
16-18. Ka an nana war mkur u tar ne, man ka an nana war ga?
16 Zum u ajir a ôron a Aôndo aa kule sha tar ne yô, ka an nana wara? Ka an nana war ga? Bibilo tese er mba ve soo mtemtor u Aôndo la á kura ve shi vea war kpaa. Mba ve soo mtemtor u Aôndo ga yô á kura ve ga kpa á tim ve imôngo a tar u Satan.
17 Anzaakaa 2:21, 22 kaa er: “Mbaperapera [mba ve we ayol a ve sha ikyev i mtemtor u Aôndo la] vea tema sha tar, man mbajighjigh kpaa vea tema sha u gbem. Kpa aferaior yô [mba ve vende mtemtor u Aôndo la] , á tim a sha tar kera, man mbakoron ior ndiar ave kpaa, á wuhe ve kera.”
18 Pasalmi 37:10, 11 kpa kaa er: “Shi côhin tsô iferor á kera lu ga . . . Kpa mbaasemaleghlegh yô, vea ya dyako u tar, á saan ve iyol sha mngee u bem.” Ivur 29 la seer er: “Mbaperapera vea ya dyako u tar, vea lu ken u gbem.”
19. Kanyi kwaghwan sé lu̱ a mi ken ishima?
19 Se lu a kwaghwan u Pasalmi 37:34 la ken ishima, i kaa er: “Ver ashe hen TER, wa iko sha gbenda Na, tsô Una kende u sha, ú ya dyako u tar, ú nenge mtim u á tim mbaaferev kera yô.” Avur 37 man 38 kaa er: “Ver ishima sha or u vough, shi nenge sha or u mimi kpaa, gadia injar ngi sha ci u or u bem; kpa mbaasorabo yô, á tim ve imôngo icin i môm.”
20. Ka sha ci u nyi se kaa ser angan ka ashighe a ngirigh iyol se lu kimi?
20 Ka kwagh u nan ishimasurun tsô, een, ka kwagh u saan iyol kpishi u fan er Aôndo we ikyo shi kera shi ca ga tsô una bee a aferakaa man ican i yan cii! Ka kwagh u ngirigh iyol kpishi u kaven er shi ca ga tsô akaaôron a profeti a kpilighyol la aa iv!
[Mbampin Mba Ngeren u Henen]
[Foto u sha peeji 20 la]
Bibilo yange i̱ tsengaôron akaa a aa tese “ikav” i ayange a masejime yô
[Foto u sha peeji 22 la]
Shi ica ga tsô, mba ve vende mtemtor u Aôndo la á kar a ve kera ken Armagedon. Mba ve lumun la vea war vea nyôr ken tar u he u perapera
