Itinekwagh 14

Er i Kohol Nongo u Mbashiada mba Yehova La

Ka hanma shighe Mbashiada mba Yehova hii mlu ve u ainge ne? (1)

Ka nena ka i er mbamkombo mba Mbashiada mba Yehova? (2)

Ka nena ka i nenge sha mbamgbe mba sha inyara? (3)

Ka an ka nan hemen ken hanma tiônnongo? (4)

Ka mbamkombo mba vesen mba nyi ka ve lu hanma inyomo? (5)

Kanyi tom i eren ken afishi ave a shin itine man a ken agbaa laa? (6)

1. Mbashiada mba Yehova yange ve hii mlu ve u ainge ne ken anyom a 1870 la. Sha hiihii la, i yilan ve er Mbahenen Bibilo. Kpa ken inyom i 1931 la ve tôô iti i ken Icighanruamabera la er Mbashiada mba Yehova. (Yesaia 43:10) Mough sha mbamhii mba kiriki mbara je nongo ne vese zan zan kuma Mbashiada umiliôn imôngo, mba ve lu eren tom u pasen kwagh tsung ken ityar i hemban 230 yô.

2. Atôônanongo a Mbashiada mba Yehova kpishi ka ve lu a mbamkombo kwa tar hanma sati. Mba lôhôn we er u̱ za mô ken ave. (Mbaheberu 10:24, 25) Ka Bibilo i̱ lu kwagh u i tesen a mi ye. Ka i hii shi i kure mbamkombo sha msen. “Amo a gberen a ken jijingi” a sha ishima i môm kpaa ka i gber ken mbamkombo mbara mbagenev kpishi. (Mbaefese 5:18, 19) Mnyer u nyôron ka gbilin, man mba ngohol inyaregh kpaa ga.—Mateu 10:8.

3. Atôônanongo kpishi ka ve nyôr mbamkombo ken Iyou i Tartor. Angan ka ajiir a taver ishe ga a Mbashiada ve ne ayolave sha u maan yô. Ú nenge a ieev ga, iterankon, shin ambaakaa la nahan ken Iyou i Tartor ga. Inyaregh ki ka i vihi u eren akaa la ka i zua a mi sha uiwua mba ior ve ne sha ishima ve yô. Sha ci u mba ve soo  u eren iwua yô, i ver akwati u eren iwua.—2 Mbakorinte 9:7.

4. Ken hanma tiônnongo yô, mbatamen mba, shin mbakuran. Ka ve hemen sha u tesen ken tiônnongo. (1 Timoteu 3:1-7; 5:17) Mba ka ve na ve iwasen yô ka udiakon. (1 Timoteu 3:8-10, 12, 13) Mba kenden a ior mban sha ka hembe mbagenev ken tiônnongo ga. (2 Mbakorinte 1:24) Mba ne ve atiatom a tseghan ga. (Mateu 23:8-10) Mba zeren akondo kposo a mbagenev ga. Shi mba kimbin ve sha tom ve kpaa ga. Mbatamen ka ve na ayolave u wan iko sha mbamgbe mba ior mba ken tiônnongo. Vea fatyô u nan msurshima man mkôôm sha ashighe a mzeiyol a ve yô.—Yakobu 5:14-16; 1 Peteru 5:2, 3.

5. Shi Mbashiada mba Yehova ka ve kemba mbamkohol mbakiriki kua mba vesen hanma inyom. Sha aaven ne atôônanongo ka a kohol imôngo sha u zuan a kwaghwan u vesen ken Bibilo. Batisema u mbahenen mba hev ka vegher u gbekeke sha mver u atôakaa a mbamkohol shin mbamkohol mba vesen mban.—Mateu 3:13-17; 28:19, 20.

6. Ijiir i shin itine i Mbashiada mba Yehova sha tar cii la ngi ken New York. Hen ijiir la i ver Mbakuran mba Shin Tine, ikum i hen atô i mbatamen mba lun a mkav tsung mba ve nengen sha nongo ne sha tar cii yô. Shi agbaa a vesen a nengen sha tom nga kuma 100 nahan sha tar cii. Hen ajiir ne, mba nan iwasen ka ve wase u gberen shi samber a ngeren mba ken Bibilo. Shi ka i na hemen sha mser u tom u kwaghpasen. Er nan ú we iyol sha u zan hen gbaa afishi u a hembe lun ikua a we la ga?