Itinekwagh 11

Jighjigh mba nan man Aeren a a Vihi Aôndo Ishima Yô

Ka jighjigh mba nan man aeren a nyi a lu shami ga? (1)

Doo u Mbakristu vea na jighjigh er Aôndo ka Mbautaraa? (2)

Er nan Mbakristu mba mimi ve ember Kirimishi, Ista, shin ayange a mar ga? (3, 4)

Mbakpenev vea fatyô u vihin mbaumav iyoloo? (5) Yesu yange kpe sha terankonoo? (6) U eren ishima i Aôndo la ka hange hange nena? (7 )

1. Ka hanma jighjigh u nan man aeren cii a lu a bo ga. Kpa Aôndo lumun a ve ga aluer ve due ken kwaghaôndo u aie shin mba kposo a atesen a Bibilo yô.—Mateu 15:6.

2. Mbautar: Yehova ka Mbautaraa—iorov utar ken Aôndo mômôô? Ei! Yehova, Ter, ka “Aôndo u mimi tswen.” (Yohane 17:3; Marku 12:29) Yesu ka Waniunda Na, man ngu sha ikev i Aôndo. (1 Mbakorinte 11:3) Ter hemba Wan. (Yohane 14:28) Icighan jijingi ka or ga; ka tahav mbu tomov mbu Aôndo.—Genese 1:2; Aerenakaa 2:18.

3. Kirimishi man Ista: Yange i mar Yesu sha Disemba 25 ga. Yange i mar un sha shighe u Oktoba 1, iaven i ken inyom i mbakuranilev yange ve ver ilev vev ken won tugh la. (Luka 2:8-12) Mayange Yesu yange wa Mbakristu kwagh er ve̱ ember iyange i mar na ga. Kpa, yange gema kaa a mbahenen nav er ve̱ ember, shin ve̱ umbur, ku na. (Luka 22:19, 20) Kirimishi kua aeren a i̱ cii va ken ukwaghaôndo mbaaie mba sha ayange a ngise la. Ka mimi nahan sha aeren a Ista, anza er u yaren tom a aji man mbaalôm nahan. Mbakristu mba tsuaa la yange ve ember Kirimishi shin Ista ga, man Mbakristu mba mimi nyian kpaa mba ember ve ga.

4. Ayange a Mar: M-ember u ayange a mar ahar tseegh a i ter kwagh u á ken Bibilo la yange lu ior mba ve civir Yehova ga ve er ve ye. (Genese 40:20-22; Marku 6:21, 22, 24-27) Mbakristu mba tsuaa mbara yange ve ember ayange a mar ga. Ieren i ember ayange a mar la i̱  due ken ukwaghaôndo mbaaie mba sha ayange a ngise la. Mbakristu mba mimi mba ne uiwua shi mba lu a ashighe a saanyol imôngo sha aaven agen ken inyom.

5. Mcie u Mbakpenev: Mbakpenev vea fatyô u eren ma kwagh shin fan ma kwagh ga. Se fatyô u wasen ve ga, shi vea fatyô u vihin se ayol kpaa ga. (Pasalmi 146:4; Orpasenkwagh 9:5, 10) Or ka nan kpe; nan ze hemen u lun uma her zum u nan kpe kera la ga. (Esekiel 18:4) Kpa ashighe agenegh mbatyomov mbaiferev, mba i yer er azôv la, ka ve senge er ve mba ujijingi mba mbakpenev. Nyityô ieren i i̱ gbe i zou vea mcie shin mcivir u mbakpenev yô ngi shami ga.—Yesaia 8:19.

6. Terankon: Yesu yange kpe sha terankon ga. Yange kpe sha ityôu, shin sha kon. Ishemberti i ken zwa Grika i i gem er “terankon” ken Ubibilo kpishi la inja na yange lu di bamber kon môm tsô. Ikyav i terankon la i due ken ukwaghaôndo mbaaie mba sha ayange a ngise la. Mbakristu mba tsuaa mbara yange ve yar tom a terankon shin ve civir ú kpaa ga. Sha ci u nahan yô, ú hen wer a lu shami u yaren tom a terankon ken mciviri?—Duteronomi 7:26; 1 Mbakorinte 10:14.

7. Alaghga a taver kpishi u gbihin jighjigh u nan mbagenev kua aeren. Alaghga anngôôv kua ahuraior aa nôngo u kighir we er u̱ de geman jighjigh u nan wou ga. Kpa u eren sha ishima i Aôndo la hemba kan kwagh u vesen a u eren sha ishima i ior.—Anzaakaa 29:25; Mateu 10:36, 37.

[Foto u sha peeji 22 la]

Aôndo ka Mbautar ga

[Foto u sha peeji 23 la]

Kirimishi man Ista due ken ukwaghaôndo mbaaie mba sha ayange a ngise

[Foto u sha peeji 23 la]

Ma ityôkyaa ngi i civir mbakpenev shin cian ve ga