Ka i taver mbagenev kpishi u soon Aôndo. Sha ci u ka ve nenge ér or nana fatyô u fan kwagh na ga, shi ngu ica yum shi kwagh gba un sha kwagh wase ga. Nenge akaa a ior ve ôr ne:

• “Yange m er msen hen Aôndo mer a wasem, kpa shi i lum er ngu ica gande, or a fatyô u lun ikyua a na ga nahan. Yange m nenge mer se fatyô u fan mlu u Aôndo ga, shi kwagh doon un shin vihin un kpaa ga.”—Mkaanem ma Marco, tar u Italia.

• “Yange i sarem kpishi u civir Aôndo, kpa i lum er ngu ica gande nahan. Yange m hen mer Aôndo wa tswam, tsahan a tsaha ior tseegh. M nenge mer eren kwagh a ior kundu kundu ga.”—Mkaanem ma Rosa, tar u Guatemala.

• “Shighe u m lu wanye la, m hen mer Aôndo ka a ver ashe ér se er kwagh u sha mi ga nahan una tsaha se. Shighe kar yô, m nenge mer or nana fatyô u zan ikyua a Aôndo ga. M nenge mer ngu er orhemen u kwagh u ior mba a hemen ve la a gbe un ishima keng ga nahan.”—Mkaanem ma Raymonde, tar u Canada.

We u nenge nena? U nenge wer ior doo Aôndo ishima gaa? Mbakristu ndera pinen mpin la ka kwagh u nyian a mi ga. Jighilii yô, hii ken inyom i 500 zan zan inyom i 1500 S.Y la, ior kpishi mba ve senge ér mba Mbakristu yô, eren msen hen Aôndo U Hemban Agee Cii la ga kuaa. Sha ci u nyi? Sha ci u yange ior ve cia un je ve nyôr inya. Or u timen sha kwagh u yiase u i yer un ér Will Durant yô, kaa ér: “A er nan ve orsholibo nahan nana cihi nana er msen hen Aôndo u kwagh a gbe un sha kwagh u ior ga, shi a vihi tu laa?”

Er nan ve yange ior nenge ér Aôndo “vihi tu”? Ka nyi Bibilo i tese sha kwagh u Aôndo? Aluer u hen mimi u Bibilo i tese sha kwagh u Aôndo la nahan Aôndo una doo u ishima kpa?