Mba Wan Imaagh Ki Tar u He La Hegen
Vegher u sha 11
Mba Wan Imaagh Ki Tar u He La Hegen
1, 2. Sha u ivin kwaghôron u Bibilo u profeti yô, kanyi i lu eren sha ashe ase je?
KWAGH u kpilighyol ugenegh yô mba wan imaagh ki tar u he u Aôndo la hegen je, er tar u tse u Satan ne ú lu hemban vihin a vihi nahan kpaa. Sha ashe ase je, Aôndo ngu kohol ior ken akuraior a sha won cii ijiir i môm mba hingir imaagh ki tar u he u i kera shi ca ga u̱ ua kar a tema sha ityough ki tar u u pav ker wue wue nyian ne. Ken Bibilo, ken 2 Peteru 3:13, i yila nongoior u he ne er “tar u he.”
2 Kwaghôron u Bibilo u profeti shi ôr kpaa er: “Sha ayange a masetyô yô, [shighe u se lu ker hegen ne] . . . , ior kpishi vea za, vea kaa er: Va sé kôndo nen sha uwo u TER [mcivir na u mimi la], . . . A̱ tese se igbenda Na, se kpaa se zende sha igbenda Na.”—Yesaia 2:2, 3.
3. (a) Ka sha unô kwaghôron u profeti u Yesaia la a lu ivini? (b) Takerada u masetyô u Bibilo na kwaghôron sha kwagh ne er nyi?
3 Kwaghôron u profeti la ngu ivin hegen hen atô u mba ve ne ayol a ve ‘sha igbenda i Aôndo shi ve lu zenden sha igbenda na kpaa la.’ Takerada u masetyô u ken Bibilo la ôr kwagh u nongoior u soon dooshima ne er ka nongoior u ityar ityar ka “zegeikpelaior . . . ve due ken hanma ikurior man hanma nongo man hanma nongoior man hanma zwa kpaa,” ka mzough u mimi u anmgbianev sha won cii mba ve civir Aôndo kangenaa yô. Shi Bibilo kaa er: “Mban ka mba ve dugh ken zegecan la yô.” Inja na yô, vea war mtim u botar ne.—Mpase 7:9, 14; Mateu 24:3.
Mzough u Mimi u Anmgbianev sha Tar Cii
4, 5. Hii nan ve Mbashiada mba Yehova ve fetyô u lun a mzough u anmgbianev tar sha won ciili?
4 Mbashiada mba Yehova umiliôn kpishi mba nôngon sha mimi er vea yar tom a akaawan a Aôndo man igbenda na. Ishimaverenkeghen ve i uma u tsôron la har sha tar u he u Aôndo la. Sha u wan atindi a Aôndo ikyo ken uuma vev ayange ayange la, mba tesen un mlumun u ve lumun vangertiôr er vea na ayol a ve sha gbenda na u hemen la hegen man ken tar u he kpaa la. Hanma ijiir cii, shin vea due ken nyityô nongoior shin zwa kpaa, mba kor atindi shon môm tsô—a i nger ken Mkaanem ma Aôndo la. Ka ityôkyaa i i ne ve ve lu mzough u anmgbianev sha won u mimi, mtem u ior u he u Aôndo a ve a mi je la.—Yesaia 54:13; Mateu 22:37, 38; Yohane 15:9, 14.
5 Mbashiada mba Yehova ya gwa sha mlu u ve lu mzough u tseer tseer u anmgbianev sha tar cii la ga. Ve fa er kwagh ne ka tahav mbu jijingi u Aôndo mbu lu eren tom sha ior mba ve we ayol a ve sha atindi na yô. (Aerenakaa 5:29, 32; Mbagalatia 5:22, 23) Ka m-ertom u Aôndo. Er Yesu yange ôr nahan, “akaa a or fe a ityô ga la, Aôndo fa a ityô.” (Luka 18:27) Nahan Aôndo shon u yange na sha u tar u̱ lu sha won gbem la ka un shi a ne sha u tar u he u̱ lu sha won gbem ye.
6. Er nan a fatyô u yilan mzough u anmgbianev u Mbashiada mba Yehova la er ka ivande i ainge?
6 Sha nahan yô, a fatyô u nengen a gbenda u mtemtor u Yehova ken tar u he la hegen je ken kwagh u á lu eren sha u wan imaagh ki tar u he la. Man kwagh u a er a Mbashiada nav la, á fatyô u kaan er, ka ivande i ainge. Sha ci u nyi? Sha ci u á maa Mbashiada mba Yehova hingir mzough u mimi u anmgbianev tar sha won cii, imaagh ki a fatyô u hemben sha mbampav mba nongoior, ikurior, shin huwa u ken kwaghaôndo kpaa ga yô. Er Mbashiada ve lu umiliôn kpishi shi ve lu ken ityar i hembe 200 nahan kpaa, ve zua mba kwagh môm kangenaa ken mzough u una hembe mayange ga yô. Mzough u anmgbianev tar sha won cii, u hii sha igbetar je a hembe duen tseer tseer ne, mimi je ka ivande i ainge—ka m-ertom u Aôndo.—Yesaia 43:10, 11, 21; Aerenakaa 10:34, 35; Mbagalatia 3:28.
U Fan Ior Mba Aôndo
7. Ka nena Yesu yange kaa er á fa mbahenen nav mba mimi?
7 Shi kanyi igenegh ia wase u fan ior mba Aôndo a lu yaren tom a ve sha u ve̱ lu imaagh ki tar na u he laa? Ka shami, ka unô ve iv mkaanem ma Yesu ken Yohane 13:34, 35? Yange kaa er: “M ngu nan ne tindi u he sha u doo nen ayol a en yô; er ne doom ishima nahan, kape ne kpaa, doo nen ayol a en vough la. Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” Mbashiada mba Yehova na mkaanem ma Yesu mara jighjigh shi mba yaren tom sha ma kpaa. Er mkaanem ma Aôndo ma we kwagh nahan, ve ‘doo ayolave sha gbashima je.’ (1 Peteru 4:8) U seer yô, ‘[ve] haa dooshima iyol, ka kwagh u maghen mlu u vough je la.’ (Mbakolose 3:14) Nahan dooshima u anmgbianev la ka “tsur” u u kôr ve ijiir i môm tar sha won cii yô.
8. Ka nena 1 Yohane 3:10-12 a seer pasen ior mba Aôndo?
8 Shi, 1 Yohane 3:10-12 kaa er: “Ka sha kwagh ne man i pase ônov mba Aôndo a ônov mba diabolo ye; hanma or u nan eren perapera ga yô, nan due hen Aôndo ga, man shi u anmgbian u nan a doo nan ishima ga la kpaa. Gadia ngun ka loho u ne ungwa sha hiihii ne: ka u ma se doo ayol a ase, i de luun er Kain u a due ken Orbo man a wua anngô na la nahan ga.” Sha ityôkyaa ne yô, ior mba Aôndo mba eren tswam ga, ka anmgbianev tar sha won cii.
Ikyav Igenegh i Fan Ve
9, 10. (a) Ka sha nyi tom á fa mbatomov mba Aôndo ken ayange a masetyô ne? (b) Ka inja nena Mbashiada mba Yehova ve iv Mateu 24:14?
9 Gbenda ugen kpa ngu u fan mbatomov mba Aôndo. Ken kwaghôron u profeti sha kwagh u mkur u tar la, Yesu yange pase akaa kpishi a aa tese ikyav ér iaven i shighe ne ka ayange a masejime yô. (Nenge Vegher u sha 9 ken antakerada ne.) I ter kwagh u vesen u ken kwaghôron u profeti ne ken Mateu 24:14: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”
10 Se nenge kwaghôron u profeti la ngu ivin kpa? Een. Er ayange a masetyô la yange hii ken 1914 je, Mbashiada mba Yehova pase loho u dedoo u Tartor u Aôndo sha tar cii sha gbenda u Yesu yange tese la, inja na yô, ka u zan sha uya mbaiorov je la. (Mateu 10:7, 12; Aerenakaa 20:20) Mbashiada umiliôn kpishi mba ze hen ior ken hanma tar sha u ôron ve kwagh u tar u he la. Kwagh ne na yô we kpaa ú zua a antakerada ne, sha ci u tom u Mbashiada mba Yehova ve eren la kua u gberen shi samber a agbenger a ityakerada ubiliôn imôngo sha kwagh u Tartor u Aôndo. Ú fa ma orgenegh u nan pasen kwagh u Tartor u Aôndo sha uya uya sha tar cii kpa? Man Marku 13:10 tese er tom u pasenkwagh shi tesen ne saa á “vande” eren ú keng, cii man mkur una kuma ye.
U Nan Ikyar sha Kwagh u Tamen u sha Uhar La
11. Kanyi igenegh kpaa Mbashiada mba Yehova ve er sha u wan iyol ve sha mtemtor u Aôndo?
11 Sha u wan ayol a ve sha u kuran atindi a Aôndo man uiniezwa nav yô, Mbashiada mba Yehova shi mba eren kwagh ugen kpaa. Mba tesen ér Satan er aie zum u yange kaa er uumace vea kera lu jighjigh hen Aôndo ga aluer mba ken imeen la, sha nahan yô, ve na ikyar sha kwagh u tamen u sha uhar u a zough sha mtile u uumace sha mimi la. (Yobu 2:1-5) Er ve lu mzough u ior mba ve dugh ken akuraior umiliôn imôngo ken ityar cii yô, Mbashiada tese, sha gungur môm, jighjigh u nan ken mtemtor u Aôndo. Shin er ve lu uumace mba ken myen nahan kpaa, ve tile dôung ken vegher u Aôndo sha kwagh u tarhemen u sha won cii la, shin er Satan a ve a mbamkighir nahan kpaa.
12. Sha jighjigh u nan ve la, ka unô Mbashiada ve kavena?
12 Nyian, Mbashiada mba Yehova mba ve lu umiliôn imôngo ne ve seer shiada ve sha gôgô nongo u mbashiada mba sha ayange a tsuaa mba yange ve tese jighjigh u nan ve hen Aôndo la. Mbagen ken a ve yô lu Abel, Noa, Yobu, Aberaham, Sara, Isaka, Yakob, Debora, Rutu, Davidi, man Daniel, se yila ati kpeghee tsô. (Mbaheberu, ityough 11) Er Bibilo i ôr nahan, mba ‘ikpela i mbashiada mba jighjigh.’ (Mbaheberu 12:1) Mban man mbagenev kua mbahenen mba Yesu kpaa yange ve tile sha mimi hen Aôndo. Man Yesu iyolna yange tese ikyav i hemban cii sha mtile na sha mimi u vough la.
13. Ka mkaanem ma Yesu sha Satan ma nyi ma dugh mimi?
13 Kwagh ne tese er kwagh u Yesu yange ôr sha iyol i Satan hen mbahemenev mba kwaghaôndo la ka mimi: “Kpa Mo u M lu Or u kaan ne mimi u M ongo hen Aôndo ne yô, ne mba keren Mo a ku hegen . . . Ne yô, ka ken ter wen diabolo je ne dugh ye, man ka ne ka eren asaren a ter wen; un yô lu orwuanor sha hiihii je, man a tile sha mimi ga sha ci u mimi ngu ker a na ga. Ka una eren aie yô, i lu sha mlu na je a lu ôron kwagh ye; gadia ka or u aie shi ka ter u aie kpaa.”—Yohane 8:40, 44.
Kanyi U Tsougho?
14. Kanyi i lu eren imaagh ki tar u he la hegene?
14 Imaagh ki tar u he ki Aôndo a we hegen ken mzough u Mbashiada mba Yehova ken akuraior a sha won cii ne ki hemban taver a taver. Hanma inyom yô ior deri udubu imôngo mba yaren tom a ian i eren kwagh u ve soo la, sha mfe u vough u ve zough a mi yô, u ngohol mtemtor u Aôndo. Ve hingir vegher u nongo u tar u he la, ve tile ken vegher u Aôndo sha kwagh u tarhemen, man ve tese er Satan ka oraie.
15. Kanyi tom u mpav á va er sha ayange ase nee?
15 Sha u tsuan mtemtor u Aôndo yô, vea kuma u á ver ve ken ‘uwegh ku yanegh’ ku Kristu er una lu paven “iyôngo” veren kposo a “ivo” la. Ken kwaghôron na u profeti sha kwagh u ayange a masetyô la, Yesu yange tsengakaan er: “Á kohol akuraior cii sha ishigh Nagh, Una pav ve kposo er orkuranilev ka nan pav iyôngo a ivo nahan. Una ver iyôngo ken uwegh Nagh ku yanegh, kpa ivo yô, Una ver i ken uwegh Nagh ku imesegh.” Iyôngo la ka mba ve kohol imôngo a anmgbianev mba Kristu shi ve sue ve yô, mba ve ne ayol a ve sha mtemtor u Aôndo la. Ivo la di ka ior mba taver ityou mba ve vende anmgbianev mba Kristu shi ve er kwagh môm sha u suwen mtemtor u Aôndo kpaa ga yô. Kanyi ia due kereghe? Yesu kaa er: “Mbara [ivo la] vea kar vea yem ken mtsaha u tsôron; kpa mbaperapera [iyôngo la] yô vea nyôr ken uma u tsôron.”—Mateu 25:31-46.
16. Kanyi i lu i ú er keng aluer ú soo u lun uma ken Paradiso ua lu van la yôô?
16 Mimi je, Aôndo we ikyo sha kwagh wase! Shi kpeghee tsô una va a tar u paradiso u doonashe. Ú soo u va lun ken Paradiso la kpa? Aluer ka nahan yô, tese iwuese you sha mbamne mba Yehova la sha u henen kwagh na shi yaren tom sha akaa a ú hen kwagh sha á la. “Ker nen TER er ian i zuan a Na i lu her yô, yila nen Un er A lu ikua ikua ne. Iferor nana̱ undu gbenda u nan; u nan lu perapera ga kpaa, nana̱ gbihi mbamhen mba nan kera, nana̱ hide hen TER, tsô Una zungwe nan mhôônom.”—Yesaia 55:6, 7.
17. Er nan shighe u vihin a kera lu sha u tsuan or u ú civir la ga?
17 Shighe u vihin kera ngu ga. Mkur u tar u tse ne ngu ikua ikua. Mkaanem ma Aôndo wa kwagh er: “Tar u̱ de kera doon ne ishima ga shin akaa a [a] lu shin tar tsô kpaa ga. Aluer anti or tar ua doo nan ishima yô, dooshima u Ter ngu ken a nan ga . . . Man tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.”—1 Yohane 2:15-17.
18. Kanyi ieren ia wase ú u veren ishima ken hemen a vangertiôr wer ú va lu uma ken tar u kpilighyol u he laa?
18 Mba tesen ior mba Aôndo hegen sha ci u uma u tsôron ken tar u he la. Mba henen akaa a ken jijingi kua ityomaveegh igenegh i kwagh a va gba shami sha u samber a paradiso la. Se mba wan we kwagh ser tsuwa Aôndo a̱ lu Orhemen wou shi wase ken tom u waren uma u á ne i lu eren tar sha won cii nyian ne. Hen Bibilo a Mbashiada mba Yehova, nahan fa Aôndo u á we ikyo sha kwagh wou sha mimi man á lu van a mkur u ican i yan kpaa la. Sha gbenda ne yô we kpaa ú fatyô u hingir vegher u imaagh ki tar u he la. Hen shighe la ú fatyô u veren ishima wer ú zua a mlumun hen Aôndo shi ú lu uma gbem sha won ken tar u kpilighyol u he la.
[Study Questions]
[Foto u sha peeji 31 la]
Mbashiada mba Yehova mba a mzough u mimi u anmgbianev tar sha won cii
[Foto u sha peeji 32 la]
Mba wan imaagh ki tar u he u Aôndo la hegen
