Itinekwagh 1

Er Ú Ker Ú Fa Kwagh u Aôndo a Soo La

Ka kwagh u vesen u nyi a lu ken Bibilo? (1)

Ka an nan lu orngeren u Bibilo? (2)

Er nan i doo u ú hen Bibilo? (3)

1. Bibilo ka zege iwua i hen Aôndo. Ngi inja er washika u ter u lun a dooshima hen ônov mba nan nahan. I̱ ôr se mimi sha kwagh u Aôndo—or u a lu man kwagh u a til shami kpaa. I̱ pase er a nôngo a mbamzeiyol man er a zua a msaanyol u mimi kpaa. Ka Bibilo tseegh i̱ ôr se kwagh u se er keng sha u eren ishima i Aôndo ye.—Pasalmi 1:1-3; Yesaia 48:17, 18.

2. Yange i nger Bibilo sha ikev i iorov kposo kposo iyenge 40 ken atô u iaven i anyom 1,600, hii ken 1513 B.C.E. Ngi a ityakerada i kiriki kimi 66. Ka Aôndo yange na mbangeren Bibilo la kwagh u ve nger la ye. Yange ve nger lu mbamhen nav, lu mba vev ga. Nahan ka Aôndo u sha, ka ma or uma shin tar, nan lu Orngeren u Bibilo ga.—2 Timoteu 3:16, 17; 2 Peteru 1:20, 21.

3. Aôndo yange wa iko sha er a kimbir ngeren Bibilo vough shi a koso i̱ her kpaa yô. I gber ukôpi mba Bibilo hemba hanma takerada. Ka hanma or a saan nan iyol u nengen er ú lu henen Bibilo la ga, kpa kwagh la a̱ de yangen we ga. Mlu wou u ken hemen u gbem sha won la har sha u we fan Aôndo shi eren ishima na shin er a hendan a we nahan kpaa.—Mateu 5:10-12; Yohane 17:3.