Inja I Akaa A Á Lu Zan Hemen Ne Jim Yô Ér Nyi?

YESU KRISTU kaa ér: Akaa á aa tese ér ‘mkurtar’ shin mkur u tar ungun ne mgbôghom yô ka ityav man ijen man ubombauangev man ityartenger.—Mateu 24:1-8; Luka 21:10, 11.

Hii ken inyom i 1914 la je, ityav mbi hen atô u ikyurior igen a igen kua hen atô u ior mba lamen ijô kposo kposo la zer vihin mkpeyol u ior, man ashighe kpishi lu mbahemenev mba ukwaghaôndo núm mba patii ér ve̱ er akaa ne ye, shi hegen di ka num u mbatswamev ve lu tan sha ior sha ajiir wue wue la.

Shin er orumace a ze ikyura ken igbenda i he i kahan sule nahan kpa, ior umiliôn imôngo mba ijen sha ajiir wue wue sha tar. Hanma inyom yô ior umiliôn imôngo ka ve kpe ijen.

Ubombauangev, shin iangev mbi tsaren ior mbì mbí samber wuee la kpaa, ka vegher u ikyav shon i Yesu yange na la. Yange Ityav mbi Tar cii Mbi sha I mbila mbi been kera cii yô, bo hough ugen za va, samber wuee wua ior je hemba iorov 21,000,000. Kera lu er iangev mbi tsaren mbi ngise mbia va kpa, mbi saa di hen anjiir môm tseegh la ga, bo hough ne yange ar ken ityar i í lu ca hiinii je kpaa, kua ken acile a caa kpaa. Hegen angev mbu nan ikyande mbu í yer ér AIDS mbula mbu kuan a ior beee tar sha won cii, shi bouange er houghbar man iyolhian man angev mbu mnyaav nahan kpa mbu di kôron ior mba ken ityar i mzehemen á fe lun ker ga ne her tsô.

Ibaver tese ér hanma inyom yô tar ka u tenger í kuma acin udubu pue pue sha ajiir kposo kposo sha tar, shi kape ka ú vihi akaa kpishi kpaa je la. Shin er í seer varen mbaanar mba kérén fan ajiir man ashighe a tar ua tenger la nahan cii kpa, aahe ne ngu zeren eren sha ajiir a ior ve cir her kpulughuu la kpii, je yô mba zeren duen a mi sha abaver gbem.

Shi Bibilo tsengapasen kpaa ér: “Fa kwagh ne. Ken ayange a masejime yô, ashighe a ican aa va. Gadia ior vea hingir mbawan ayol a ve iko tseegh man mba inyaregh ki doo ve ishima man mbahagher sha akaa man mbagengese iyol man mbaôron kwagh dang dang, man mbahemban mbamaren ve ato man mbalun a ishughun ga man mbalun wang ga, man mbalun a dooshima ga man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga man mbapasen ior aker man mbawan uma ve iko ga man mbamoron ayol a ve man mba iember i iyolough i hembe doon ve a Aôndo la. Sha ashe yô mba a mlu u civir Aôndo la kpa mba geman mba nyiman agee la. Nyagh ambaaior la.”—2 Timoteu 3:1-5.

We ú nenge e̱r se lu ken “ashighe a ican” á taver tsung nahan gaa?

Ú nenge er ior ve hembe soon ayol a ve je í za gande, shi inyaregh ki hembe doon ve ishima, shi ve iv a imanger kpaa je í kar ikyaa inya gaa?

Ka an je nana tuna ér tar iv a ior mba ve keren mkpeyol ve ayol a ve tseegh, kpa mayange ishughun yô ve lu a mi ga sha wono, shin nana tuna ér  tar mgbough a ior mba ve soon u himen iyongo ga shi lun kpa ve lu wang ga sha wono?

Ú fa er mhembe u mbayev ve hembe mbamaren ve ato je í kpiligh iyol, shi ior kpa ve kera lun a dooshima ga ne a seer í lu sha ajiir kpuaa tseegh ga, kpa í lu tar sha won cii kpa?

Anyiman nga sha kwagh ne ga cii, we kpa ú kav wer tar u se lu ker ne ú mgbough a ior mba iember i iyolough í hembe doon ve ishima a nyityô kwagh igen cii, shi mayange kwagh u dedoo a doo ve ga yô. Kape Bibilo i pase ér “ken ayange a masejime” yô akaa aa lu je ne.

Shi kwagh ugen kpa ngu u se nenge a mi ve, se kav shighe u se lu ker ne yôô? Yesu shi yange tsengapasen wener á va kuma sha shighe ne yô, á pase loho u dedoo u Tartor u Aôndo ne á tser tar cii. (Mateu 24:14) Mba eren kwagh ne nahan kpa?

Í zer gberen ngeren u a har sha Bibilo í yer ér Iyoukura, u̱ a shi di sha u yôôn loho u dedoo u Tartor u Yehova tseegh la ken ijô wue wue, je yô ma ngeren ugen môm sha tar u í gberen ken ikpela ijô nahan yô, ngu ga.

 Hanma inyom yô, Mbashiada mba Yehova ka ve pase ior kwagh u Tartor u Aôndo asange asange je i hemba ahwa biliôn jimin.

Mba ngeren ityakerada i tan iwanger sha Bibilo hegen kuma er ken ijô 400 nahan, man ajiir a mbagenev mba lamen ijô ne ve lu la taver u aren her, mbagenev yô ngeen kpa ve fa ngeen ingyegh ga. Mbashiada mba Yehova za aa loho u dedoo ne hen akuraior cii; shi ve pase kwaghaôndo ken uicile kua uharegh mbagenev kpishi sha tar mba tar u patii yô kwagh a gbe ú her ga yô. Ve ver aan mba tesen ior Bibilo hanma shighe ken ityar kpishi.

Sha kpôô yô, mba pasen loho u dedoo u Tartor u Aôndo ne hanma ijiir sha tar cii, kpa ka sha u á gema tar cica cii keng ga, ka u i lu mpase hen ú tsô. Hanma ijiir i ior ve lu cii yô, mba nan ve ian ér kwagh a̱ gba ve sha un u a gbe sha man tar la yô, ve̱ tese ikyav, shi vea soo u wan atindi na ikyo shi lun a dooshima hen orumace ugen kpaa shi ve̱ tese tseer tseer.—Luka 10:25-27; Mpase 4:11.

Kera shi ica ga tsô, Tartor u Aôndo ua kar a mbaaferev sha tar cica cii kera, ua gema ú ua hingir paradiso.—Luka 23:43.

[Ngeren u kiriki u a lu sha peeji 6 la]

Ayange a Masejime á Nyi?

Ú ngu wer ka ayange a masejime a orumace jimin cii ga. Mba ve lu eren ishima i Aôndo yô, Bibilo tese ér vea lu uma gbem sha won.—Yohane 3:16, 36; 1 Yohane 2:17.

Shi ka ayange a masejime aa tar jim kpaa ga. Mkaanem ma Aôndo er ityendezwa ér tar ú se lu sha ú ne ua lu her gbem sha won.—Pasalmi 37:29; 104:5; Yesaia 45:18.

Kpa, gema ka ayange a masejime a botar u ipila man m-ban u dooshima a mgbough ker ne, shi ka ayange a masejime a mba ve nômbo ikyôr eren aeren a ú ne kpaa.—Anzaakaa 2:21, 22.

[Ngeren u kiriki/​Foto u sha peeji 7 la]

Mimi Je Bibilo Ka Mkaanem ma Aôndo?

Uprofeti ôr ken Bibilo kwa kimbir kimbir ér: “TER ngu kaan nahan er.” (Yesaia 43:14; Yeremia 2:2) Yesu Kristu u a lu Wan u Aôndo je kpa, yange ôr var var wener ‘mkaanem ma un er ne, un er ma ka sha tahav nav ga.’ (Yohane 14:10) Shi Bibilo iyol i i kpa i kaa wang nahan ér: “Icighanruamabera cii ka Aôndo A ne i nger ye.”—2 Timoteu 3:16.

Ma takerada ugen môm tsô kpa í gber ú ken ijô kpishi kuma er i gber i nahan ga—mzough u gberen Bibilo u í yer ér United Bible Societies la due a ibaver nahan ér í gber Bibilo ken ijô hemba 2,200. Shi í gbe je mba a̱ samber a ma takerada ugen i kuma er í samber a i nahan ga—í samber a i hegen hemba ukôpi biliôn unyiin. Kape we kpa ú nenge wer kwagh u loho u ú dugh hen Aôndo shi ú lu sha ci u orumace cica cii yô, a̱ lu ne gaa?

Aluer ú soo u seer timen zuan a akav a tesen ér ka Aôndo a ne í nger Bibilo yô, nenge ken ityough ki sha uhar ki takerada ú í yer ér Mfe u Una Va a Uma u Tsôron La, ka Mbashiada mba Yehova ve gber ú ye.

Aluer ú ôr Bibilo shi ú lumun wer mimi je ka Mkaanem ma Aôndo yô, ú zua a mtsera kpishi.

[Ngeren u kiriki/​Foto u sha peeji 8 la]

Tartor u Aôndo Kanyi?

Ka gomoti u sha, u̱ í lu Yehova, Aôndo u mimi u a gbe sha man tar la iyol na je, á ver yô. —Yeremia 10:10, 12.

Bibilo kaa ér ka Yesu Kristu Aôndo á ne un tahav ér a̱ lu tor u Tartor shon ye. (Mpase 11:15) Zum u Yesu lu shin tar la, tese ér hen shighe la je kpa Aôndo na un tahav mbu kpilighyol—lu tahav mbula mbu na ve lu aa tahav sha ahumbe man zegemnger kua akaa agenegh kpaa ye, shi lu mbu kpaa been hanma inja uange cii a mi, shi nderen mbakpenev je kpa shin ku a mbu ye. (Mateu 9:2-8; Marku 4:37-41; Yohane 11:11-44) Kwaghôron u profeti u Aôndo na í nger la vande pasen je ér Aôndo una na un “tor sha won cii man icivir man tartor, sha u ior man akuraior man ijô cii ve̱ er Un tom.” (Daniel 7:13, 14) Mba yer gomoti la ér Tartor u sha; ka sha heela Yesu Kristu á lu hegen á lu hemen ye.

[Ufoto mba sha peeji 7 la]

Mba pasen loho u dedoo ne tar sha won cii