Itinekwagh 6

Kanyi Lu Tartor u Aôndo?

Tartor u Aôndo ngu hana? (1) Ka an nan lu Tor u ú? (2)

Mbagenev mba aa kwar u hemen imôngo vea Tor la kpa? Aluer mba a mi yô, ka ume? (3)

Kanyi i tese er se mba ken ayange a masetyô? (4)

Kanyi Tartor u Aôndo ua er sha ci u uumace ken hemene? (5-7)

1. Zum u a lu shin tar la, Yesu tese mbadondon nav er ve̱ sôn Tartor u Aôndo. Tartor ka gomoti u tor nan lu ityough shami yô. Tartor u Aôndo ka icighan gomoti. I ver ú sha man ua hemen sha tar ne. Ua tsegha shin ua ver iti i Aôndo vough. Ua na a er ishima i Aôndo shin tar vough er i eren i̱ sha nahan.—Mateu 6:9, 10.

2. Aôndo yange tôndozwa er Yesu una hingir Tor u Tartor Na la. (Luka 1:30-33) Zum u Yesu lu shin tar la, a tese je er una lu Orhemen u lun a mhôônom ma zungwen, lun a mimi, shi lun vough kpaa. Shighe u a hide a yem sha la, i ver un Tor u Tartor u Aôndo fese je ga. (Mbaheberu 10:12, 13) Ken inyom i 1914 la, Yehova na Yesu tahav mbu A vande tôndonzwa la. Hii shighe la je, Yesu ngu hemen sha er a lu Tor u Yehova a tsough yô.—Daniel 7:13, 14.

3. Yehova shi tsua nomso man kasev mbagenev mba jighjigh shin tar er ve̱ yem sha. Vea hemen vea Yesu imôngo sha vea lu utor, mbaajiriv, man upristi sha uumace. (Luka 22:28-30; Mpase 5:9, 10) Yesu yange yila mba vea hemen a na imôngo ken Tartor na la er “anikumuile u kpeghee.” Mba iyenge 144,000.—Luka 12:32; Mpase 14:1-3.

4. Fese je er Yesu hingir Tor kera yô, a mgbegha Satan man mbatyomov nav mbaiferev mbara sha kera a gbihi ve shin haregh u tar. Kape i lu ve akaa a hembe vihin shin tar heen hii ken 1914 ne. (Mpase 12:9, 12) Ityav, ijen i gban, iangev, mseer u mbavendanatindi—akaa ne cii ka vegher u “ikav” i tesen  er Yesu ngu hemen man tar ungun ne ngu ken ayange a u a masetyô.—Mateu 24:3, 7, 8, 12; Luka 21:10, 11; 2 Timoteu 3:1-5.

5. Shi ca ga tsô Yesu una ôr ior ijir, una pav ve vough er orkuranilev ka nan pav iyôngo a ivo nahan. “Iyôngo” la ka mba ve tese er ve mba sha ikev na shi ve dondo atindi je la. Vea zua a uma u tsôron shin tar. “Ivo” la ka mba vea venda Tartor u Aôndo je la. (Mateu 25:31-34, 46) Ken hemen kpeghee, Yesu una tim mba ve lu er ka ivo la cii. (2 Mbatesalonika 1:6-9) Aluer ú soo wer ú lu môm ken “iyôngo” i Yesu yô, saa ú kegh ato sha loho u Tartor la man ú er sha kwagh u ú lu henen la.—Mateu 24:14.

6. Hegen i pav tar ngu a ityar ker kpishi. Hanma ngu a gomoti u ú. Ityar ne ashighe kpishi ka i nôngo ityav a igenegh. Kpa Tartor u Aôndo ua kar a tema sha ityough ki ugomoti mba uumace cii. A lu ú tseegh ua lu gomoti u una hemen sha tar cii ye. (Daniel 2:44) Tsô ityav mbia kera lu ga, ifer, shin ipila kpaa ga. Ior cii vea lu imôngo ken bem man ken mzough.—Mika 4:3, 4.

7. Zum u Hemen u Anyom Dubu u Yesu la, uumace mba nan jighjigh vea hingir vough, shi tar cii ua hingir paradiso. Ken mkur u anyom dubu la, Yesu una er hanma kwagh u Aôndo lu kaa er a̱ er cii. Tsô una hide aa Tartor la una na Ter na. (1 Mbakorinte 15:24) Er nan ú ôr ahuraior a ou man mba doon we ishima kwagh u Tartor u Aôndo ua va er la ga?

[Foto u sha peeji 13 la]

Sha ikev i hemen u Yesu yô, ihom shin m-ban u iko i wan vea kera lu ga