Itinekwagh 5

Kanyi i Lu Awashima u Aôndo sha Tara?

Ka sha ci u nyi yange Yehova gba tara? (1, 2)

Er nan tar u lu paradiso hegen ga? (3)

Kanyi ia er aferaioro? (4)

Ken hemen yô, kanyi Yesu una er sha ci u mbauangeve? mba beenyolo? mbakpeneve? (5, 6)

U lun aa kwar ken averen a a lu ken hemen la yô, kanyi i gbe u ú ere? (7)

1. Yehova yange gba tar ne sha ci u i̱ kpe uumace iyol u lun sha ú gbem sha won yô. Yange soo er ior mba perapera, mba lun saan saan ve̱ luun sha ú gbem. (Pasalmi 115:16; Yesaia 45:18) Mayange á tim tar ga; ua lu gbem sha won.—Pasalmi 104:5; Orpasenkwagh 1:4.

2. Cii man Aôndo er or yô, A tsua anvegher u tar cuku man a gema un hingir paradiso u doonashe. A yila un er sule u Eden. Lu heen a ver or man kwase u hiihii, Adam man Ifa ye. Aôndo yange washima er ve̱ mar ônov ve̱ iv tar cii. Tegh tegh tsô yange ma ve gema tar cii ma u hingir paradiso.—Genese 1:28; 2:8, 15.

3. Adam man Ifa yange ve er isholibo sha u peren tindi u Aôndo sha apera. Nahan Yehova zenda ve ken sule u Eden kera. Paradiso la saa. (Genese 3:1-6, 23) Kpa Yehova hungur a awashima na sha ci u tar ne ga. A tôndozwa er una gema ú ua hingir paradiso, hen ape uumace vea lu uma gbem sha won yô. Ka nena una er kwagh ne?—Pasalmi 37:29.

4. Cii man tar ne ua hingir paradiso yô, saa a kar a aferaior kera. (Pasalmi 37:38) Kwagh ne una er sha Armagedon, u a lu ityav mbi Aôndo mbi been a ifer la. U dondon yô, a wuhe Satan anyom 1,000. Kwagh ne inja na yô mbaaferev vea kera lu mape sha u vihin tar ga. A lu ior mba Aôndo tseegh vea war ye.—Mpase 16:14, 16; 20:1-3.

5. Tsô Yesu Kristu una tema Tor sha  tar ne anyom 1,000. (Mpase 20:6) Tegh tegh tsô una kar a isholibo ken asema a ase man sha iyol yase kera. Se hingir uumace mba lun vough di er Adam man Ifa kpaa yange ve lu cii man ve er isholibo la nahan. Tsô angev mbua kera lu ga, iyolbeen, man ku kpaa ga. A bee mbauangev angev vev, man ior mba beenyol kpaa vea hingir iyev her.—Yobu 33:25; Yesaia 33:24; Mpase 21:3, 4.

6. Zum u Hemen u Anyom Dubu u Yesu la, uumace mba nan jighjigh vea er tom sha u geman tar cii hingir paradiso. (Luka 23:43) Shi, a nder mbakpenev umiliôn vea hingir uma sha tar. (Aerenakaa 24:15) Aluer ve er kwagh u Aôndo a soo her ave yô, vea za hemen u lun sha tar gbem sha won. Aluer ve er ga yô, a tim ve gbem sha won.—Yohane 5:28, 29; Mpase 20:11-15.

7. Sha nahan yô awashima u hiihii u Aôndo la maa una iv. Ú soo wer ú lu aa kwar ken averen a a lu ken hemen ne kpa? Aluer ú soo yô, gba u ú za hemen u henen kwagh u Yehova shi dondon akaa a a soo la. U zan mbamkombo hen Iyou i Tartor i Mbashiada mba Yehova i i lu hen ningir wou la una waseu u eren kwagh ne.—Yesaia 11:9; Mbaheberu 10:24, 25.

[Foto u sha peeji 10 la]

Paradiso saa

[Ufoto mba sha peeji 11 la]

Armagedon una karen kera yô, a gema tar ua hingir paradiso