Kanyi I Dugh Ken Ihyembeato La?
Vegher u sha 7
Kanyi I Dugh Ken Ihyembeato La?
1-3. Ka inja nena shighe u a kar ne a tese er Yehova ngu voughlo?
SHA kwagh u ian i Aôndo i hemen la yô, kanyi i̱ dugh ken uderimbaanyomov mba or-umace á hemen sha tseeneke na a Aôndo shio laa? Uumace tese er ve hemba fan u hemen a Aôndo shinii? Aluer se gbide kwar sha ieren i or-umace i nzughul a orgenegh la yô, mimi je or kan shio.
2 Yange mbamaren asev mbahiihii mbara mba vende hemen u Aôndo je tsô, aahe man dondo je. Yange ve va a ican sha ayol a ve kua tsombor u uumace u ú due ken a ve cii. Man lu u vea waa ma orgen ga saa ve ayol a ve. Mkaanem ma Aôndo kaa er: “Ve er a Na dang, ve kera mba ônov Nav ga, mba a acôghol iyol.”—Duteronomi 32:5.
3 Akaa a mbayiase tese mimi u icin i Aôndo yange ta Adam man Ifa la er aluer ve undu mbamne mba Aôndo yô, vea vôngo man ken hemen yô vea kpe kera. (Genese 2:17; 3:19) Yange ve due sha ikyev i hemen u Aôndo kera, nahan shighe karen yô ve vôngo ve kpe.
4. Er nan ve se cii i mar se se lu waeng ga, se gbé angev shi se kpene?
4 Kwagh u yange mase eren ônov vev cii ken hemen la lu vough er Mbaromanu 5:12 a pase nahan: “Er isholibo nyôr shin tar sha or môm [Adam, orhemen u tsombor u uumace], man ku gema va sha ci u isholibo yô, nahan ku va sha ior cii.” Nahan yange mbamaren asev mbahiihii mbara mba vende hemen u Aôndo yô, ve hingir mbaasorabo mba lun a acôghol iyol. U zuan sha atindi a gbaaôndo a wan been ormaren u nan yô, mlu ve u waeng ga la lu cii kwagh u ve lu̱ a mi u vea na ônov vev je la. Kape i lu ve se cii i mar se a acôghol iyol, se gbe angev shi se kpen kpaa la.
5, 6. Akaa a mbayiase tese nyi sha iniôngon i or i van a bem man mzehemene?
5 Uderimbaanyomov kar imôngo. Ityar i utaha kume sha ayange ve shi kar yem. Hanma inja gomoti cii í kar i nenge. Nahan cii kpa, kwa kimbir kimbir, akaa a cieryol er tsombor u uumace. Er anyom a kar i kom dubu ataratar yô, gba u uumace ma ve ze hemen je ma ve kom u van a bem, mimi, man mtem u dedoo sha tar cii shi hegen nahan ma ve fe u eren aeren a dedoo tsema tsema anza er erdoo, mhôônom ma kôron, man ijoughave nahan.
6 Nahan cii kpaa, kwagh u a lu jim yô, gema ngu kposo je. Ma gomoti môm u orumace á ve a mi ngu a̱ fatyô u van a bem u mimi kua mtem u dedoo sha ci u ior cii ga. Ken derianyom u sha 20 ne tseegh, se nenge mtim u i tim ior umiliôn imôngo kule kule sha shighe u Mtim u zegeikpelaior kua msenge u i sôngo ior i hembe umiliôn 100 ken uitya la. Sha ayange a ase ne ior mba i ne ve atsan, i woo ve, shi i wuhu ken gaadi sha ci u m-ban u iyol kôron tsaha man mba mpav sha kwagh u pati yô ve ngee gande ôron.
Er í lu Nyian La
7. Á pase mlu u tsombor u uumace nyian nena?
7 U seer yô, time ase sha mlu u tsombor u uumace nyian. Ifer man ipila cii mba wuee. Mcimbim ma gban man tsô la samber hanma ijiir cii. Iangev mbi tsaren sha idya la tser tar. Bouange u cieryol u i yer er AIDS la kôr ior umiliôn imôngo. Ior umiliôn upue imôngo mba kpen ijen shin angev hanma inyom, kpa asande a ior kpeghee nga a ikpela inyar. Uumace mba vihin tar shi yan ishar sha ú kpaa. Uma u hen tsombor man mweikyo sha aeren kpa gba hanmajiir. Mimi je, uma u nyian ne tese mvihi u hemen ú ‘aôndo u tar u ainge ne,’ Satan. Tar u a lu orvesen sha ú ne ú ndôhôr, ngu a mhôônom ma zungwen shio, shi ú vihi vindi vindi.—2 Mbakorinte 4:4.
8. Ka sha nyi se fatyô u yilan akaa a uumace ve er la ser ka mzehemen u mimi ga?
8 Aôndo na uumace shighe kuma u vea ar sha mhembe u mzehemen ve sha kwaghfan u sangen yeke kua sha akaa a ombon kpaa. Kpa ka mzehemen u mimi ve zough a mi sha er i te ada man avaan kera kpa i gem i ve a uindyergbuuka, mato mba uitya, agirgi a tan ubom, kua ikyav mbi utyaav mbi bughur yemen ca laa? Ka mzehemen man ior ka ve fatyô u yemen sha iamegh kpa ve kera fatyô u lun imôngo ken bem shin tar ga laa? Ka mzehemen man ior ka ve lu a mciem u zenden sha ugodobi tugh, shin atetan je kpaa sha ajiir agen laa?
Kwagh u Shighe a Tese La
9, 10. (a) Uderimbaanyomov mba ve kar mbara ve tese waeng er nyi? (b) Er nan ve Aôndo una ngohol ian i eren kwagh u se soo la kera ga?
9 Kwagh u ikaren i uderimbaanyomov mba shighe ve tese yô er uumace vea fatyô u kôôm iaven i angahar a ve vough a hemen u Aôndo shio ga. Vea kôr cio ga di vough er vea fatyô u lun uma ga aluer ve ya kwagh ga, ve ma mngerem ga, shi ve ôô iôôn kpaa ga nahan. Ikyav ne ngi waeng: Yange i e̱r se ér se̱ har sha mkôôm u Orgbanakaa wase di vough er yange i gba se er se̱ har sha kwaghyan, mngerem, man ahumbe nahan.
10 Sha u nan aferakaa ian yô, Aôndo tese kwa môm vough injar i bo i yaren tom a ian i eren kwagh u se soo sha kwaghfan ga la. Man ian i eren kwagh u se soo la ka iwua i taver ishe je yô u ma i ngohol i̱ hen uumace kera yô, Aôndo de ér ve̱ nenge er myar u yaren tom a mi sha kwaghfan ga la i lu yô. Mkaanem ma Aôndo kaa mimi nahan er: “Or u zenden la, mvershigh u iaven i angahar a nan ngu sha i ikev i nan ga.” Shi ma ôr mimi kpaa zum u ma kaa nahan la er: “Or ka nana lu a tahav sha orgen yô, nan eren nan ican.”—Yeremia 10:23; Orpasenkwagh 8:9.
11. Ma hemen u uumace môm fatyô u been a ican i yan kpa?
11 Mne u Aôndo a ne ian er or a̱ hemen iyol i nan anyom dubu ataratar la tese gbar gbar er or kan shio u been a ican i yan. Ma shighe môm tsô kpaa a vande kôron cio ga. Ikyav i tesen yô, sha ayange a Tor Solomon u Iserael la, a kwaghfan na cii, kua inyaregh, man tahav nav je kpaa, a kan shio u sôron mzeiyol u va sha hemen u or la. (Orpasenkwagh 4:1-3) Sha gbenda shon môm, sha ayange a ase ne, shin er mzehemen a lu kpishi sha iwavaren nahan je kpaa, mbahemenev mba taregh kan shio u been a ican i yan. U gban kera je yô, akaa a mbayiase tese er hemen u uumace a Aôndo shio la seer a seer ican i yan a u been a i̱ la.
Mnenge u caa u Aôndo
12-14. Ka mbamtsera mba nyi vea va ken hemen sha mne u Aôndo a ne ican i yan ian laa?
12 Ian i Aôndo a ne ican i yan ne nyoon se kpishi. Kpa a nenge yem ca, a fa akaa a injaa a aa va due shami ken hemen yô. Mnenge u Aôndo ne una va aa mtsera hen akaa a i gbe sha won la, á lu sha anyom kpeghee tseegh shin udubu kpeghee tseegh tsô kpaa ga, kpa á lu anyom umiliôn imôngo, een, á lu gbem sha won je.
13 Aluer imba kwagh ne shi i̱ va er ken hemen man anti or nan vihi ian i eren kwagh u nan soo la sha u hunan gbenda u Aôndo a eren akaa yô, á kera lu kpee u nan nan shighe sha u nana̱ tese mimi u mbamhen mba nan ga. Er a vande nan mba hembanato anyom udubu imôngo yô, Aôndo tese gbenda u sha tindi ú a fatyô u yaren tom a mi hanma ijiir sha tar cii yô.
14 Er Yehova a ne aferakaa kua ican i yan ian hen shighe ne yô, á vande tesen gbar gbar er nyityô kwagh i i̱ lu sha ishima na ga yô ia fatyô u zan hemen ga. Ikyav ia vande tesen a anyiman shio er nyityô awashima u ior shin u ujijingi sha tseeneke ve cii una fatyô u van a mtsera u tsôron ga. Nahan yô, Aôndo una lu a ishô u hyeren hanma ihyembeato cii a atimbir shio. “Mbaaferev yô, Una tim ve kera.”—Pasalmi 145:20; Mbaromanu 3:4.
[Mbampin Mba Ngeren u Henen]
[Foto u sha peeji 15 la]
Yange mbamaren asev mbahiihii mba tsough u lun sha tseeneke ve a Aôndo shio yô, ken masejime ve beeiyol man ve mase kpen
[Foto u sha peeji 16 la]
Mhemen u uumace a Aôndo shio la va ve a aahe
[Ngeren u pasen orngeren]
U.S. Coast Guard photo
