Tar u He u Kpilighyol u Aôndo A Lu Eren La
Vegher u sha 10
Tar u He u Kpilighyol u Aôndo A Lu Eren La
1, 2. Kanyi ia er shighe u ityav mbi Armagedon mbia ese tar mbia kar kera yô?
ITYAV mbi Aôndo mbi kilen tar mbi Armagedon la mbia been yô, shi a lu nyi? Hen shighe la kov u he u engem ua hii. Mba waren Armagedon, er vea vande tesen ishoon ve sha mtemtor u Aôndo yô, á nyôr a ve ken tar u he la. Á lu iaven i he i saan iyol hen shighe la er mbamtsera mba kpilighyol vea due hen Aôndo vea samber sha tsombor u uumace cii yô!
2 Sha ikyev i Tartor u Aôndo, mbawaren mbara vea hii u maan paradiso. Vea yar tom a agee a ve cii sha akaa a aa wase mba vea lu uma hen shighe la yô. Tar ua hii u geman hingir yaav mbu doonashe, mbu bem, man mbu kuman kpaa sha ci u uumace.
Perapera kar Tile sha Ityough ki Ifer
3. Ka myôhôriyol u nyi á zua á mi fese je er Armagedon á kar kera laa?
3 Kwagh ne cii a er sha mtim u tar u Satan. Ukwaghaôndo mbaaiev mba van a mbampav, mbamzough mbaiorov, shin ugomoti kpaa vea kera lu mayange ga. Atesen a Satan a samber a mi sha u tsughun ior la cii aa kera lu ga; agbaatom a wasen atesen shon cii aa tim imôngo aa tar u Satan. Hen ase yôô: bo-ahumbe u tar u Satan ne cii á wanger un kera! Ngula á peveriyol tsô!
4. Pase mgem u ityesen u una va la.
4 Tsô a kar a mbamhen mba van a mtim mba mtemtor u or la kera a gema a ver ityesen i maan a maa i i dugh hen Aôndo la. “Ônov ou ci ca kpaa vea lu mba TER A tese ve yô.” (Yesaia 54:13) Er á lu nan ityesen i injaa ne anyom anyom yô, “tar ua mgbough a mfe u TER er mngerem ma ngee shin zegemnger nahan.” (Yesaia 11:9) Ior vea kera hen kwaghbo ga, kpa “mba ve tem shin tar la mba henen perapera.” (Yesaia 26:9) Ka mbamhen kua aeren a maan a maa tseegh aa lu hen shighe la ye.—Aerenakaa 17:31; Mbafilipi 4:8.
5. Kanyi ia er aferakaa man aferaioro?
5 Nahan yô, iwoo-or ia kera lu ga, shin ipira, myavakwase sha igyosough, numgbenda, shin nyityô ifer igenegh kpaa ga. Ma or môm kpaa nana kera ya ican sha ci u aferakaa a mbagenev ga. Anzaakaa 10:30 kaa er: “Mbaperapera yô, á tenger a ve mayange ga, kpa aferaior yô aa tsa ken tar gbem ga.”
Mkpeyol u Vough Hide Her
6, 7. (a) Ka mimi u taver u nyi mtemtor u Tartor una kar a mi kera? (b) Ka nena Yesu yange tese kwagh ne zum u a lu shin tar laa?
6 Ken tar u he la, a kough ubombaakaav mba ihyembeato i hiihii yange i va a mi la cii kera. Ikyav i tesen yô, mtemtor u Tartor una bee a angev man iyolbeen. Nyian ne, aluer kpe ú iyol nena je kpaa, mimi u a tsee ken vanger tsung yô e̱r ú lu beenyol la, ashe ou aa hii u nengen ciin, anyi ou aa hii u hôôn, ú hii u ungwan taveraa, kwaviyolough wou ua hii u haan adivir, alegh a iyolough ou a ken atô aa vihi, zan zan ken masejime yô ú kpe.
7 Nahan cii kpa, shi ca ga tsô akaa a nyoon a yange se zua a mi hen mbamaren asev mba hiihii la cii aa kar kera. Ú umbur kwagh u Yesu yange tese sha mkpeyol zum u á lu shin tar la kpa? Bibilo kaa er: “Ikpelaior va her a na, ve lu a mbasombon man mbakeer man mbaapirashe man mbakondonaker, man mbagenev kpaa kpishi, ve va ver ve hen ikum Na nahan A war ve; kpiligh ikpelaior iyol, er ve nenge mbakondonaker lu lamen, mbakeer hingir dedoo, mbasombon lu zenden, mbaapirashe lu nengen.”—Mateu 15:30, 31.
8, 9. Pase msaanyol u una va shin tar u he shighe u a hide aa mkpeyol u vough la.
8 Zege msaanyol una lu ken tar u he la er mbamkpeyolga asev cii a bee a ve la! Ican i i ve sha ci u mkpeyolga la ia kera za se iyol mayange ga. “Ma or u nan tem ker kpaa nana kera kaa er: Kwagh nyoon mo, ga.” “Tsô á bugh mbaapirashe ashe, man á bugh mbakondonato ato. Tsô orkeer nana gba tsuwen er ashim nahan, man nombor u orkondoniker kpaa ua wa icam.”—Yesaia 33:24; 35:5, 6.
9 A saan iyol u nderen hanma sev kaven wer ú hemba ngun gbon gbon a er nyen ú lu la ga he? A kundu mbabeenyol iyol u fan ér mba hiden hingir iyev her ayange ayange, zan zan vea yem tegh tegh vea za ar sha mlu u vough u Adam man Ifa yange ve ember sha hiihii la gaa? Bibilo er ityendezwa er: “Zum la inyam i nan ia hingir hegh á hemba i wanye kpaa; nana hide nana hingir er sha ayange a nan lu iyev la yô.” (Yobu 33:25) A lu kwagh u saan iyol u tan ajingi a sha ashe la kera, akaa a wasen u ungwan, gyôdô mba zenden a mi, akeke a mbaawanev, man mcimbim tsô! A kera ker ayouacii, mbatwerev, man mbasôron anyi ga.
10. Kanyi ia er ku?
10 Ior mba vea ember imba mkpeyol la nahan a sar ve u kpen ga. Man a gba u vea kpe kpaa ga, sha ci u uumace vea kera lu ken kwar u dyako i myen man ku la ga. Kristu “Una ya tor keng, zan zan Una gema mbaihomov Nav cii, vea lu shin angahar a Na. Orihom u masetyô u á tim un kera yô, ka ku.” “Iwua i sha mrumun u sha mhôôn u Aôndo yô, ka uma u tsôron.”—1 Mbakorinte 15:25, 26; Mbaromanu 6:23; shi nenge Yesaia 25:8.
11. Mpase sav ôron mbamtsera mba tar u he la nena?
11 U jimin ôron mbamtsera mba á va zua a mi sha ikyev i Aôndo u a we tsombor u uumace ikyo la ken Paradiso yô, takerada u masetyô u Bibilo kaa er: “[Aôndo] Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:3, 4.
Mbakpenev Hide
12. Ka nena Yesu yange tese tahav mbu Aôndo na un mbu nderen ior shin ku la?
12 Yesu yange er kwagh hemba u been mbauangev angev shi sôron mbakpenalegh alegh ve. Shi yange hide a ior mba ve lu̱ shin iwar la kpaa. Sha u eren nahan la a tese tahav mbu kpilighyol mbu mnder u shin ku mbu Aôndo na un la. Ú umbur ihongo i Yesu yange za hen ya u orgenegh u wan na u kwase kpe la kpa? Yesu yange kaa a wankwase u lu kpenegh la er: “Wankwase, M ngu kaan we Mer, mough sha!” Kanyi yange i̱ ere? “Fese nahan wankwase la mough sha, gba zenden.” Ior mba ve lu her la mba nengen kwagh ne yô, “cier ve iyol je zua ga.” Yange taver ve u kighir msaanyol ve!—Marku 5:41, 42; shi nenge Luka 7:11-16; Yohane 11:1-45.
13. Ka ambaaior a nyi á va nder ve?
13 Ken tar u he la yô, ‘á nder mbaperapera kua mba ve lu perapera ga kpaa shin ku.’ (Aerenakaa 24:15) Hen shighe la Yesu una yar tom a tahav mbu Aôndo a ne un la u nderen mbakpenev, er yange ôr nahan, “Mo M ngu mnder man uma kpaa; or u nana nam jighjigh yô, shin nana kpe kpaa, nana lu uma.” (Yohane 11:25) Shi yange kaa er: “Mba ve lu shin iwar cii [mba Aôndo a umbur ve la] vea ungwa imo Na [í Yesu], vea due kpaa.”—Yohane 5:28, 29.
14. Er ku ua kera lu ga yô, ka nyi akaa á va kar a mi kera?
14 Á lu zege iember je una lu sha tar cii zum u mbakpenev atihi atihi vea lu nderen hiden zuan imôngo a mbadoon ve ishima la ye! Ikyuyôôn ia kera lu sha u nan mbaumav ijungwen ga. Kpa, alaghga a lu kwagh ugenegh kposo una lu eren ye: a lu yôôn mba i sember nderen shin ku la sha u van a iember hen mbadoon ve ishima. Nahan ikyuiin ia kera lu ga, atihi a ikon a nanden ikyom kpaa ga, ayou a nanden mbakpenev, shin ajiir a iin mbakpenev kpaa je ga!
Tar u Bem u Mimi
15. Ka inja nena kwaghôron u profeti u Mika la una iv vindi vindi?
15 A zua a bem u mimi ken hanma vegher u uma cii. Ityav, mbawasen ityav, kua mba varen ikyav mbi utyaav cii a kar a ve kera. Sha ci u nyi? Sha ci u mpav u akuraior, ijô, kua akumaior cii a kar a mi kera. Hen shighe la, sha gbenda u hemban cii, “ma ikurior ia kera tsuwa sanker a ikur igen ga, man shi aa kera hen ityav kpaa ga.”—Mika 4:3.
16. Kanyi Aôndo una er ve ityav mbia kera lu ga kuaa je?
16 Alaghga kwagh ne una kunda iyol sha er or-uma a tese isharen i haan awambe inya man ityav mbi nôngon hii sha igbetar je yô. Kpa kwagh ngu nahan sha ci u or-uma ngu sha ikyev i mtemtor u uumace man azôv. Ken tar u he la, sha ikyev i mtemtor u Tartor la yô, ka kwagh u una er ne: “Va, va nenge nen ityom i TER . . . A er ityav mbi bee zan zan ar hen ikighir i tar je, A sombo ada, A kever iwange, A nande akekeautya sha usu.”—Pasalmi 46:8, 9.
17, 18. Ken tar u he la, ka nyi mlu ia lu hen atô u or man ishôso?
17 Or man ishôso kpaa vea lu ken bem, vough er yange ve lu̱ ken Eden nahan. (Genese 1:28; 2:19) Aôndo kaa er: “Sha iyange la Me ya ikur sha ci ve a inyamtoho man inyon i sha man akaa a kpelan iyav inya; man . . . Me na vea tema bem bem.”—Hosea 2:18.
18 Bem la una samber á kuma nena? “Zum la gbaseela una teman vea waniyôngo imôngo, anyam kpaa una yaven a wanivo imôngo; gumbua man gumbegha kua icighanile vea teman imôngo, wanye u kpeghee una hemen ve.” Mayange ishôso ia kera anger or shin ayol a ve kpaa ga. “Begha je kpaa una ya toho er bua nahan”!—Yesaia 11:6-9; 65:25.
I Gema Tar Hingir Paradiso
19. A gema tar ua hingir nyi?
19 A gema tar cii ua hingir paradiso sha ci u uumace. Ka ityôkyaa i i ne ve Yesu yange tôndozwa a or u na un jighjigh la ye er: “Ú lu a Mo imôngo ken Paradiso.” Bibilo kaa er: “Taaikôngo man ikpoghonya vea lu sar sar, deserti una ember, una mondo er ishohough nahan. . . . Gadia mngerem maa due shin inya ken taaikôngo kua uikuwanmbamngerev kpaa ken deserti.”—Luka 23:43; Yesaia 35:1, 6.
20. Er nan ve ijen ia kera na or-umace ican mayange ga?
20 Sha ikyev i Tartor u Aôndo yô, mayange ijen ia kera er ior umiliôn ican sha won ga. “Iyiav mbi̱ ngee shin tar sha ityouv mbi iwoov je kpaa.” “Ikon i ken ikôngo ia ume atam, man tar kpaa ua doo iyiagh, vea tema bem bem ken tar ve.”—Pasalmi 72:16; Esekiel 34:27.
21. Kanyi ia er mlu u m-ban u ijiir i tsan, uikyasen mba côugh côugh, man akôngo a bo?
21 Mayange ibanave ia kera lu ga, ior mba banen a ijiir i tsan kpaa ga, shin uikyasen mba lun côugh côugh, shin haregh mba ifer i hembe ve ave kpaa je ga. “Vea maa uya man vea tema keregh, vea kaha ishule i ikon i wain, man vea ya atam a i. Mayange vea maa ya, orgen á kar á tema ker ga, vea lôô, man orgen á kar á ya, ga.” “Hanmô ve nana tema shin itine i kon u wain u nan, man shin itine i kon u tur u nan, ma or nana kera ta ve mciem iyol ga.”—Yesaia 65:21, 22; Mika 4:4.
22. Bibilo pase averen a mtemtor u Aôndo la nena?
22 Uumace vea zua a averen ne cii, a hemba nahan je kpaa, ken Paradiso. Pasalmi 145:16 kaa er: “[Aôndo] U bugh uwegh Ough, U ne hanma kwagh u uma sha isharen na, ka kom un.” Kape i lu ve kwaghôron u Bibilo u profeti a kaa nahan ye er: “Mbaasemaleghlegh yô, vea ya dyako u tar, á saan ve iyol sha mngee u bem. . . . Mbaperapera vea ya dyako u tar, vea lu ken u gbem.”—Pasalmi 37:11, 29.
U Sôron Kwagh u Tse
23. Ka nena Tartor u Aôndo ua sôr ican i se vande yan laa?
23 Mtemtor u Tartor u Aôndo una sôr akaa a a tser tsombor u uumace ken anyom dubu ataratar a a kar la cii. Iember i hen shighe la ia kar a pir nyityô ican i ior yange ve vande yan la ca je. A za uma iyol sha mba m-umbur mba ican i ngise i ya la ga. Mbamhen man ityom i maan a maa i uma u ior u ayange ayange la tegh tegh tsô una ese mba m-umbur mba akaa a nyoon a tse la.
24, 25. (a) Kanyi Yesaia yange tsengakaan er ia ere? (b) Er nan se fatyô u fan ser atsan á tse la aa hungur se?
24 Aôndo u lun a ikyo i wan la yôô wen-er: “M ngu gban Usha u he [gomoti u sha u he sha uumace] man tar u he kpaa [uumace mbaperapera]; á kera umbur akaa a tsuaa la ga, man shi aa kera va or ken ishima kpaa ga. Kpa lu nen saan saan, ember nen gbem sha kwagh u M lu gban yô.” “Tar cii hingir bem bem, u mem; i gba wan atsam ember.”—Yesaia 14:7; 65:17, 18.
25 Nahan sha ikyev i Tartor na yô, Aôndo una gema mlu u bo u a tse yum ne vindi vindi. Una tese ikyo i wan na i vesen la hen avese gbem sha won sha u haan averen a aa hemba hanma iyolvihin i ngise se zua a mi la. Hen shighe la mbamzeiyol mba se zough a mi cii vea lu ica hiinii ken mhen wase, aluer se soo u umbur ve je kpaa.
26. Ka sha ci u nyi Aôndo una kimbi se sha atsan á se vande yan laa?
26 Kape Aôndo una kimbi se sha atsan a yange se wa ishima se ya shin tar ungun je la. Á fa je er yange lu ibo yase sha er yange i mar se a myen la ga, sha ci u yange se ya dyako i myen hen mbamaren asev mbahiihii mbara. Yange lu sha ibo yase i mar se ken tar u Satan ga, sha ci u aluer Adam man Ifa yange vea til sha jighjigh yô, ka ken paradiso ma i mar se ye. Nahan sha u tesen mhôônom ma kôron tsung yô Aôndo una er á doo je á hemba akaabo a ngise i er sha avese la.
27. Ka akaaôron a profeti á hana aa iv sha gbenda u kpilighyol ken tar u he laa?
27 Ken tar u he la, uumace vea due ken uikyangen kera er i tsengaôron ken Mbaromanu 8:21, 22 nahan: “Akaa a i gbe a la kpaa á va pase a sha ikyev i mlu u hôôn á tuhwa, á za a mi ken mlu u engem u lun a ikangenev ga u ônov mba Aôndo la. Gadia se fa akaa a i gbe a sha won cii la nga kinen imôngo nga toghor zan zan hegen.” Hen shighe la ior vea nenge msen ne una iv vindi vindi: “Tartor Wou u̱ va, i̱ er ishima You shin tar kpaa vough er i eren i Sha nahan.” (Mateu 6:10) Mbamlu mba kpilighyol mba sha tar u Paradiso la vea tese mbamlu mba shaav.
[Study Questions]
[Foto u sha peeji 23 la]
Ken tar u he la, mbabeenyol vea hide sha gbon gbon ve u uye la
[Foto u sha peeji 24 la]
Mbamnyoon man awan cii a kar a mi kera ken tar u he la
[Foto u sha peeji 25 la]
Ken tar u he la, a nder mbakpenev
[Foto u sha peeji 26 la]
‘Vea kera hen ityav ga’
[Foto u sha peeji 27 la]
Uumace man ishôso vea lu ken bem jim ken Paradiso
[Foto u sha peeji 27 la]
‘Aôndo una bugh uwegh nagh una na hanmakwagh u uma sha isharen na’
[Foto u sha peeji 28 la]
Tartor u Aôndo ua na se akaa a hemba atsan a se vande yan la
