Itinekwagh 9

Ka u Mba Civir Aôndo Vea Lu Waeng Keng

Er nan i lu u saa se lu waeng sha hanma gbenda? (1)

U lun waeng ken jijingi yô inja na kanyi? (2)

lun waeng sha aerene? (3) lun waeng ken mhen? (4) lun waeng sha iyolo? (5)

Ka alam a hôngorough anza er nyi nahan i doo u se palegha? (6)

1. Yehova Aôndo ngu waeng shi ngu icighan. A ver ishima er mba ve civir un cii ve̱ lu waeng—ken jijingi, sha aeren, ken mhen, man sha iyol kpaa. (1 Peteru 1:16) Ka i tôô iniôngon tsung u zan hemen u lun waeng sha ishigh ki Aôndo. Se mba ken tar u u lu waeng ga yô. Shi gba u se nôngon a asaren a ase a eren kwaghbo la. Kpa mayange se haa iyol inya ga.

2. Mlu Waeng u ken Jijingi: Aluer se soo u civir Yehova yô, se fatyô u zan hemen u dondon mô ken atesen shin aeren a ken kwaghaôndo u aie la ga. Ka u se due ken kwaghaôndo u aie kera man mayange se sue un sha ma gbenda môm kpaa ga. (2 Mbakorinte 6:14-18; Mpase 18:4) Er se henen mimi sha kwagh u Aôndo yô, ka u se wa iko dedoo sha er ior mba tesen aie vea tsugh se ga yô.—2 Yohane 10, 11.

3. Mlu Waeng u sha Aeren: Yehova soo er mba civir un ve̱ eren er Mbakristu mba mimi nahan sha hanma iaven  cii. (1 Peteru 2:12) Un nengen hanma kwagh u se er yô, kua u ken myer je kpaa. (Mbaheberu 4:13) Gba u se palegh ijimba i eren sha u yaven a or kua aeren agenegh a hôngorough aa tar ne.—1 Mbakorinte 6:9-11.

4. Mlu Waeng u ken Mhen: Aluer se iv mbamhen asev a akaa a waeng, a a wanger yô, ieren yase kpaa ia lu waeng. (Mbafilipi 4:8) Kpa aluer se har sha akaa a hôngorough yô, kwagh la una va a aeren a ifer. (Mateu 15:18-20) Gba u se palegh amba a uyôghyôgh mba vea ile mbamhen asev la. Se fatyô u ivin mbamhen asev a mbamhen mba waeng sha u henen Mkaanem ma Aôndo.

5. Mlu Waeng u sha Iyol: Sha er ve til sha ityough ki Aôndo yô, gba u Mbakristu vea ver ayol ave kua akondo ave waeng. Gba u se ôô ave ase zum u se ze shin ihungwa se dugh kera yô, shi doo u se ôô a cii man se ya kwaghyan shin se bende kwaghyan ave ye. Aluer ú ngu a ihungwa akôngo i dedoo ga yô, i̱ ii akôngo a i ze la. (Duteronomi 23:12, 13) U lun waeng sha iyol la ka a seer u van a mkpeyol. Gba u ya u Orkristu una lu waeng ken atô man ken won kpaa. Doo u una due tsendee hen haregh la er ka ikyav i dedoo.

6. Iliam i Waeng: Ka u mbatomov mba Aôndo vea ôron kwagh mimi keng. Mba eren aie vea nyôr Tartor u Aôndo ga. (Mbaefese 4:25; Mpase 21:8) Mbakristu mba lamen daeng ga. Mba keghen ato sha u ungwan akaa a hôngorough shin mba eren asenge a hôngorough kpaa ga. Sha ci u iliam ve i waeng ne yô, ka ve due kposo sha ijiir tom ve shin ken makeranta man hen ningir u ve lu la kpaa.—Mbaefese 4:29, 31; 5:3.

[Ufoto mba sha peeji 18, 19 la]

Ka u mbatomov mba Aôndo vea lu waeng sha hanma gbenda cii