I marem hen angeri ugen mba yer ér Acul, vegher u shin ityôtar i tar u Guatemala, ka anjiir u agungu a lu her kpishi kua iwo yô. Tsombor wam due ken nongoior u i yer ér Ixil, mba ve due ken ikyurior i i yer ér Maya la. Shighe u m lu wanye la, m lamen zwa u Ishpania, m gbe vesen yô, m fa u lamen zwa u ityô yase la kpaa. Yange i marem hen shighe u i lu nôngon ityav ken Guatemala la; i nôngo ityav mbira gbem je kuma anyom 36. Ityav mbira wua ior i Ixil kpishi.

Shighe u m lu anyom anyiin la, anmgbian wam u nomso u lun anyom ataankarahar lu numben a an-bom u cuku u i yer ér grenade la, nahan ica i gbe ga yô, an-bom shon bughur. Kwagh er vihi yô, aikyôr ne yange na m pir ashe, anmgbian wam u nomso la di gema saa ku. Kwagh ne eren kera yô, i tôôm i yem a mo hen makeranta u mbayev mbaapirashe hen Guatemala City, m za lu her shighe u m lu iyev la cii, m hen u ôron kwaghngeren u mbaapirashe u i yer ér Braille la. Shighe u m lu hen makeranta ne la cii, atica a hen makeranta ne yangem u lamen a mbayev mba hen makeranta la cii. M fa kwagh u yange na ve ve yangem jighilii ga, shi mbayev mba m lu hen makeranta ne a ve imôngo la cii palegh mo. Hanma shighe m lu mo tswen, nahan i gbam ica u i na mem iyol u yange i na se iwer ihiar ken hanma inyom la joo! Yange a na mem iyol la yô, m za m za lu vea ngôm iwer ihiar, un yange a zungwen vea mo shi a eren kwagh a mo kundu kundu. Kpa kwagh ka a er i vihi yô, yange m va nyôron anyom pue yô, ngôm kpe. Er ngôm u lu un tseegh m doo un ishima ne saa ku yô, ku na nyoon mo kpen kpen.

M va nyer anyom 11 yô, m cin m hide hen angeri u yange i marem her la, m va lu vea anmgbian wam u sha ter kua tsombor na. Ve lu nengen sha a mo, kpa ve gema ve fatyô u eren kwagh u surun mo ishima ga. Ashighe agen m vaa a Aôndo m pine mer: “Er nan jim ngôm a kpe? Ka nyi jim m pir ashe?” Yange ior ve kaa a mo ér, akaa a vihin a a erem ne cii, ka kwagh u Aôndo a soo yô. Nahan m nenge mer kwagh gba Aôndo sha kwagh u ior ga, shi eren kwagh a ior sha mimi ga. Yange m soo u wuan iyol yam, kpa m gema m fa er me er ve me wua iyol yam ga.

Er m pir ashe yô, m lu a agee iyol ga, shi kwagh ngôôr vihin mo ga. Shighe u m lu wanye la, i kighir mo i yav a mo acin imôngo. Kpa m ôr or môm kwagh sha mi ga, sha ci u m nenge mer me ôr kpa, kwagh a gba or sha mi ga. Yange ior faan lamen a mo ga, shi mo kpa m lamen a or ga. M lu kusususu shi m ure kpishi shi or môm kpa, m na nan jighjigh ga.

Shighe u m lu anyom 13 la, Orshiada u Yehova ugen vea kwase na va lam a mo, zum u se lu eren anumbe ken makeranta yô. Lu tica ugen hen makeranta la, u yange kunya kôr un a mlu wam ne yô, kaa a ve ér ve va lam a mo ye. Ve ôrom uityendezwa mba Bibilo ér mba va nderen mbakpenev shin ku, shi yange sev a hungwa a av mbaapirashe vea hide a hii u nengen. (Yesaia 35:5; Yohane 5:28, 29) Kwagh u ve pasem ne doom kpishi, kpa gema taver mo u lamen vea ve, sha ci u m lam a ior ga gbem hoghor mo. Kpa er m lamen a ve ga nahan kpa, ve gema ve lamen a mo kundu kundu shi ve wa ishima a mo, ve za hemen u van hen a mo gbem, sha u va pasen mo kwagh u Bibilo i tese yô. Hanma shighe yô, or ne vea kwase na ve zende i kuma ukilomita 10, ve unde iwo, ve hungwa apev, cii ve mase va nyôron hen angeri wase la ye.

Anmgbian wam u sha ter u m va lu vea na la, kaa ér ior mbara ka ve wuha iyol tsembelee, kpa gema mba a kwagh kpishi ga. Nahan kpa, hanma shighe yô, ve tese ér kwagh wam gba ve ishima. Yange vea vaan yô, ve va a ankwagh ve va nam iyua. Nahan m nenge mer, ka Mbakristu mba mimi tseegh vea ya imba ican ngila nahan sha ci u or ye.

Yange ve hen Bibilo a mo ken ityakeda i i gber sha kwaghngeren u mbaapirashe yô. Shin er m lu kaven kwagh u m lu henen la nahan kpa, gema taver mo u lumun akaa agen. Ikyav i tesen yô, yange taver mo kpishi u nan jighjigh mer, kwagh wam gba Aôndo ishima shi taver mo u nan jighjigh mer, mbagenev kpa kwagh wam una gba ve ishima er Aôndo nahan. Yange ve wasem u kaven er i hii ve Yehova a de ér ican i er ior hen anshighe kpuaa yô, shi ve wasem u kaven er a lu Ter wase yô, kpa gema taver mo u nengen un mer se doo un ishima sha mimi. *

Tegh tegh tsô, kwagh u m lu henen ken Ruamabera la wasem m gema gbenda u m nengen Aôndo la. Ikyav i tesen yô, yange m kav er mhôônom ka ma kôr Aôndo a mba ve lu yan ican la kpishi yô. Aôndo ôr kwagh sha kwagh u mbacivir un mba i lu nzughul a ve la ér: “M nenge ican i ior Av . . . M fa atsan a ve la.” (Ekesodu 3:7) Yange m va fe mer Yehova ngu a aeren a doon tsung yô, kwagh la na m tsegha iyol yam sha ci na. Nahan ken inyom i 1998 la, i erem batisema, m hingir Orshiada u Yehova.

Yange m eren batisema inyom karen i môm yô, m za makeranta u tsaase mbaapirashe, ikyua a geri u Escuintla. Ortamen ugen hen tiônnongo u hen geri ne, yange fa mbamtaver mba yange ve na ve m faantyô u zan mbamkombo mba tiônnongo ga, shighe u m lu hen geri wase la yô. Cii man u za nyôr hen tiônnongo u hemba lun ikyua a ijiir yase la yô, yange i gba u u unde iwo man agungu shi u hungwa apev, ape Orshiada u Yehova la vea kwase na kpa yange ve kar cii ve ve va hen Bibilo a mo la. Kwagh ne na yô, m faan ityô u zan mbamkombo ga. Ortamen ne yange wasem kpishi, tesem tsombor u ugen u u lu Mbashiada mba Yehova yô, hen geri u Escuintla. Tsombor la maa lumun ér mo m za lu hen ya vea ve, nahan ve lu wasem mo u zan mbamkombo mba tiônnongo. Zan zan hegen kpa, tsombor ne ngu nengen sha a mo tsembelee, er m ngu wan ve nahan.

Shi me fatyô u ôron igbenda igen kpaa, i mba ken tiônnongo ve tesem ér m doo ve ishima sha mimi yô. Akaa ne cii na yô, m nenge mer mimi je er m lu Orshiada u Yehova hegen ne, m ngu hen atô u Mbakristu mba mimi.—Yohane 13:34, 35.

M kera nengen iyol yam mer m saa ishe shi kwagh hembam ga. Hegen m fa ityôkyaa i m lu uma jighilii yô. Er m lu eren tom u Mbashiada mba Yehova u tesen ior Bibilo la hanma shighe cii yô, m kera henen sha zayol u ashe am a pirin la ga, kpa m hemba veren ishima sha u tesen ior mimi u Bibilo. Shi kwagh ugen yô, hegen m ngu ortamen ken tiônnongo, shi m ne akaaôron a ken igbar ken Bibilo sha atôônanongo a hen ijiir yase la. Heela tseegh ga, shi m ne akaaôron a ken Bibilo sha mbamkohol asev mba vesen, mba ior ka ve za udubu imôngo la kpaa.

Ken inyom i 2010 la, m za Makeranta u Tsaase Anmgbianev mba Nomso mba Lun Kwav, (u i yer hegen ér Makeranta u Mbapasen Ivangeli i Tartor la) hen geri u El Salvador. Kwagh u m za hen ken makeranta ne la na yô, m hemba fan u eren ityom yam i ken tiônnongo tsembelee. Ityesen i m zua a mi ne na yô, m nenge mer mimi je m gba Yehova Aôndo kwagh shi m doo un ishima, shi una fatyô u nan hanma or cii nana kuma u eren un tom.

Yesu kaa ér: “Or u nan ne kwagh la ka i hemba saan nan iyol a or u nan ngohol la.” (Aerenakaa 20:35) Hegen ne, me fatyô u kaan jighilii mer, saan mo iyol sha mimi, shi er yange m hen mer mayange me fatyô u wasen ior ga nahan kpa, m nenge mer hegen me fatyô u wasen ior.