“Se mba a fa cuku ser Aôndo ngu a iti ga, shi aluer ngu a iti je kpa, se fa i jighilii ga.”—Mkaanem ma Profesôr David Cunningham, takeda u i yer ér Theological Studies la.

Aôndo kaa ér: “Kpa iti Yam i TER (ka Yehova je la) ne yô, ve fa ga.” (Ekesodu 6:3) Yehova ka iti i ken zwa Heberu man inja i iti shon ér “Gem Ne Kwagh Lu.”

Yehova soo ér se yilan iti na. Bibilo kaa ér: ‘Yila nen sha iti Na, pase nen ityom Na hen ior, ter nen Un er i kende a iti Na sha yô.’—Yesaia 12:4.

Yesu yange pasen ior iti i Aôndo. Yesu yange er msen kaa a Yehova ér: “M pase ve [mbadondon Yesu] iti you, shi me za hemen u pasen i kpaa.” Er nan ve Yesu pase mbadondon un iti i Aôndo? A kaa ér: “Sha er vea tesen mbagenev dooshima, vough er u [Aôndo u] tesen mo dooshima nahan, shi me lu ken mzough vea ve yô.”—Yohane 17:26.

Ortesen kwaghaôndo u i yer iti na ér Walter Lowrie yô kaa ér, “Or u nan fe iti i Aôndo ga yô, nan fa or u Aôndo a lu jighilii ga, shi aluer nan fa ér kwagh gbe Aôndo sha kwagh u ior ga yô, Aôndo una fatyô u doon nan ishima kpaa ga.”

Orgen u i yer iti na ér Victor yô, yange zaan adua hanma kasua kpa nenge ér un fa Aôndo tsembelee ga. A kaa ér, “M va fe mer iti i Aôndo ér Yehova yô, lum er ngu pasen iyolna hen a mo nahan. Lum inja er m va zua ishigh a ishigh a or u m ndera ungwan kwagh u nan ica i gbe nahan. M nenge mer ngu kpôô kpôô shi m ya ijende a na kpaa.”

Yehova kpa ye ijende a ior mba ve yer un sha iti na la. A tôndo zwa a “mba ve civir iti Na” la ér una “er a ve dedoo er or ka nan er a wan u nan u a shir nan tom dedoo nahan.” (Malaki 3:16, 17) Shi Aôndo veren mba ve yer sha iti na la doo doo. Bibilo kaa ér: “Hanma or u nan yer sha iti i Yehova yô, a yima nan.”—Mbaroma 10:13.