ITINEKWAGH I TAMEN | MBAAIE MBA KA VE NA I LU INJA ER IOR DOO AÔNDO ISHIMA GA LA
Aie u A Ne I Fe Kwagh u Aôndo Ga La
AKAA A IOR KPISHI VE NE JIGHJIGH A MI YÔ
Iniongo i kwaghaôndo u Mbakristu i “itiar i vesen, ka Adua u Fada man Adua u Orthodox man Mbaprotestanti cii lumun a ityesen i Aôndo Ter man Aôndo Wan man Aôndo Icighan Jijingi cii kohol ka Aôndo môm la. Sha kwagh u Mbakristu ve tesen yô, Aôndo Ter man Aôndo wan man Aôndo icighan jijingi cii ka mbaaôndo kposo kposo ga, kpa ve kohol cii mba aôndo môm.—Takeda u The New Encyclopædia Britannica.
MIMI U BIBILO I TESE YÔ
Mayange kpa Yesu u a lu Wan u Aôndo la kaa ér un vea Ter na Aôndo cii mba kwaghmôm ga. Kpa yange kaa ér: ‘M ngu yemen hen Ter, gadia Ter hembam.’ (Yohane 14:28) Shi Yesu yange kaa a ordondon na ugen ér: “M ngu kôndon yemen hen Terem man Ter wen, kua hen Aôndo wam man Aôndo wen.”—Yohane 20:17.
Icighan jijingi ka or ga. Yange i “iv [Mbakristu mba sha ayange a tsuaa la] a icighan jijingi” shi Yehova kaa ér “me haa jijingi wam sha hanma injaor cii.” (Aerenakaa 2:1-4, 17) Icighan jijingi ngu môm ken mbaaôndo utar mba i kaa ér ve kohol mba aôndo môm la ga. Ka tahav mbu Aôndo a eren tom a mi u kuren awashima na yô.
ER I HII VE I LU KWAGH U VESEN YÔ
Karl Rahner man Herbert Vorgrimler mba ve hen kwagh u adua u fada tsema tsema yô, pase Trinti ér: “Or a fatyô u kaven kwagh u Triniti ga, saa a tese nan ken mpase u sha mnenge, shi aluer i tese nan mpase u sha mnenge la je kpa nana kav un vindi vindi ga.” U fatyô u soon kwagh u or u a taver we u fan mlu u nan shin kaven kwagh u nan kpa? Sha nahan yô, ityesen i Triniti la yange ior u fan kwagh u Aôndo shi soon un.
Marco, u se vande ôron kwagh na la kpa nenge ér ityesen i Triniti la yange i lu yangen un u civir Aôndo. A kaa ér: “Yange m hen mer Aôndo soo ér se de fe or u un lu jighilii ga, nahan kwagh la na hemba taver mo u zan ikyua a na shi fan kwagh na cii.” Nahan kpa, “Aôndo ka Aôndo u nzughul kwagh ga.” (1 Mbakorinte 14:33, Bibilo i American Standard Version) A yer se or u un lu ga. A soo ér se fa un. Yesu yange kaa ér: “Se mba civir kwagh u se fe un yô.”—Yohane 4:22.
Marco kaa ér: “Yange m va fe mer Aôndo ngu ken Trinti ga yô, m hingir u yan ijende a na.” Aluer se nenge ser Aôndo ngu kpôô kpôô yô, a hemba lun se ican ga u soon un. Bibilo kaa ér: “Or u nan tesen dooshima ga yô, nan fa Aôndo ga, sha ci u Aôndo ka dooshima.”—1 Yohane 4:8.