Tar Ne Ver Ishigh Han Jimi?

Mbamzeyol mba vesen man akaa a kpilighyol ta ijar hanma ijiir cii sha tar nyian! Inja i akaa ne jim yô kanyi?

MKOR U IYOL I OR: Ubom bughur sha tembe kasua. Í ta atica man mbayevmakeranta gbuuka sha makeranta. Mbamaren gema ashe kera yô, í ii wanikyundan ve í yem a mi je. Mbaiv kôr kasev kua utsembaiorov oo gera gera, ii ve.

SHA GBAA U KWAGHAÔNDO: Ucôôci pav ker mba tan ikyaa ken iniongo í í lu nôngon ityav la, mbagen mba tan ikyaa vegher ne, mbagenev di vegher la. Í na mbahemenev mbaadua ibo ér ve wa ave sha mtim u ikyurior. Upristi mba yaven a agumaior; kpa côôci ngi yeren. Mbazan adua mba panden a pande; gande mba teen ayou a aduagh kera.

UIKYASEN: Í paa akô eregh eregh sha ci u kpenga. Mbaibanave tìm akô gburu gburu sha u keren ikyon i wan usu. Í vihi mngerem ma shin inya, ma kera doo u man ga. Ihyôghonough mbi í hee shin tyeku la kua igbenda í í gem kôron ishu ainge la ngi timin ishu been. Í vihi ahumbe je pe ôôn kera ngu ga.

 U KEREN IME-MNGER: Ibaver igen kaa ér injartom i ior mba hen haregh u hen atô u Afrika ve zough a mi sha inyom jimin cii la gba ikyev ga cii, i ndahar je kunya kôr. Hua u mbahemenev mbakpengav kpishi ve eren la na ikpenga ngi kpen, undun ior udubu imôngo aa tom shio. Anyighe u eren na inyaregh ki ior kpishi ve we ajia la ka ki saa pirighaa.

IJEN GBA: Iorov 800,000,000 sha tar mba tse ijen hanma sev.

ITYAV: Ken derianyom u sha 20 la tseegh, ityav wua ior sha tar hemba iorov 100,000,000. Ikyav mbi uityaav mbi bughur yemen ca hiinii mbi í ombo í te atihi atihi la tseegh kpa mbia fatyô u timin orumace akpamber imôngo. Ityav mbi shoja petali kpa seer shami. Tswam u eren ngu samber tseren tar cii.

UBOMBAUANGEV MAN IANGEV MBIGENEV WUE WUE: Hii ken inyom i 1918 la, angev mbu haan ahenga mbugenev due ken Ishpania, mbu wua ior je kuma iorov 21,000,000. Hegen angev mbu ikyande mbu í yer ér AIDS la mbu samber wuee, mbu hingir “angev mbu í gbe je mbu lu a̱ vande tseren orumace ga yô.” Angev mbu kyansa man angev mbu shimav va ior a ijungwen sha tar wuee.

De haren ishima sha abaver ne tseegh ga. Ka akaa á á gbe karen tsô eren yôô? Shin angan ka di akaa agen a á lu zan hemen tar sha won cii, shi á lu a ityôkyaa i vesene?

 [Ngeren u kiriki/Foto u sha peeji 5 la]

Kwagh Gba Aôndo Sha Mi Je Kpa?

Ior kpishi akaa a kpilighyol ka aa e̱r ve, shin or nana̱ kpe ve yô, í lan ve ishima, ve gba henen er í hii ve Aôndo á yange ambaakaa angara nahan ga yô.

Kwagh gba Aôndo sha mi. Hegen je kpa ne se mkôôm man myôhôryol u mimi. (Mateu 11:28-30; 2 Timoteu 3:16, 17) A wa imaagh ki una va kar a ipila man angev kua ku kpaa cii kera gbem sha won yô. Akaa a á ne se la tese ér ka ior mba ken tar môm tseegh tsô a we ve ikyo ga, kpa we ior mba ken hanma tar cii kua hanma ikyurior cii man mba lamen hanma zwa kpaa cii ikyo.—Aerenakaa 10:34, 35.

Se di yô kwagh gba se sha mi nan je? Ú fa Un shon u á gbe sha man tar la kpa? Iti na ér ana? Awashima na kanyi? Á na se mbamlumun sha mbampin mban kaveraa ken Bibilo. Shi á pase se akaa a un lu eren sha u been a ipila man angev man ku kpaa cii la ken Bibilo. Kpa, kanyi kwagh se er ve, se zua a mtsera asee? Gba u se hen se fa un shi se fa awashima na kpaa. Aluer se na akaa a Aôndo a ne se la jighjigh ga nahan, a wase se nena? (Yohane 3:16; Mbaheberu 11:6) Shi ka hange hange u se kuran atindi na kpaa keng. (1 Yohane 5:3) Ú wa kwagh u Aôndo ikyo je kuma u ú kuran atindi na kpa?

Cii man se̱ kav ityôkyaa i í ne ve Aôndo á de ér akaa a̱ lu er á lu hegen nahan yô, saa se vande fan ikyaa í vesen í í lu inya la. Bibilo pase ikyaa shon. Í pase ikyaa ne sha peeji 15 ken antakerada ne.