Itinekwagh 3

Ka An Nan Lu Yesu Kristu?

Er nan i yer Yesu er “Waniunda” u Aôndo? (1)

Er nan i yer un er “Imo”? (1)

Er nan Yesu yange va shin tar sha inja i oro? (2-4)

Er nan yange eren uivande? (5)

Kanyi Yesu una er ca ga ken hemene? (6)

1. Yesu yange vande lun or u ken jijingi sha cii ve mase van shin tar ye. Yange lu kwagh u hiihii u Aôndo gba yô, nahan yô i yila un er “Waniunda” u Aôndo. (Mbakolose 1:15; Mpase 3:14) Ka Yesu tseegh a lu Wan u Aôndo yange gba iyol na ye. Yehova yange yar tom a Yesu er lu a̱ va shin tar ga la lu “or u fan tom” na sha u gban akaa agenegh cii sha man shin tar. (Anzaakaa 8:22-31; Mbakolose 1:16, 17) Shi Aôndo yange yar tom a na hingir orshua Na u hemban. Kape i lu ve i yer Yesu er “Imo” la.—Yohane 1:1-3; Mpase 19:13.

2. Aôndo yange tindi Wan na shin tar sha u musan uma na van a mi ken iyav mbu Maria. Nahan Yesu yange lu a ter ken uumace ga. Ka sha ci u nahan ve yange ya dyako u isholibo shin i myen ga ye. Aôndo yange tindi Yesu shin tar sha ci u atôakaa atar: (1) Sha u a̱ tese se mimi sha kwagh u Aôndo (Yohane 18:37), (2) a̱ tese jighjigh u nan vough, nahan a̱ ver se ikyav i se dondo yô (1 Peteru 2:21), man (3) a̱ na nagh sha uma na nahan a̱ sagh se ken isholibo man ku kera. Er nan yange kwagh gba sha kwagh ne?—Mateu 20:28.

3. Sha u vendan tindi u Aôndo yô, or u hiihii la, Adam, yange er kwagh u Bibilo i̱ yer er “isholibo” la. Nahan Aôndo ôr un ijir kure er una kpe. (Genese 3:17-19) Yange kera ar sha atindi a Aôndo ga, nahan kera lu vough ga. Tegh tegh tsô man a beeiyol a kpe. Adam yange pelegh a isholibo la na ônov nav cii. Ka nahan ve se kpaa ka se beeiyol, se gba angev, shi se kpe ye. Ka nena a war uumace?—Mbaromanu 3:23; 5:12.

 4. Yesu yange lu or u vough di er Adam nahan. Nahan cii kpa, kposo a Adam yô, Yesu yange wa iyol na sha ikev i Aôndo vough shin shighe u ikaren i hemban la je kpaa. Sha nahan yô a fatyô u nan nagh sha uma na u vough la sha u kimbin sha isholibo i Adam la. Ka kwagh u Bibilo i yer er ‘ipaan’ je ne. Sha nahan yô a fatyô u saghen ônov mba Adam ken ijirôron i kuu la kera. Mba ve ne jighjigh ken Yesu cii a de ve asorabo a ve shi vea zua a uma u tsôron.—1 Timoteu 2:5, 6; Yohane 3:16; Mbaromanu 5:18, 19.

5. Zum u a lu shin tar la Yesu bee mbauangev angev, na mba ijen kôr ve la kwaghyan, shi yange ujevermbaahumbev kpaa. Yange nder mbakpenev shin ku je kpaa. Ka sha ci u nyi yange eren uivande? (1) Yange mhôônom kôr un a ior mba ve lu yan ican la, nahan a soo u wasen ve. (2) Uivande nav mbara yange ve tese er un ka Wan u Aôndo. (3) Yange ve tese kwagh u una va er sha ci u uumace mba dondon tindi zum u una hingir Tor sha tar cii la.—Mateu 14:14; Marku 2:10-12; Yohane 5:28, 29.

6. Yesu yange kpe man Aôndo nder un shin ku ken jijingi, man a kôndo a yem sha. (1 Peteru 3:18) Hii shighe la je, Aôndo na un Tor. Shi ca ga tsô Yesu una kar a ifer man ican i yan cii sha tar kera.—Pasalmi 37:9-11; Anzaakaa 2:21, 22.

[Ufoto mba sha peeji 7 la]

Tom u Yesu yange kua ityesen, uivande mba eren, man u nan uma na sha ci wase je kpaa