MSEN u eren ngu a iwasen je kpa? Een, Bibilo tese ér hanma msen u mbacivir Aôndo ve er cii ka a wase ve. (Luka 22:40; Yakobu 5:13) Jighilii yô, msen u eren una wase se u kuren isharen i gbe se a mi u civir Aôndo la, shi una fatyô u van se a mmem ken ishima, kua mkpeyol je kpaa. Sha ci u nyi?

Tôô ase wer u ngu a wan wou u ka u na un iyua yô. Nahan ka u tese un wer, aluer a ngohol iyua yô, a doo un kpa a de ôron gaa? Shin u tese un wer a ôr kwagh u tesen ér doo unu? Ka sea ôr er i lu se ken ishima la yô, se hemba veren ishima sha mlu u ken ishima shon, shi i hemba lun se ken ishima nahan cii. Aôndo kpa kape ka sea ôr un er ishima i lu se ker ve, i lu se laa? Een, je ka u henen a hen ga! Nenge ikyav sha mbamsen kposo kposo.

Msen u sughun Aôndo. Ka sea sugh Ter wase sha akaa a doon a a er se yô, se hemba veren ishima sha akaa a doon a se zough a mi la. Kwagh ne ka a na yô, se hemba lun a iwuese, shi i hemba saan se iyol, shi se hemba lun a ishimaveren.—Mbafilipi 4:6.

Ikyav i tesen: Yesu yange sugh Ter na sha gbenda u a ungwan mbamsen nav shi a eren kwagh sha mi la.—Yohane 11:41.

Msen u zamber Aôndo wer a de u kwaghbo. Ka sea zamber Aôndo ser a de se kwaghbo yô, kwagh la a hemba tsaase imoshima yase, shi se hemba geman ishima sha mimi, shi se hemba nengen er isholibo yase la i lu beerkwagh ga yô. Shi ishima ka i pande u nan se ibo, nahan i pever se iyol.

Ikyav i tesen: Davidi yange er msen u tesen ijungwen na shi tesen ér un gema ishima.—Pasalmi 51.

Msen u sônon Aôndo wer a tese u kwagh u u er shi a na u kwaghfan. Aluer se mba eren msen ser Yehova a tesen se kwagh u se er shi a na se kwaghfan u i gbe u se lu a mi ve se tsua u eren akaa injaa la yô, kwagh la una wase se se lu mbahiden a iyol ijime sha mimi. Shi kwagh ne una umbur se er i lu u se fatyô u eren akaa agen ga yô, nahan se hemba suur sha Ter wase u sha la.—Anzaakaa 3:5, 6.

Ikyav i tesen: Solomon yange er msen hen Aôndo a iyolhiden ijime ér a na un kwaghfan shi a tese un er una hemen Mbaiserael yô.—1 Utor 3:5-12.

Msen u sha zayol u ken ishima. Aluer ishima ngi zan se iyol man se er msen hen Aôndo se pase un kwagh u ishima i lu zan se iyol sha mi la jighilii yô, ishima ia pever se, nahan se kera suur sha iyol yase ga, kpa se suur sha Yehova.—Pasalmi 62:8.

Ikyav i tesen: Tor Asa yange er msen shighe u tagher ishigh a orihyom u bo u bo yô.—2 Kroniku 14:11.

Msen u sônon Aôndo wer a na i kpe mba agee a yen ve la iyol. Imba msen la ka i na se hen u tesen ser kwagh u mbagenev gba se ishima sha mimi, shi kunya shin mhôônom ma seer kôron se a ve.

Ikyav i tesen: Yesu yange er msen sha ci u mbadondon un.—Yohane 17:9-17.

Msen u wuese Aôndo. Aluer se mba wuese Yehova sha akaa a doon tsung a a er la, kua aeren a na a a doo yum la yô, se hemba nan un icivir shi se seer lun a iwuese. Shi mbamsen mbara nahan vea na se hemba kporom ikyua a Aôndo Ter wase.

Ikyav i tesen: Davidi yange wuese Aôndo sha akaa a A gbe la.—Pasalmi 8.

Iveren igen i aluer se mba eren msen ve se zua a mi yô, ka “bem u Aôndo u a hembe hanma mkav la.” (Mbafilipi 4:7) Ken tar u u ngee a mbamzeyol yum ne, ior kpishi mba zuan a mmem ken ishima ga. Man ka sea lu a mmem ken ishima yô, iyol yase ne je kpa i kpe i iyol. (Anzaakaa 14:30) Kpa ka sha iniôngon yase tseegh se zuan a mmem ken ishima yee? Shin kwagh ngu u a hemban van se a mmeme?