KEN hanma ikyurior man hanma kwaghaôndo sha tar cii, ior mba eren msen. Or ka nan er msen shighe u nan lu tswen yô; shi ior ka ve er msen shighe u ve kohol imôngo kpaa. Ka ve er msen ken ucôôci man ken utempel man ken ushinagoge man ken masaranci kua ken ayou akombo kpaa. Mbagenev ka ve tar ubutu hen inya ve eren msen sha mi, mbagen di ve eren msen ve ôron asa, mbagen di mba eren msen a ambaakaa er, tôgh ku msen, shin foto u Yesu shin u ngô na, shin u ma icighanor nahan, mbagen di ka ve kimbir mbamsen ken ityakeda i msen, shin mbamsen mba i nger sha ikpande i kiriki i har sha kpekpe shin ma ijiir i hamben akaa yô.

Er uumace ve eren msen yô, mba kposo a annyamev mba ve lu sha tar cii. Ka mimi, se mba kwaghmôm a annyamev sha igbenda igen. Se mba ye kwagh shi kwagh gbe se a mngerem man ahumbe, er annyamev nahan. Shi mba maren se a mar, shi ka se lu uma, shi se kpe, er ve nahan. (Orpasenkwagh 3:19) Kpa msen yô, ka uumace tseegh ve eren ye. Sha ci u nyi?

Jighilii yô, se kaa ser ka sha ci u gba u se eren msen. Kera ga kpa, ior kpishi nenge ér msen ka gbenda u lamen a ma or u ken jijingi, shin kwagh u ve civir ér ka icighankwagh, shin kwagh u ve hen ér ka u lun gbem sha won yô. Bibilo tese ér i gba se a isharen i eren ambaakaa la. (Orpasenkwagh 3:11) Yesu Kristu yange kaa ér: “Saan mba i sar ve tsung u fan Aôndo la iyol, sha ci u Tartor u sha ka u ve.”—Mateu 5:3.

Aluer ka ‘isharen i fan Aôndo’ ga yô, uzegembaayough mba ukwaghaôndo ka ve maa kua ieev mbi ka ve ve ver ker la man ahwa kpishi a ka ve tôô u eren msen la ka i lu sha ci u nyi? Ka mimi, ior mbagenev ka ve suur sha ayol a ve shin sha uumace mbagen ér vea kure isharen ve i fan Aôndo la. Nahan kpa, u nenge wer uumace yina gande u wasen mbagenev ér ve kure isharen ne gaa? Agee a ase yina kpishi, shi ka se tsa sha won anyom cuku tseegh maa se kpe, shi se mba fe kwagh u ken hemen ga. Saa a lu or u nan hembe fan kwagh a vese ica, shi tahav mbu nan mbu gande mbu asev, shi i lu u nana kpe sha won ga la, nana wase se u fan kwagh u a sar se ne ye. Kpa ka akaa a ken jijingi a nyi nahan ka a sar se ve i gba u se er msene?

Hen ase sha kwagh ne: Shighe ugen ka i sar u tsung u orgen ma nan tese u kwagh u u er, shin i sar u ma u zough a kwaghfan shin mbamlumun sha mbampin mba u nenge wer orumace nana fatyô u nan mlumun sha mi ga yôô? Ma shighe ngu u yange or wou nan kpe, nahan vihi u je sar u u ma i sur u ishimaa? Shin, i gbe nahan taver we u tsuan ma kwagh ken uma wou, nahan u ker kwaghwan mape vee? Shighe ngu u yange ishima na u ibo sha ma kwaghbo u u er, nahan sar u u ma i de u kwaghbo shon yôô?

Bibilo kaa ér, akaa a se ter sha heen ne cii ka ityôkyaa a injaa a aa na se er msen yô. Ken ityakeda cii, ka Bibilo i hemba ôron kwagh u msen sha gbenda u vough ye. Shi Bibilo ter mbamsen mba nomso man kasev mba civir Aôndo sha mimi kpishi er yô. Yange ve er msen ér Aôndo a sur ve ishima shi a tese ve kwagh u vea er yô, shi a de ve kwaghbo, shi a pase ve akaa a a cimin u kaven kpishi yô.—Pasalmi 23:3; 71:21; Daniel 9:4, 5, 19; Habaku 1:3.

Shin er mbamsen mba Bibilo i ter la yange i er ve sha atôakyaa kposo kposo nahan kpa, kwagh ngu môm u mba yange ve er mbamsen mba shon la cii fa yô. Hanmô ve yange nan fa kwagh u vesen u una na ve msen u nan una saa gbilin ga yô. Ve cii yange ve fa or u i gbe u a eren msen hen a nan yô. Nyian ne, ior ka vea eren msen kpa kwagh gbe ve sha kwagh ne ga, shin ve fa kwagh ne ga kuaa.