Kwaghôron u Profeti 4. Dooshima Ban Hen Atô U Noov A Kasev Vev

“Ior vea hingir . . . mba lun a dooshima ga.”—2 TIMOTEU 3:1-3, Bibilo i i lu Mkaanem ma Aôndo la kaa nahan.

● Kwase ugen iti na ér Chris, eren tom vea nongo u wasen mba noov vev shin kasev vev ve er tswam a ve yô, hen tiôntar u North Wales, ken tar u Britain. A kaa ér, “Kwagen la kwase ugen za va hen afishi a ase. Yange i vihi un iyol kpishi je yô, m nenge a na kpa m lu fan kwase shon ga, man lu kwase u m vande fan un yô. I er kwagh a kasev mbagenev caveraa je yô, u kenger sha or je kpa kunya ka u kôr ve.”

IMBAKWAGH NE NGI EREN SHA AJIIR AGEN KPA? Hen tar ugen ken veghertar u Afrika la, hanma ijiir i kasev ve lu utar yô, kwase môm ka nan nôngo u lun ken a ve, u yange i vihi nan shin i yav a nan sha igyosough shighe u nan lu yev la je yô. Shi i tôv nomso kpishi ken tar la yô, i nenge nomso mbagenev tôô ér u gbidyen kwase ka kwaghbo ga. Nahan kpa, ka noov tseegh ve eren kasev tswam ga; kasev kpa mba eren noov vev tswam. U tesen ikyav yô, ken tar u Canada, hanma ijiir i nomso ve lu pue yô, nomso ka ve nôngo u lun ken a ve utar, mba kasev vev ve vihi ve iyol côu côu, shin ve er ve tswam yô.

KA NYI IOR KA VE ÔR U NYIMAN IKYAV I KWAGH NE? Tswam u noov a kasev shin kasev a noov la hii ka kwagh u nyian ga. Kpa sha ayange a ase ne, mba hemban nengen sha zayol ne a tsuaa la.

KWAGH U KA VE ÔR NE KA MIMI JE KPA? Mba hembe ungwan ripoti sha kwagh u tswam u noov a kasev man kasev a noov la sha ayange a ase ne. Kpa er i fe zayol ne wuee nahan, zayol shon pande je kpa? Ei, a pande ga cii. Ior mba hemban lun a dooshima ga cii.

U NENGE NENA? U nenge kwaghôron u profeti u ken 2 Timoteu 3:1-3 la ngu kuren sha mi kpa? U nenge dooshima u ka a lu hen atô u nom a kwase la ban hen icombor kpishi kpa?

Kwaghôron u profeti ugen u a lu kuren sha mi sha ashe a ou hegen yô, ka u sha kwagh u tar u uumace ve tem sha u ne. Nenge ase kwagh u Bibilo i ôr sha kwagh ne yô, ken ngeren u a dondo ne.

[Mkaanem ma]

“Tswam u kwase a nom shin nom a kwase la ka kwaghbo môm ken akaabo a i fe yilan dasenda sha mi ga yô. U tesen ikyav yô, alaghga nom nana er num a kwase u nan a kuma kwa 35 cii ve kwase la nana yila dasenda ye.”—Mkaanem ma KWASE UGEN U A WE IOR KWAGH SHA KWAGH U TSWAM U HEN TSOMBOR HEN TIÔNTAR U WALE, KEN TAR U BRITAIN YÔ.