Vegher u sha 5

Iwua I Kpilighyol I Eren Kwagh u Se Soo La

1, 2. Kanyi iwua i kpilighyol i̱ lu marami wase?

U KAVEN er i hii ve Aôndo a ne ican i yan ian man kwagh u una er shami yô, gba u se fa er yange er se la. Yange er kwagh hemba u gban se a iyol man hirinigh tsô la. Yange gba se a mhen u tsembelee kua aeren kpaa.

² Kwagh u tamen u ken mhen man mlu u ieren yase yô ka ian i eren kwagh u se soo la. Een, Aôndo yange wa mhen u tsuwan kwagh u se soo la ken a vese. Mimi je kwagh ne lu iwua i kpilighyol kpishi.

Er I Gbe Se La

3-5. Ka sha ci u nyi ian i eren kwagh u se soo laa i doo se?

³ De se time sha er ian i eren kwagh u se soo la i zough sha mne u Aôndo a ne ican i yan ian yô. Hiihii yô, hen sha kwagh ne: Doo ú u lun a ian i tsuwan kwagh u ú er shin ú ôr, kwagh u ú ya shin ikyondo i ú zer, imba tom i ú er, kua hen ape ú tema twev man mlu u mtem wou kpa? Shin ú soo wer orgen nana̱ kaan we shi nana̱ tesen we kwagh u ú eren sha hanma iaven ken uma wouwe?

⁴ Ma or u nan lu sha marami u nan nana soo er i ngohol mlu u uma u nan sha ikyev i nan kera kuaa nahan ga. Sha ci u nyi? Ka sha er Aôndo yange gba se je. Bibilo pase se er Aôndo yange gba or sha ‘ibeen man mlu’ na, shi môm ken mbamlu mba Aôndo iyolna a lu a mi yô ka ian i tsuwan u eren kwagh u a soo la. (Genese 1:26; Duteronomi 7:6) Zum u yange gba uumace kera la, a na ve mlu shon u kpilighyol la—iwua i ian i eren kwagh u ve soo la. Ngun ka môm ken akaa a a ne ve ka i lan se ishima shighe u mbakurantar ka vea kighir se sha ican yum je la.

⁵ Nahan isharen i lun ken uikyangen ga la i̱ va abu ga, gadia Aôndo ka Aôndo u lun ken uikyangen ga. Bibilo kaa er: “Hen ape Jijingi u Ter a lu yô, ikyangenev mbi her ga.” (2 Mbakorinte 3:17) Ka nahan yô, Aôndo yange na se ian  i eren kwagh u se soo la hingir ilyeghegh yasegh. Er yange fa gbenda u mbamhen asev man mbamlu asev vea eren tom yô, a fa er á hemba saan se iyol u lun a ian i eren kwagh u se soo la.

6. Ka nena Aôndo yange gba hirinigh asegh sha u ku̱ er tom vough a ian i eren kwagh u se soo laa?

⁶ U seer sha iwua i ian i eren kwagh u se soo la yô, Aôndo shi na se tahav mbu henen kwagh, tsuwan kwagh u se er la, shi fan mkposo u kwagh u vough a u bo. (Mbaheberu 5:14) Nahan, lu u ian i eren kwagh u se soo la ia har sha mhen u sha kwaghfan. Yange i gba se a mhen shio er myôm ma varen akaa nahan ga. Shin i er se er ishôso i i henen kwagh cii man i eren ga la ze. Kpa, yange i er hirinigh yasegh ku cieryol la ku zua lianaa a ian yase i tsuwan kwagh u se soo la.

Mhii u Hemban Doon Cii

7, 8. Ka mhii u dedoo u nyi Aôndo yange na mbamaren asev mba hiihii mbaraa?

⁷ U tesen ér Aôndo ngu a ikyo i wan, seer sha iwua i eren kwagh u se soo la yô, mbamaren asev mba hiihii, Adam man Ifa, yange ve lu a hanma kwagh u anti or je kpaa nana soo u lun a mi yô. Yange i ver ve ken zege paradiso, u lun er sule nahan. Ve lu̱ a akaa mgbeghaa. Ve lu̱ a mbamhen man ayol a vough, nahan lu u vea beeyol shin vea gba angev shin vea kpe kpaa ga—yange ma ve fatyô u lun uma gbem sha won. Yange ma ve mar ônov mba vough mba ve kpaa ma ve lu ken msaanyol, u tsôron ken hemen yô. Shi iyenge ior i i lu̱ seer a seer la yange ma i lu̱ a tom u dedoo u eren u geman tar cii ken hemen hingir paradiso.—Genese 1:26-30; 2:15.

⁸ Sha kwagh u yange i na la yô Bibilo pase er: “Aôndo gema nenge hanma kwagh u Un er yô, lu u doon tsung.” (Genese 1:31) Shi Bibilo i ôr sha kwagh u Aôndo er: “Tom Na ngu vough.” (Duteronomi 32:4) Een, Orgbanakaa yange na tsombor u uumace mhii u vough. Yange ma doo ma hemba nahan ga. Yange tese er un ngu Aôndo u lun a ikyo i wan tsô!

Ian i Lun a Akighir

9, 10. Er nan i lu keng u veren ikighir vough sha ian yase i eren kwagh u se soo laa?

⁹ Nahan cii kpa, Aôndo yange wa ishima er ian i eren kwagh u se soo la i̱ lu a akighir shio? Hen ase sha mlu u gar u a lu a akaahendan kpishi kpa atindi a hendan kwagh á lu ga, hanmaor nana fatyô u gban hendan kwagh veren ishigh ape nan soo cii sha ayem a nan soo cii tsô yô. Á doo ú u hendan kwagh hen imba ijiir la kpa? Ei, ngula á lu kwaghhendan a tindi shio man una va a uaikôr kpishi kpee je.

¹⁰ Kape iwua i Aôndo i ian i eren kwagh u se soo la kpaa í lu je la. Ian i lun a akighir shio ia va a anzughul. Gba u atindi aa lu sha u kuran aeren a ior. Mkaanem ma Aôndo kaa er: “Anza en a̱ lu er mba ve lu ken uikyangen ga nahan, shi mayange mlu wen u ken uikyangen ga la a̱ de gem a̱ hingir ne kwagh u eren ifer a mi ga.” (1 Peteru 2:16, JB) Aôndo soo er i̱ sôron ian i eren kwagh u se soo la vough vough sha ci u mkpeyol u hanma or. Yange washima er ian i eren kwagh u se soo la, i̱ de lu vindi vindi ga, kpa ikyo i wan i̱ lu, sha u ungwan hemen u tindi.

Atindi a Ana?

11. Ka atindi a an yange i gba se sha u se̱ kurana?

 ¹¹ Ka atindi a ana yange i gba se er se̱ kurana? Vegher u kwaghôron u ken 1 Peteru 2:16 ( JB) la kaa er: “Ne mba ikpan i orgen ga saa Aôndo.” Kwagh ne ka u lun ken kpan sha inja i mkighir ga, kpa, inja na yô, yange i gba se sha u lun ken msaanyol u hemban cii zum u se lu kuran atindi a Aôndo yô. (Mateu 22:35-40) Atindi a Na la, hemba hanma atindi a ior ve we cii, sha u nan ityesen i hemban doon. “Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zenden sha mi la.”—Yesaia 48:17.

12. Ka ian i nyi i tsuwan kwagh u se soo la í lu ken atindi a Aôndo?

¹² Er i lu nahan cii kpaa, atindi a Aôndo na ian i tsuwan kwagh u se soo la ken akighir a atindi la. Kwagh ne va a akaa kpishi a nan tsombor u uumace mdoo. Hen ase sha akaayan, akondo a zeren, ityogholov, ieev, man uya mba ve lu atô kposo kposo sha tar cii la. Mimi je ka hembe doon se u ma se tsough kwagh u se soo la sha ambaakaa ne a u den er orgen kposo nana̱ tsua á sha ci wase la.

13. Ka atindi a gbaaôndo a nyi i gbe u se kura keng sha ci u iwasen yase?

¹³ Nahan yange i gba se sha u lun ken msaanyol u hemban cii zum u se lu kuran atindi a Aôndo a we er or-uma nana̱ kuran la. Ka kwagh môm a u kuran atindi a Aôndo a igbetar la. Ikyav i tesen yô, aluer se venda tindi u sha gbaaôndo u myoho la man se tsuwe sha ijiir i taven se gba shin inya yô, se vihi iyol shin se kpe je kpaa. Aluer se venda atindi a ken atô u ayol a ase la man se de u yan kwaghyan, man mngerem, shin ôôn yô, se kpe je.

14. Ka nena se fa ser yange i gba uumace er ve̱ tile sha tseeneke ve a Aôndo shio ga?

¹⁴ Di vough er yange i gba se sha u se̱ kuran atindi a Aôndo a igbetar nahan, kape yange i gba se er se̱ kuran atindi a Aôndo sha aeren man mlu wase a mbagenev kpaa la. (Mateu 4:4) Yange i gba uumace er ve̱ tile sha tseeneke ve paleghaa a Oreren ve kpa ve̱ zua a mzehemen ga. Profeti Yeremia kaa er: “Or u zenden la, mvershigh u iaven i angahar a nan ngu sha ikev i nan ga. TERE, tsaham.” (Yeremia 10:23, 24) Nahan sha hanma gbenda cii yange i gba uumace sha u ve̱ lu sha ikyev i hemen u Aôndo, i̱ de lu u̱ ve ayol a ve ga.

15. Atindi a Aôndo yange ma lu ikyav mbi yuhwan hen Adam man Ifa?

¹⁵ U wan atindi a Aôndo ikyo la yange ma lu kwagh u yuhwan mbamaren asev mbahiihii mbara ga. Kpa, yange ma lu sha ci u mkpeyol ve kua u tsombor u uumace jimin cii. Luun er mba hiihii mbara yange vea kar akighir a atindi a Aôndo ga yô, hanma kwagh yange ma za vough. Jim yô, hegen ma se lu ken paradiso u kpilighyol u mkpeyol u tsombor u lun a dooshima, lun ken mzough! Ifer, ican i yan, man ku ma ve lu ga.

[Mbampin Mba Ngeren u Henen]

[Ufoto mba sha peeji 11 la]

Orgbanakaa yange na uumace mhii u vough

[Ufoto mba sha peeji 12 la]

A doo ú u hendan kwagh hen ape akaahendan a lu kpishi kpa atindi a hendan kwagh a lu ga yôô?