Ka An Nan Lu Aôndo?
Itinekwagh 2
Ka An Nan Lu Aôndo?
Ka an nan lu Aôndo u mimi, man iti na er ana? (1, 2)
Ka inja iyol i nyi a lu a mini? (3)
Kanyi i̱ lu aeren na a tseer tseere? (4)
Doo u se yar tom a ieev man akav sha u civir unu? (5)
Ka igbenda ihiar i nyi se fatyô u henen kwagh u Aôndo? (6)
1. Ior mba civir akaa kpishi. Kpa Bibilo ôr se er Aôndo u MIMI ngu môm tseegh. Yange gba hanma kwagh sha man shin tar cii. Sha ci u yange na se uma yô, ka Un tseegh i gbe u se civir ye.—1 Mbakorinte 8:5, 6; Mpase 4:11.
2. Aôndo ngu a atiatom kpishi kpa ngu a iti i môm tseegh. Iti la ka YEHOVA. Ken Ubibilo kpishi, i dugh iti i Aôndo kera man i wa atiatom anza er TER shin AÔNDO nahan. Kpa shighe u yange i nger Bibilo la, iti i Yehova yange i due ker kuma er ajiir 7,000 nahan!—Ekesodu 3:15; Pasalmi 83:18.
3. Yehova ngu a iyol, kpa ngi er i yase nahan ga. “Aôndo ka jijingi,” kape Bibilo i̱ kaa la. (Yohane 4:24) Jijingi ka inja uma i i tav i hembe uma wase yô. Orumace môm nan ngu a vande nengen a Aôndo ga. Yehova ngu sha, kpa una fatyô u nengen akaa cii. (Pasalmi 11:4, 5; Yohane 1:18) Nahan kpa, kanyi jim i̱ lu icighan jijingi? Ka or er Aôndo nahan ga. Kpa, gema ka tahav mbu tomov mbu Aôndo.—Pasalmi 104:30.
4. Bibilo pase se mlu u Yehova. I̱ tese er aeren a na a a hembe lun tseer tseer yô ka dooshima, perapera, kwaghfan, man tahav. (Duteronomi 32:4; Yobu 12:13; Yesaia 40:26; 1 Yohane 4:8) Bibilo shi pase se er zungu mhôônom, ngu sar sar, den kwaghbo, eren iwua, shi we ishima. Se yô, vough er ônov mba ungwan tindi nahan, doo u se kav un.—Mbaefese 5:1, 2.
5. Doo u se gure inya shin se er msen hen ishigh ki ieev, ufoto, shin akaakperan ken mcivir wase kpa? Ei! (Ekesodu 20:4, 5) Yehova kaa er ka un tseegh se̱ civir ye. Una kar iengem na vea ma or shin ma kwagh genegh ga. Ieev mbi a ma tahav mbu wasen se ga.—Pasalmi 115:4-8; Yesaia 42:8.
6. Ka nena se fa Aôndo se seere? Gbenda môm yô ka u nengen akaa a a gbe la man timen shami zulee sha u fan akaa a a pase se la. Akaa a Aôndo a gbe la tese se er ngu a zege utaha kua kwaghfan. Se nenge aa dooshima na ken akaa a a er la cii. (Pasalmi 19:1-6; Mbaromanu 1:20) Gbenda ugen u se hen kwagh u Aôndo yô ka u henen Bibilo. Kimi a ôr se akaa kpishi sha imba Aôndo u a lu la. Shi a ôr se awashima na man kwagh u a soo er se̱ er kpaa.—Amoshi 3:7; 2 Timoteu 3:16, 17.
[Ufoto mba sha peeji 5 la]
Se fatyô u henen kwagh u Aôndo ken igbetar man ken Bibilo
