Kwaghôron u Profeti 6. Mba Pasen Loho U Dedoo Sha Tar cii
Kwaghôron u Profeti 6. Mba Pasen Loho U Dedoo Sha Tar cii
“A pase loho u dedoo u Tartor ne a tser tar.”—MATEU 24:14.
● Kwase ugen iti na ér Vaiatea, ngu hen anijiir ugen ken uicile mba ve we sha nongo ken ityeku i Pacific, i yer ve ér Tuamotu Archipelago la. Tuamotu ngee a uicile nôngo u kuman 80, shi aluer i zom ve cii yô, vea yisa ijiir a nôngo u kuman er tar u Nigeria nahan. Kpa gema ka iorov 16,000 nahan tseegh ve lu her ye. Nahan kpa, Mbashiada mba Yehova zende ar hen ya u Vaiatea kua mbawan ndor a na. Sha ci u nyi? Sha ci u Mbashiada soo u pasen ior cii loho u dedoo u sha kwagh u Tartor u Aôndo hen hanma ijiir i ior ve lu cii.
MBA PASEN LOHO U DEDOO SHA AJIIR AGEN KPA? Mba pasen loho u dedoo ne hanma ijiir sha tar cii. Ken inyom i 2010 la tseegh, Mbashiada mba Yehova yôô loho u dedoo kuma ahwa Biliôn môm man miliôn dubu deri ataratar, ken ityar 236. Kwagh ne tese ér yange hanma orshiada lu pasen kwagh miniti 30 ken hanma iyange. Ken anyom 10 a a sember karen ne, Mbashiada mba Yehova gber ityakeda i tesen ior Bibilo a mi kuma ukôpi biliôn 20.
KA NYI IOR KPISHI KA VE ÔR U NYIMAN IKYAV I KWAGH NE? I ndera pasen loho u Bibilo anyom udubu imôngo hegen.
KWAGH U KA VE ÔR NE KA MIMI JE KPA? Ior kpishi pase kwagh ken loho u Bibilo, ka mimi. Nahan kpa, mbagenev kpishi ken a ve ka ve pase hen anshighe kpuaa man sha ajiir cuku tseegh. Kpa Mbashiada mba Yehova yô, ka nongo u kwaghaôndo u u lu pasen kwagh aren a ior umiliôn imôngo sha tar yô. Er iniongo igen i hemban tahav man i hemban vihin kwagh sha tar i lu hendan a Mbashiada kpoghuloo nahan kpa, mba eren tom ve u pasen kwagh la her. * (Marku 13:13) Heela tseegh ga, mba kimbin Mbashiada mba Yehova inyaregh sha tom ve u pasen kwagh la ga. Kpa ka ve na shighe ve u eren tom ne gbilin, shi ka ve na ior ityakeda ve gbilin. Tom ve ne jimin cii, mba suen u sha uiyua mba ior ve ne a ishima ve la.
U NENGE NENA? Mba pasen “loho u dedoo u Tartor” sha tar cii kpa? U nenger wer, er kwaghôron u profeti ne a lu kuren sha mi hegen nahan, ica ia kera gba ga tsô akaa a dedoo aa ere?
[Ngeren u shin kpe]
^ Ikyum. 6 Wea soo u seer fan kwagh ne yô, nenge ngeren u sha Intanet u ken zwa Buter, u a lu a itinekwagh ér What Happened to Jehovah’s Witnesses During the Time of the Holocaust? la, kua u Exhibit in Tel Aviv Showcases Jehovah’s Witnesses’ Experience During Nazi Era la kpaa, sha jw.org.
[Mkaanem ma]
“Aluer Yehova na ian yô, se za hemen u pasen loho u dedoo u Tartor sha gbashima, shi se nôngo sha hanma gbenda u se fetyô cii se pase ior kwagh.”—TAKEDA U YEARBOOK U MBASHIADA MBA YEHOVA U KEN INYOM I 2010.