Itinekwagh 10

Aeren a a Vihi Aôndo Ishima La

Ka nena i doo u ú nenge akaa a Aôndo a ôr er ka a bo laa? (1)

Ka aeren a yavaor a nyi a lu shami ga? (2)

Gba u Orkristu nana nenge aie u eren nena? (3) do u haan? (3) iv? (3) ipila? (4) mcivir u azôv? (5) msôrom ma hunden? (6)

Ka nena or nana osough sha aeren a bo kera? (7)

1. Kwagh u dedoo doo mbatomov mba Aôndo ishima. Kpa saa vea hen u kôron kwagh u bo ihom kpaa keng. (Pasalmi 97:10) Inja na yô ka u palegh aeren agenegh a Aôndo a ker a ihom la. Aeren shon ne agenegh kanyi?

2. Ijimba: U yaven a or a ivese i eren shio, idya, u yaven a zendenya, u yaven a anngôu, man u nomsoor yaven a nomsoor la cii ka asorabo a vesen hen Aôndo. (Levitiku 18:6; Mbaromanu 1:26, 27; 1 Mbakorinte 6:9, 10) Aluer kwase man nomsoor ve er ivese ga kpa mba tsan imôngo yô, ve̱ pav gayô ve̱ zua ivese sha tindi.—Mbaheberu 13:4.

3. Aie u Eren, Do u Haan, Iv: Yehova Aôndo una fatyô u eren aie ga. (Titu 1:2) Ior mba ve soo u zuan a mlumun na yô saa vea palegh aie u eren. (Anzaakaa 6:16-19; Mbakolose 3:9, 10) Hanma inja do u haan yô ngi a hua shami. Sha nahan yô Mbakristu mba nyer iyol ken ma inja do u haan i môm tsô kpaa ga, anza er loteri, nyinya i hendan, man bingo nahan. (Mbaefese 5:3-5) Shi Mbakristu  mba iin ga. Mba yamen kwagh u ve fe er ka u mbaiv ga shin mba tee akaa a u pinen ian shio kpaa ga.—Ekesodu 20:15; Mbaefese 4:28.

4. Ishimanyoon, Ipila: Ishimanyoon a myange shio la ia fatyô u van a aeren a ipila. (Genese 4:5-8) Or u eren ipila nana fatyô u lun huror u Aôndo ga. (Pasalmi 11:5; Anzaakaa 22:24, 25) Ka shami ga u oon iyev shin eren ifer sha ci u akaabo a alaghga mbagenev vea er sha avese la.—Anzaakaa 24:29; Mbaromanu 12:17-21.

5. Ahir a Eren man Mcivir u Azôv: Ior mbagenev ka ve zamber a azôv er a̱ bee ve angev. Mbagenev di yô ka ve hôn mbaihomov vev akombo sha u nan ve angev shin u wuan ve je kpaa. Tahav mbu mbu lu ken ijime i aeren ne cii yô ka Satan. Nahan ka u mayange Mbakristu vea nyôr iyol ken mô ve kpaa je ga. (Duteronomi 18:9-13) U lun ikua a Yehova la ka mkor u hemban sha akombo a mbagenev vea hôn sha avese je la.—Anzaakaa 18:10.

6. Msôrom ma Hunden: Ka kwaghbo u man wain kpeghee, bia, shin msôrom magenev ma i we kwa la ga. (Pasalmi 104:15; 1 Timoteu 5:23) Kpa msôrom ma man kpishi kua u man msôrom hunden la ka kwaghbo sha ishigh ki Aôndo. (1 Mbakorinte 5:11-13; 1 Timoteu 3:8) U man msôrom ngeen ganden la una fatyô u vihin mkpeyol wou shi saren tsombor wou kpaa. Shi una nau ú gba fese sha ameen agenegh.—Anzaakaa 23:20, 21, 29-35.

7. Ior mba ve eren akaa a Aôndo a kaa er ka a bo la yô “vea ya dyako u tartor u Aôndo ga.” (Mbagalatia 5:19-21) Aluer mimi je Aôndo doou ishima man ú soo u eren ishima na yô, ú fatyô u osough ken aeren ne kera. (1 Yohane 5:3) Hen u kôron kwagh u Aôndo a kaa er ka u bo la ihom. (Mbaromanu 12:9) Kohol imôngo a ior mba ve lu a aeren a civiraôndo la. (Anzaakaa 13:20) Mbakristu mba kaven ishigh vea lu iwasen. (Yakobu 5:14) U hemban cii yô, har sha iwasen i Aôndo sha msen u eren.—Mbafilipi 4:6, 7, 13.

[Ufoto mba sha peeji 20, 21 la]

Aôndo kôr mbahunden msôrom ihom, iv, do u haan, man aeren a ipila