Gba u Se Eren Msen sha Akaa a Nyi Nahana?
MSEN u Yesu er sha u tesen mbahenen nav gbenda u eren msen, u ka i yila ér Msen u Ter Wase la, ka msen u Mbakristu kpishi ve hemban kimbir yô. A lu nahan shin a lu nahan ga kpa, ior kpishi kav inja i msen shon ga. Ior umiliôn imôngo mba kimbir asember a msen ne ken ityou hanma iyange, mbagen yô, mba hembe kimbir un atetan. Kpa Yesu yange ver ishima ér i eren msen la nahan ga. Er nan se fe?
Yesu yange ôr kwagh ugen cii mase eren msen shon ye, ér: “Shighe u ne lu eren msen yô, de kimbir nen kwagh môm gbem . . . Ga.” (Mateu 6:7) Nahan u hen wer, Yesu yange kera er kwagh u ôr la ga, gema dugh asember a eren msen a mi ver ér i kimbir a hanma shighe u i lu eren msen yôô? Mayange ga cii! Yesu lu tesen se akaa a se eren msen sha mi yô, shi tese se akaa a a hembe lun hange hange, a i gbe u se umbur shighe u se lu eren msen la wang. De se time sha msen u Yesu er la vighe vighe. I nger msen shon ken Mateu 6:9-13.
“Ter wase u sha, i tsegha iti you.”
Yesu ôr mkaanem man sha u umbur mbadondon un er i gbe u vea eren msen hen Ter na, Yehova yô. Kpa u fa er i hii ve iti i Aôndo i lu kwagh u vesen, man er i hii ve i gbe u a tsegha i kpa?
I hii u eren mbaaie mba vihin iti i Aôndo sha ayange a uumace mba hiihii mbara je. Satan, u a lu orihyom u Aôndo la, kaa ér Yehova er aie, shi ngu Orhemen u nyumen ior nav kwagh u dedoo, shi ngu a ian i tesen uumace mba A gbe la kwagh u vea er ga. (Genese 3:1-6) Mbagenev kpishi ta ikyaa a Satan, nahan ka ve tesen ior ér kwagh gba Aôndo sha kwagh u ior ga, a wa ifer, shi keren nger nger, shin ka Un a gbe akaa a se nengen a mi ne kpaa ga. Mbagenev je yô soo ér iti na kpa ior ve de fe ga, nahan ve dugh iti i Yehova la ken Ubibilo mba ve gem ken ijô ve la kera, shi mba yangen ior u yilan Aôndo sha iti na la.
Bibilo tese ér Aôndo una va kar aferakaa ne cii sha iyol na kera. (Esekiel 39:7) Una eren nahan yô, kwagh u a gbe u cii una na u, shi una sôr hanma zayol wou cii. Una er kwagh ne nena? Mkaanem ma dondon ma Yesu ôr ken msen na ne na mlumun sha mpin ne.
“Tartor wou u̱ va.”
Nyian ne, kwagh u Tartor u Aôndo tsume mbatesen kwaghaôndo kpishi. Kpa er mbaungwan Yesu ve vande fan nahan, sha ayange a tsuaa la je, uprofeti mba Aôndo tsenga ôron ér Mesiya, Oryiman u Aôndo a tsua la, una hemen Tartor u ua gema hanma kwagh sha tar yô. (Yesaia 9:6, 7; Daniel 2:44) Tartor la ua tsegha iti i Aôndo. Ua er kwagh ne nena? Ua tese er akaa a Satan a ôron la cii i lu mbaaie yô, nahan ua kar a Satan kua ityom na cii kera. Tartor u Aôndo ua bee a ityav mbi nôngon man hanma inja i uange cii kua ijen man ku je kpaa. (Pasalmi 46:9; 72:12-16; Yesaia 25:8; 33:24) Aluer u ngu eren msen wer Tartor u va yô, u ngu sônon wer uityendezwa mba shon cii ve kure sha mi.
“I̱ er ishima you shin tar kpaa, vough er i eren sha nahan.”
Mkaanem ma Yesu ôr ne tese ér a er ishima i Aôndo shin tar keng a bunde ga, er i eren i sha, hen ape Aôndo a lu la nahan. Mbaeren ishima i Aôndo sha, kwagh môm fatyô u yangen ga, sha ci u Wan u Aôndo yange ta ityav sha Satan kua mbatyomov mba suen un cii, kôr ve ker ve va gba shin tar. (Mpase 12:9-12) Kwagh u sha utar u Yesu sôn ken msen na u tesen ikyav ne, kua akaa a ahar a hiihii la kpaa, wase se u kaven kwagh u a hembe lun hange hange cii yô; kwagh shon yô, ka u eren ishima yase ga, kpa eren ishima i Aôndo. Ka ishima i Aôndo la i ne a lu tesen akaa a a gbe la cii erdoo u hemban cii ye. Ka nahan ve Yesu u lu a isholibo i môm iyol ga la je kpa yange ôr kwagh ne a Ter na ye, ér: “I de eren sha ishima yam ga, kpa i er sha ishima you.”—Luka 22:42.
“Na se kwaghyan nyian, u se ya ken iyange ne cii yô.”
Yesu shi tese ér se fatyô u eren msen sônon akaa a iyolough kpaa. Aluer se er msen hen Aôndo se sôn akaa a kwagh a gbe se a mi ayange ayange la kpa, kwaghbo môm ngu sha kwagh la ga. Jighilii yô, kwagh ne ka a umbur se er i lu Yehova a “ne ior cii uma man iôôn kua akaa cii” yô. (Aerenakaa 17:25) Bibilo pase ér ngu Ter wase shi se doo un ishima, shi ka i doo un u nan ônov nav kwagh u a gbe ve yô. Nahan kpa, aluer ônov nav sôn un kwagh u a nenge ér una wase ve ga yô, una er ve kwagh shon ga, er ormaren u fan kwagh ka nan er nahan.
“De se a anzô a ase.”
Mimi je u ngu Aôndo a injôô? U soo wer a de u kwaghboo? Ior kpishi nyian kera fa kwagh u a lu isholibo ga, shi er isholibo i lu beerkwagh ga nahan kpa ve fa ga. Kpa Bibilo tese ér ka isholibo jighilii i ve se a mbamzeyol mba hemban vihin cii ye, sha ci u ka i jighilii i ne uumace ve lu kpen ye. Se cii i mar se a mlu u isholibo, ka nahan ve ka se zer eren isholibo gbem ye. Nahan gba u Aôndo una de se asorabo a ase, gayô se fatyô u lun uma gbem sha won ga. (Mbaroma 3:23; 5:12; 6:23) Kpa Bibilo ôr kwagh u surun se ishima, i kaa ér: “We, Tere, U doo, U kegh iyol u den kwaghbo.”—Pasalmi 86:5.
“Yima se sha ikyev i Iferor.”
U nenge er i gbe hange hange u Aôndo una kura u kpa? Ior kpishi na jighjigh ér “Iferor,” Satan cii je kpa ngu ga. Kpa Yesu tese ér Satan ngu kpôô kpôô, je yô a yila Satan ér “tor u tar ne.” (Yohane 12:31; 16:11) Satan vihi tar u u lu sha ikyev na ne, nahan we kpa kape i sar un u vihin we je la, sha u we u de lun kôôsôô vea Yehova, Ter u u sha la ga yô. (1 Peteru 5:8) Nahan kpa, Yehova ngu a tahav hemba Satan ica je, shi ka i doo un u kuran mba A doo ve ishima la.
A kaa a hange hange a Yesu ter ken msen na u tesen ikyav, a se sav lamen sha mi ne, ka a tseegh i gbe u se eren msen sha mi ga. Umbur, 1 Yohane 5:14 ôr kwagh u Aôndo ér: “Ka sea sôn nyityô kwagh u a lu sha ishima Na vough yô, A ungwa se.” Sha nahan yô, aluer mbamzeyol ou ndahar nan nan kpa, ishima i de ze u iyol u pasen Aôndo ga.—1 Peteru 5:7.
Kpa ka hanma shighe man hanma ijiir nahan, i gbe u se eren msene? Gba u se ver a ver shighe man ijiir i eren msene?
Kwagh Ugen u Alaghga Shi Una Doo U Yô
Gba u Se Eren Msen Hana man Hanma Shighe?
Nenge aluer Bibilo tese ape i gbe u se er msen man ijiir i se er msen yô.
ATESEN A BIBILO A HANGE HANGE
Ka Nyi I Lu Tartor u Aôndo?
Yesu yange hemban tesen ior kwagh u Tartor u Aôndo shighe u lu eren tom na la. Mbadondon un ndera eren msen sônon ér Tartor la u va anyom kar hegen uderi imôngo.