1-3. (a) Ka ikyav mbi yuhwan mbi nyi orpasalmi Davidi yange tôô ken ishima naa, man er ishima lu zan un iyol nahan kpa, á zua a msurshima nena? (b) Zum u se er isholibo yô, ka ikyav mbi nyi nahan ka se tôô ken ishima yase, kpa Yehova taver se ishima ér nyi?

ORPASALMI Davidi nger wener: “Aferakaa am cirim, yisa, a yuhwam a hembam, er ikav mbi yuhwan yum yô. M ure, kundam iyol tsung.” (Pasalmi 38:4, 8) Davidi fa er imoshima ibo ngi i za or iyol tsung, i lu nan er nan tôô ikyav mbi yuhwan nahan yô. Er ishima za un iyol kpishi nahan kpa, a zua a ishimasurun. Yange fa er Yehova a ker isholibo ihyom, i lu or u nan er isholibo, kpa nan gem ishima sha mimi nan undu i la ga yô. Davidi na jighjigh wener Yehova kegh iyol u den mba ve gem asema la asorabo a ve, nahan á kaa wener: “We, Tere, . . . U kegh iyol u den kwaghbo.”—Pasalmi 86:5.

² Zum u se er isholibo yô, alaghga se kpa imoshima yase ia za se iyol tsung. Afanyô a vaan ka kwagh u dedoo. Nga a wase se se kera kimbir eren isholibo shon ga. Nahan kpa, aluer se kôr ityou ga yô, isholibo yase ia na se ure kpishi je a kar ikyaa inya. Ishima ia na se ibo, ia zer kaan a vese ér aluer se gema ishima nan nan kpa, Yehova una de se kwaghbo wase ga. Aluer ijungwen yase la ‘hemba’ se yô, Satan una gba nôngon er se yina ishima, se hen ser Yehova tôô er se vihi kpishi je, se kuma u civir un cuku cuku kpaa ga.—2 Mbakorinte 2:5-11.

³ Kpa ka mhen u Yehova laa? Mayange ga cii! Mde u asorabo ka vegher u dooshima u Yehova u hemban la. A taver se ishima ken Mkaanem nam ér aluer se gema ishima sha mimi a ishima yase cii yô, una de se kwaghbo wase kpee je. (Anzaakaa 28:13) De se nenge nen er i hii ve Yehova a den se asorabo yô, shi se nenge gbenda u a den se asorabo la kpaa, sha er mayange je se hen ser, se gande u Yehova una de se asorabo ga yô.

4. Yehova umbur ér se mba nyi, man kwagh ne bende a gbenda u a eren kwagh a vese la nena?

⁴ Yehova fa mbamyen asev. Pasalmi 103:14 kaa ér: “Un yô, A fa mlu wase, A umbur er se lu vuulevu je yô.” Mayange je hungur un er se lu vuulevu, se yen sha ci u mlu wase u vough ga la ga. Ishember i i ôr heen ér á fa “mlu wase” la i umbur se er Bibilo i kar Yehova sha ormaantyegh, shi i kar se sha ityegh ki inyaagh ki á maa la yô. * (Yeremia 18:2-6) Ormaantyegh u Vesen ne eren kwagh a vese sha tswam ga. Eren kwagh a vese vough sha mlu wase u se yen la, man sha gbenda u se dondon kwaghwan na shin se dondon ga la kpaa.

5. Takerada u Mbaromanu pase se tahav mbu isholibo nena?

⁵ Yehova fa agee a isholibo i lu a mi yô. Mkaanem nam pase se kwagh u isholibo ér ka tahav mbu ageegh mbu mbu ker uumace je pe nôngon a lu ga yô. Isholibo kôr uumace dông nena? Apostoli Paulu pase ken takerada u Mbaromanu ér: Se mba “sha ikev i isholibo” vough er ushoja ve lun sha ikyev i kurutya nahan. (Mbaromanu 3:9); isholibo “tema tor” sha orumace er orhemen nahan (Mbaromanu 5:21); i ‘tema ya’ ken a vese (Mbaromanu 7:17, 20); “tindi” u isholibo ngu eren tom ken a vese hanma shighe, ngu nôngon una gema se. (Mbaromanu 7: 23, 25) Sha mimi yô, isholibo kôr iyol yase i i yen ne gbang gbang je ngi a pe zan ga!—Mbaromanu 7:21, 24.

6, 7. (a) Yehova nengen mba ve zamber a na a ishima i zunguluu ér a̱ zungwe ve mhôônom la nena? (b) Er nan ve i doo u se nenge mhôônom ma Aôndo ser ka gbilinkwagh ga?

⁶ Nahan yô, Yehova fa doo doo ér aluer se nôngo nan nan ser se kuran atindi a na kpa se fatyô u eren nahan za been ga. Nahan a taver se ishima kundu kundu wener, aluer se er kwaghbo kpa se vaa afanyô sha kwaghbo la, shi se zamber a na ser a zungwe se yô, una zungwe se. Pasalmi 51:17 kaa ér: “Nagh ku Aôndo A rumun yô, ka jijingi u zamber; ishima i zamber, i uren  tsung yô, U laha ga, Aôndo.” Mayange je Yehova una venda ishima i i lu “zamber” shi “uren tsung” sha ci u ibo i ken ishima la ga.

⁷ Kwagh ne gema na a na se ian i nengen mhôônom ma zungwen ma Aôndo la ser ka gbilinkwagh, nahan eren asorabo sha ishima yase sha ci u i mar se ken isholibo yumu? Mayange ga! Se fatyô u bumen Yehova sha ieren yase ga. Mhôônom nam ma zungwen ma a ikighir. Mayange je una de mba ve eren asorabo sha apera, mba ve vende u geman asema la asorabo ve ga. (Mbaheberu 10:26) Nahan kpa, or ka nana vaa afanyô sha kwaghbo u nan er, nana ure tsung yô, á de nan isholibo i nan la. De se nenge ase nen akaa agen a Bibilo i ôr se wanger wanger, a a pase se kwagh u vegher u doon tsung u dooshima u Yehova ne yô.

8. Yehova ka una de se asorabo a ase nahan, ngu a er nena a á, man kwagh ne na se vangertiôr u nyi?

⁸ Davidi yange er isholibo, kpa gema ishima. Nahan á kaa ér: ‘M pase isholibo yam sha ishigh Yough, ifer yam kpaa m yer U ga, tsô We U dem ibo i isholibo yam.’ (Pasalmi 32:5) Ishember i á kaa heen wener, u “dem” ibo i isholibo yam ne i pase se kwagh u ishember igen ken zwa Heberu. Ikyav i ishember shon yô ka “u kenden a kwagh sha” shin “tôôn kwagh kera.” I yar tom a mi ken ivur ne u ôron kwagh u “ibo i ken ishima man isholibo kua mtsum” u i tee kera yô. Nahan yô, Yehova yange tôô asorabo a Davidi, yem a mi kera. A̱ shi nan kpa, ishima pever Davidi ker kpishi. (Pasalmi 32:3) Se kpa se fatyô u lun a vangertiôr ken Aôndo u á zungu mba ve zamber a na ér a̱ de ve asorabo a ve sha ci u jighjigh u ve ne naagh ku ipaa ku Yesu la.—Mateu 20:28.

9. Yehova ka una de se asorabo a ase yô, ka á tôô a á gbihi ica a vese nena?

⁹ Davidi shi ôr se kwagh ugen wanger wanger u a pase se gbenda u Yehova a den asorabo yô. Á kaa wener: ‘Er ica i ityoughkitaregh a ityôtar nahan, kape ngu A pav akaabo ase a vese la.’ (Pasalmi 103:12) Ityoughkitaregh gba ica a ityôtar kighir nena?  Se fatyô u kaan ser ityoughkitaregh gba ica a ityôtar hemba cii; avegher a ahar ne aa zua mayange ga. Orfantakerada ugen kaa wener, inja i ishember ne yô ka “kwagh u a gbe ica kpishi yô; u a gbe ica je se fe ikighir ga yô.” Mkaanem ma Aôndo na Davidi nger ne ma kaan a vese ér, shighe u Yehova a de se asorabo ase yô, ngu a tôô a a gbihi ica a vese.

10. Shighe u Yehova a de se asorabo yô, er nan ve i doo u se hen ser acôghor a asorabo la aa bee se iyol mayange ga ze?

¹⁰ Er i lu je nahan u nôngo wer u kire ii sha ikondo i pupuu vee? Alaghga u nôngo kpoghuloo kpa u fatyô ga. Nenge ase er Yehova a pase tahav mbu a lu a mi mbu den asorabo la yô. Á kaa wener: ‘Va nen ase, sé hen nen kwagh imôngo, kape TER A kaa ne; shin er asorabo a en a nyian bong, nahan kpaa aa kungu er awombo nahan; shin er a nyian er kpagh nahan kpaa aa kungu er mou nahan.’ (Yesaia 1:18) * Sha iniôngon yase tseegh  yô, mayange se fatyô u been a acôghor a isholibo kera ga. Kpa Yehova yô, ngu a tahav mbu kôron asorabo a a nyian bong la geman a mi sha u a kungu er awombo shin er mou nahan. Nahan zum u Yehova a de se asorabo yô, ityôkyaa kera ngi i se hen ser acôghor a asorabo shon aa bee se iyol mayange ga ze.

11. A fatyô u kaan ér Yehova gbihi asorabo ase ken ijime na nena?

¹¹ Zum u Yehova war Hesekia sha bouange yô, á dugh icam i kôron ken ishima á wuese Yehova. Á ôr kwagh u Yehova ken icam la wener: ‘U gema asorabo am cii U gbihi ken ijime You.’ (Yesaia 38:17) Ijiir ne tese ér, Yehova gem asorabo a mba ve gem asema la gbihin ken ijime, ape ashe aa gber un sha a shin una kera ver ishima sha a ga yô. Takerada ugen kaa ér, a fatyô u ôron mkaanem man sha gbenda ugen ér: “U gema [asorabo am] a hingir er m er a ga nahan.” Mkaanem man ka ma taver se ishima kpen kpen.

12. Profeti Mika tese ér Yehova ka una de se asorabo yô, a hungur a á gbem sha won nena?

¹² Ngise profeti Mika ôr kwagh u ityendezwa i Yehova er ér una hide a ior nav ken tar ve la vangertiôr wener, Yehova una de ior nav mba ve gem asema la asorabo ve. A kaa ér: ‘Ka an nan lu Aôndo er We nahan, u U deen atindi a peren a asande a dyako Wou a a shi her laa? Man U haa asorabo ase cii shin aiv a zegemnger.’ (Mika 7:18, 19) Nenge er mkaanem man yange maa lu ior mba sha ayange a i lu ngeren Bibilo la ken ishima sha wono. Ma gbenda lu u dughun kwagh u i haa “shin aiv a zegemnger” je kpa? Nahan yô, mkaanem ma Mika man tese ér zum u Yehova a zungu se asorabo yô, ka a hungur a gbem sha won.

13. Ikyav i mkaanem ma Yesu a kaa wener, “De se anzô a ase” la ér nyi?

¹³ Yesu yange tôô kwagh u or u nan ne orgen injô man or u nan ngohol injô hen orgen yô pase se er Yehova a den se asorabo yô. Á kaa a vese wener se eren msen ser: ‘De se anzô ase.’ (Mateu 6:12) Nahan yô, Yesu lu karen asorabo a ase sha anzô. (Luka 11:4) Ka sea er isholibo yô, se hingir “mba gban anzô” hen Yehova. Takerada ugen ôr kwagh u ishember i ken zwa Grika i i gem ér, “de se anzô ase la” ér: “Ka u kera yaren or injô i  nan ngohol la ga.” Nahan yô, Yehova ka una de se asorabo yô, kera ker se kwar sha injô la ga. Nahan mba ve gem asema sha asorabo ve la cica cii vea fatyô u zuan a msurshima. Mayange Yehova una kôr se kwar sha injô i a de se a mi la ga!—Pasalmi 32:1, 2.

14. Ishember i i kaa ér “i̱ ese asorabo a en kera” la wase se u kaven nyi kwagha?

¹⁴ Aerenakaa 3:19 kpa seer pasen se gbenda u Yehova a den se asorabo a ase la. Ijiir la kaa ér: ‘Yô, zamber nen man gema nen ishima, sha u i ese asorabo a en kera’ yô. Ishember i i nger heen ér i ese kera ne, i tile sha ityough ki ishember igen ken zwa Grika. Ikyav i ishember shon yô ka “u ovur kwagh kera, . . . u koughon kwagh gayô vihin un kera.” Mbafantakerada mbagenev kaa ér, ishember ne ngi ôron se kwagh u kwaghngeren u i kough un kera yô. Yange a nger kwagh man a soo u koughon un kera nahan i er nena? Inki u i ngeren kwagh a mi sha ayange a ngise la lu aka man mningem man mngerem i eren a mi ye. Nahan or a nger kwagh a mi man a lu nan pe koughon un kera yô, nan mir soso shin mnger nan kough kwagh shon. Kwagh ne tese se er Yehova a lu a mhôônom kpishi yô. Ka una de se asorabo a ase yô, ka i lu inja er a tôô soso a ese a kera nahan.

15. Kanyi kwagh Yehova a soo ér se fa sha kwagh naa?

¹⁵ Aluer se hide se hen sha akaaôron a sha ikyav a i tér sha heen ne yô, se lumun ser sha kpôô yô Yehova soo wener se fa ser un wa iyol un kegh a kegh u den se asorabo aluer se gema ishima sha mimi ga he? Ityôkyaa ngi i se cia ser, una kôr se kwar sha a ken hemen ga. Se fa kwagh ne nahan sha ci u kwagh ugen u Bibilo i er se sha kwagh u mhôônom ma Yehova la. I kaa ér: Ka una de se asorabo a ase yô, kera umbur a ga.

16, 17. Bibilo ka ia kaa ér Yehova umbur asorabo a ase ga yô, ngi kaan ér nyi jimi, man er nan u ne ikyar nahana?

¹⁶ Yehova ôr kwagh u mba a ye ikyur i he a ve la, wener: “Me de ve ifer ve, asorabo a ve kpaa Me kera seer u umbur a ga.” (Yeremia 31:34) Kwagh ne tese ér Yehova ka una de or isholibo  i nan yô, kera fetyô u umbur i ga shinii? Kwagh a fatyô u lun nahan ga. Bibilo ôr se kwagh u ior kposo kposo mba ngise Yehova de ve asorabo ve yô. Ken ve yô lu Davidi. (2 Samuel 11:1-17; 12:13) Nahan se fa tsô ser, akaabo a yange ve er ne nga a hungur un ga. I nger kwagh u asorabo a ve ne kua mgemshima ve man mde u Aôndo de ve asorabo la cica cii sha ci u iwasen yase. (Mbaromanu 15:4) Nahan yô, inja i kwagh u Bibilo i kaa ér Yehova ka una de ior asorabo yô kera “umbur” a ga la ér nyi?

¹⁷ Ishember i ken zwa Heberu i i gem ér “Me . . . umbur” la i saa di sha u kôron kwagh u a er a kar la saan a mi ken ishima tseegh ga. Takerada u i yer ér Theological Wordbook of the Old Testament la kaa ér ishember ne tese “m-mough u or moughon sha eren kwagh u nan umbur la.” Nahan yô, aluer Aôndo “umbur” isholibo i mbaaferev yô, kwagh ne tese ér una tsaha  ve. (Hosea 9:9) Kpa aluer Aôndo kaa ér “asorabo a ve kpaa Me kera seer u umbur a ga” yô, ngu kaan a vese ér ka una zungwe mbaasorabo mba ve gem asema la yô, mayange un tsahan ve sha a ken hemen ga. (Esekiel 18:21, 22) Nahan yô, ka a̱ kaa ér Yehova hungur asorabo a ase yô, kwagh ne tese ér umbur a hanma shighe sha er una zer tsahan se kpii ga. Doo se tsung er Aôndo wase a den se asorabo shi á umbur a ga nahan kpa?

18. Er nan ve Yehova ka una de or u nan gem ishima isholibo i nan kpa, nan sunda injar i isholibo shono?

¹⁸ Er Yehova a we iyol a keghen a kegh u den se asorabo yô, kwagh ne tese ér aluer or er isholibo kpa nan gema ishima yô kwagh a kera tser nan sha isholibo i nan la ga shinii? Ei, ka nahan ga. Mayange je se fatyô u eren isholibo yemen iyol ishô ga. Paulu nger wener: “Kwagh u or nan lee yô, shi ka un je nana sunda ye.” (Mbagalatia 6:7) Akaa a vihin aa fatyô u duen ken isholibo yase. Kpa u ngu wer, Yehova ka una de se asorabo kera cii yô, shi a hide a gba tsahan se sha a ga. Aluer Orkristu ngu yan ican sha ci u isholibo i nan yô, mayange nana de henen ér, ‘Alaghga tsô ka Yehova a lu tsahan mo sha asorabo am’ ye, ga. (Yakobu 1:13) Kpa, Yehova kor se sha ikyev i hanma kwagh u bo u isholibo yase i ve se a mi ga. Akaa a vihin amba er ivaapaven shin yav mbu kwase wan abu kua angev mbu tsaren sha idya man mne u kera nan or jighjigh ga kua icivir kpaa ga la aa fatyô u tseren se kpee sha ci u asorabo ase. Aluer u umbur yô, Davidi yange er idya a Betesheba shi wua nom na Uria, kpa Yehova de un isholibo ne, nahan kpa Yehova kera kura un sha akaa a vihin tsung a a due ken isholibo na la ga.—2 Samuel 12:9-12.

19-21. (a) Tindi u i nger ken Levitiku 6:1-7 la lu a inja hen or u i ii nan man ormbaiv la nena? (b) Aluer isholibo yase i bende a mbagenev yô, kanyi se er ve a doo Yehova a vese?

¹⁹ Akaa a vihin agen kpaa aa fatyô u duen ken asorabo a ase, hemban je yô aluer kwagh u se er u bo la bende a mbagenev kpaa yô. Ikyav i tesen yô, nenge kwagh u i nger ken Levitiku ityough 6 la. Ityough kin ôr se kwagh u Tindi u Mose ôr  sha kwagh u or u nan er isholibo i vesen, nan ii anmgbian u nan ken Iserael kwagh, gayô nan ye nan kwagh sha apera shin nan nyighe nan yô. Or shon ne nan tuna kwagh u nan er la, je nan cia ga nan bum sha aie kpaa. Orgen môm ngu u eren shiada sha ifer i nan ne ga saa or u i ii nan kwagh la tseegh. Er nan tun cii nahan kpa, ishima i va na nan ibo kpoghuloo, tsô nan pase isholibo la ken igbar. Shin er nan lumun ibo nahan kpa, yange nana̱ soo ér Aôndo a̱ zungwe nan yô, nan er akaa agenegh atar. Yange i gba u nana hide a kwagh u nan ii la shi nana seer kwagh sha mi a kuma môm-ken-utaan u kwagh u nan ii la, nana eren nahan cii yô maa nan na Aôndo naagh ku iboogh sha nomiyôngo. Tindi yange kaa ér nana eren akaa ne cii yô, “pristi a̱ na iwom sha ci u nan sha ishigh ki TER, nahan á de nan kwaghbo u nan” la.—Levitiku 6:1-7.

²⁰ Tindi ne lu gbenda u eren kwagh u Aôndo ver sha u zungwen ior yô. Lu a mtsera hen or u i ii nan kwagh kpa i hidi nan a mi la; a̱ shi nan kpa, iferor la yange nana lumun ibo i nan nahan ishima i pever or u i ii nan kwagh la ker kpen kpen. Heela tseegh ga, tindi ne lu a iwasen hen ormbaiv u imoshima i nan i ze nan iyol ve nan lumun ibo shi nan hidi a kwagh u nan ii la kpaa. Kpa imba or la yange nana venda u geman ishima, hiden a kwagh u nan ii la yô, Aôndo a de nan asorabo a nan ga.

²¹ Shin er se lu sha ikyev i Tindi u Mose la ga nahan kpa, Tindi la wase se u kaven ishima i Yehova kua mhen na sha kwagh u mde u asorabo. (Mbakolose 2:13, 14) Ka sea er isholibo man ia bende a mbagenev, kpa sea sôr kwagh u se er la yô, i doo Aôndo kpen kpen. (Mateu 5:23, 24) Alaghga a gba u se pase isholibo yase, se lumun ibo shi se zamber a or u se er nan isholibo la ser nana ya se anyi. Nahan er Yesu a ne naagh sha ci wase yô, se fatyô u sônon Yehova ser a̱ zungwe se. Ka hen shighe la se fatyô u nan jighjigh a akpelan shio ser Aôndo de se isholibo yase la ye.—Mbaheberu 10:21, 22.

22. Ashighe agen Yehova ka una de se asorabo ase yô, shi a er nyi?

²² Ashighe agen yô Yehova ka una de se asorabo a ase kpa, á tsaha se, di er ormaren u mbayev mba nan ve doo nan ishima kpa ka nan er nahan. (Anzaakaa 3:11, 12) A fatyô u dughun Orkristu  u nan gem ishima la ortamen kera shin diakon shin a de nan tom u orpasen ivangeli hanma shighe la. Alaghga a nyoon nan kpishi sha er i dugh nan sha iantom i nan i i doo nan ishima yum la yô. Kpa u ngu wer, tsaha ne tese ér Yehova de nan a isholibo i nan ga ze. Doo u se fa ser tsaha u Yehova ka ikyav i dooshima na hen a vese. Ka sea ngohol u shi sea er tom sha kwagh u i we se la yô, se zua a iwasen.—Mbaheberu 12:5-11.

23. Er nan ve i doo u se kure ikyaa ser isholibo yase i gande u Yehova a zungwe se mhôônom ga, man er nan ve i doo u se kav Yehova sha gbenda u a den se asorabo laa?

²³ Sha kpôô yô, pever se iyol kpishi er se fe ser Aôndo wase ‘keghen iyol u den se kwaghbo’ nahan! Aluer sea er kwaghbo nan nan kpa, mayange je doo u se kure ikyaa ser, isholibo yase i gande u Yehova una zungwe se mhôônom ga. Aluer u gema ishima sha mimi, u tôô angahar a sôron kwagh u u er la, shi u sôn Yehova tsung wer a̱ de u a isholibo you sha ci u awambe a Yesu a hee inya la yô, una de u i kpee je. (1 Yohane 1:9) Yô, se dondo nen gbenda na u a den se asorabo la sha ieren yase a mbagenev. Sha mimi yô, aluer Yehova, un u a eren kwaghbo ga la ngu den se asorabo a ase yô, doo u se uumace, se mba se lu mbaasorabo ne se nôngo sha afatyô wase cii se deen mbagenev asorabo ve ga he?