Itinekwagh 4

Ka An Nan Lu Diabolo?

Satan Diabolo—yange va hana? (1, 2)

Ka nena Satan ka a tsugh ioro? (3-7 )

Er nan i doo u ú hendan a Diabolo? (7 )

1. Ishemberti i “diabolo” la inja na yô ka or u nan eren mbaaie mba ifer sha orgen yô. “Satan” di yô ka orihom shin or u hendan kwagh. Angan ka ati a i ne orihom u Aôndo u hemban je ne. Sha hiihii la, lu ortyom u vough sha vea Aôndo. Nahan cii kpaa, ken hemen yô a hen kwagh sha iyol na hemba er ma hen la tsô a soo er i̱ na un icivir i i kom u a na Aôndo tswen la.—Mateu 4:8-10.

2. Ortyom ne, Satan, yange ôr kwagh a Ifa sha ikev i iyô. Sha u ôron un mbaaie yô, a na un u peren tindi u Aôndo. Sha nahan yô Satan ta num sha kwagh u i yer er “hemen” u Aôndo, shin ian na i Uhembansha la. Satan yange nyiman er Aôndo hemen sha gbenda u mimi ga shi sha ci u iwasen i ior mba sha ikev Na la kpaa ga. Satan shi yange huna er ma orumace nana za hemen u eren mimi hen Aôndo ga. Sha u eren kwagh ne yô, Satan na iyol na hingir orihom u Aôndo. Kape i lu ve i hingir u yilan un er Satan Diabolo la.—Genese 3:1-5; Yobu 1:8-11; Mpase 12:9.

3. Satan ka a nôngo u bumen ior sha er vea civir un yô. (2 Mbakorinte 11:3, 14) Gbenda môm u ka a tsugh ior yô ka kwaghaôndo u aie. Aluer ma kwaghaôndo ngu tesen mbaaie sha kwagh u Aôndo yô, mimi je ngu eren awashima u Satan. (Yohane 8:44) Alaghga ior mba ve lu ken ukwaghaôndo mbaaie vea hen er mimi je ve mba civir Aôndo u mimi. Kpa sha mimi yô mba civir Satan. Un ka ‘aôndo u tar ne.’—2 Mbakorinte 4:4.

4. Mcivir u azôv ka gbenda ugen u Satan ka a kôr ior ve hingir sha tahav nav yô. Alaghga vea yila azôv er a̱ kura ve, a̱ vihi mbagenev iyol, a̱ tsengakaan kwagh u ken hemen, shin a̱ er uivande. Ka Satan a lu tahav mbu ifer ken ijime i aeren ne cii ye. U eren sha ishima i Aôndo yô, ka keng se lu a ma kwagh u eren a mcivir u azôv ga.—Duteronomi 18:10-12; Aerenakaa 19:18, 19.

5. Satan shi ka a tsugh ior sha imanger i tar u or nan dugh ker la man mcivir u iniongo i pati. Mbagen hen er tar ve  shin ikur ve hemba i mbagenev. Kpa kwagh ne ka mimi ga. (Aerenakaa 10:34, 35) Ior mbagen ka ve kegh ashe sha iniongo i pati er i̱ sôr mbamzeiyol mba or uma. Sha u eren kwagh ne yô, mba vendan Tartor u Aôndo. Ka ú tseegh ua sôr mbamzeiyol asev ye.—Daniel 2:44.

6. Gbenda ugen u Satan a tsughun ior yô ka u meen ve sha asaren a bo. Yehova kaa er se̱ palegh u eren akaabo sha ci u a fa er aa vihi se iyol. (Mbagalatia 6:7, 8) Alaghga ior mbagenev vea soo er u̱ dondo ve ken imba aeren la. Nahan kpa, umbur wer, jighilii yô ka Satan a soo er u̱ er akaa ne ye.—1 Mbakorinte 6:9, 10; 15:33.

7. Alaghga Satan una yar tom a tôvaican shin ahendan u nan sha er ú undu Yehova yô. Alaghga mba doon we ishima mbagenev vea vihi ishima a we tsung sha ci u ú ngu henen Bibilo. Mbagenev vea se ú. Kpa ka sha ikev i an uma wou a lu? Satan soo er una anger we sha er ú de u henen kwagh u Yehova yô. De deen wer Satan a̱ hemba ga! (Mateu 10:34-39; 1 Peteru 5:8, 9) Sha u hendan a Diabolo yô, ú na a saan Yehova iyol shi ú tese wer ú kende a mtemtor Na sha.—Anzaakaa 27:11.

[Ufoto mba sha peeji 9 la]

Kwaghaôndo u aie, mcivir u azôv, man mcivir u tar u or mba tsughun ior

[Ufoto mba sha peeji 9 la]

Hendan a Satan sha u zan hemen u henen kwagh u Yehova